Sema Panchadsak Iren Ma Gwared Dangit
19
Idi iyakcheng ma, inki-ngelan koy mapkes a notheng a singen ese-esel na chakel a tood dangit a inkeljaw to i:“Hallelujah! Naedafod
Afo Chiyos tayoy
kaysalakanan tan
kinakayang tan
panakabalin.
2 Tep podno tan kosto
ma pengowis to.
Chiyosen Afo Chiyos
iwa echamag a
biin naekidahi-dahi
tep igwis ton emiin i tood
dobong a mengemag
na ensekig a ima-imag to.
Et inbales Afo Chiyos
tep sema biiy emono
iren ma bagaen to.”
3 Inkeljaw cha mowan i:
“Hallelujah! Emangkepooli
ma echamag a siyodad,
et onkaya-kayang i asok to
na ingked ingka.”
4 Et sema iren chegwen polo tan epat a naengibalnay tan sema epat a sibibiyag a parsowa, iyantalimohod iren manchejaw cha Afo Chiyos a mantoktokkong cha throno. Kigwan cha i “Amen. Hallelujah!”
Sema Kasal Na Ngalobon Kalniro
5 Et gwariy inki-ngelan kon esel a edafo did kad-an na thronon kigwan to i:
“Chayaw jos Afo Chiyos tayo!
Si-kayon emiin a
naiyansilbid si-katho,
si-kayon emiin a
entahot cha si-katho,
si-kayon emiin a
iyangkebaba tan
iyangkekayang,
chayaw jos Afo Chiyos!”
6 Et gwariy inki-ngelan ko pay a esel a singen ese-esel na chakel a too. Singen inges toy notheng na ekayang a pajaspas tan notheng na mapkes a kirol. Chiyan ikeljaw i:
“Hallelujah! Tep
si Afo Chiyos tayon
manakabalin,
si-kathoy naiyantoray.
7 Manchadsak kiya,
man-imdeng kiya, tan
mechejaw si Afo Chiyos
tep mimothok miy akow
na pankasal na
Ngalobon Kalniro,
et sema biin imbaliyen to,
esagana wa.
8 Tep iyanbaro ma bii
na palit a
iyay-i-kan cha si-kathon
polaw tan mandingsi
tan edinis.”
Sema banag niwa baro, sema mapteng a ima-imag iren ma toon Afo Chiyos.
9 Et kigwan na anghil cha si-kak i “Isolat mo jay. Magesat ira ma eta-gway a mekipangan cha kasal na Ngalobon Kalniro.” Kigwan to ngod si-kak i “Sejay iriy podnon ese-esel Afo Chiyos.”
10 Et iyantalimohorak cha sangoanan na anghil a manchejaw cha si-katho. Nem kigwan tod si-kak i “Enog i imag iwan! Tep naiyansilbiak cha Afo Chiyos a inges mo tan sema aahim a naemetpet na podnon toro-toro maypangkep Jesus. Si Afo Chiyos bengat i cheja-chejawen mo koma.” Tep sema kainportantian a pangkep na emiin a padto, si-kathoy inpangamta na podnon toro-toro maypangkep Jesus.
Sema Inpangagwak Niwa Iyansahay Cha Polaw A Kabajo
11 Idi iyakcheng ma, mitak i edohatan i dangit et bimo-day aliy polaw a kabajo. Sema mansasahay chiwan, iyanngaran na Naepiyal tan Podno. Kostoy nainpangowis to tan kosto ngoy nainpasing ton mankobat iren ma naengontred si-katho. 12 Sema matha tho, singen birangdang a afoy, tan chakel i koroned toktok to. Iyaysolat ngoy ngaran tod angel to, nem nagwariy mahaamta na banag to, malaksid cha si-katho bengat. 13 Iyanbaro na edayad a iyayta-nek cha chala. Sema inngaran ched si-katho, si Esel Afo Chiyos. 14 Sema iren chakel a solcharon gwared dangit, tined cha. Iyansahay ira ja solcharod ma pofodaw a kabajo, tan iyanbaro ira na palit a polaw tan malinis. 15 Sema inngaran cha na Esel Afo Chiyos, gwariy maritem a ispada thon bimo-day cha temi thon osalen ton mengegwak na tood emiin a ili. Sema pantoray tod si-kara, mahedsang a singen barita. Ibiybiy toy banay a bonget Afo Chiyos a manakabalin ired ma mabesol tep sema penosa thod si-kara, singen pemespes na chanom na grape. 16 Et chiwa baro tho tan chiwa olpo tho, gwariy ngaran a iyaysolat a “Ari na emiin a ari tan Afo na emiin a afo.”
17 Et gwariy mitak a anghil a man-ak-akgwat cha akow. Kimeljaw cha emiin a titit a mantatayab cha iyaykayang a kigwan to i “Gomali jo. Kesa-nop kayo did jay et pekipangan kayo na insaganen Afo Chiyos a kakanen jo. 18 Gomali jod jay a mengan na angel na ari, solcharo tan afo ra, kabajo tan sema iren naiyansahay, tan emiin a toon naengontred Afo Chiyos, angken bagaen tan nat bagaen, iyangkebaba tan iyangkekayang.”
19 Et mitak iwa emanekot a animal tan emiin a naiyantoray chiya dobong tan sosolcharo ren esa-nop a mankobat niwa iyansahay cha polaw a kabajo tan sosolcharo tho. 20 Nem ida ra ma emanekot a animal, pati sema naiyan-ite-itek a profiten engama-amag na kaskasdaaw a milagrod inpansilbi thod ma animal. Sema iren milagro, sema iyosal ton menaol iren ma toon emalkaan na malka na animal a iyanchaya-chayaw na bolto tho. Sema emanekot a animal tan naiyan-ite-itek a profita, iyayta-boy iren mabiday cha baybay a manchachalang a sulfur. 21 Sema emiin a solcharo cha ngo, etiy ira na ispaden bimo-day cha temi niwa iyansahay cha polaw a kabajo. Et kiyakan na emiin a titit i angel na iyangketiy ingkathod iyapsel iren chili.