Sema Ingka-gwak Na Siyodad Na Babylon
18
Idi iyakcheng ma, gwariy mitak a sa-kin anghil a mansa-sa-kod alid dangit. Banay i karebengan to tan esilowan i intiron dobong cha nihal to. 2 Inkeljaw to i:“Echaral ma!
Echaral miy echamag a
siyodad na Babylon!
Iyanbalin na naiyan-iyanan
na ekila-kilasin
dimonyos tan
ngaaw a ispiritos.
Iyanbalin na naiyan-iyanan
na ekila-kilasin titit a
ngaaw tan ensekig.
3 Tep seja Babylon,
singen ngaaw a biin
engipainom na adak
cha emiin a too
say a-magen chiy ensekig a
naima-imag to.
Sema iren naiyantoray
chiya dobong,
chicho-chichog cha,
et sema iren naiyandahod
ja dobong,
bimaknang ira kagol na
kinaagom na bii na
kinabaknang.”
4 Et inki-ngelan ko pay i sa-kin esel a edafo did dangit a kigwan to i:
“Si-kayon took, aragwii yo ta bii,
nahol ni mayka-chom kayod inpanbasol to
et mayda-kam kayo ngod chosa tho.
5 Tep chakel i basol ton
singen iyaypa-pa-tok
ingkathod sibi thoy dangit.
Et nat nadiningding
Afo Chiyos i ngaaw a
ima-imag to.
6 Amag jod si-katho
ma ngaaw a
ima-imag tod echom.
Sema emiin a ima-imag ton
manpadigat na too,
pandobli yod si-katho.
Sema adak a inpainom
tod too,
pandobli yoy kedsang to et
ipainom jod si-katho.
7 Sema kabenay na
kinabaknang to tan
inpangikayang to
na angel to,
si-katho ngoy kabenay
na pandiga-digat to tan
engos to.
Tep kigwan tod
nemnem to i
‘Riynaak a naiyantoray.
Nat ebaloak. Nat
da-ka-da-kaman
koy engos.’
8 Isonga, man-iringkas a
onmothok i diga-digat
cha si-katho,
et biglen da-kaman toy
pathiy tan engos
tan bithil.
Kolpin mepoolan
tep si Afo Chiyos a
mengowis cha si-katho,
manakabalin.”
9 Et sema iren naiyantoray chiya dobong a enaro-charog niwa bii tan ekikanas niwa kinabaknang to, nangisan cha tan onngogngog ired si-katho no takmangen chiy asok a manbo-bo-day chiwa emangkepoolin siyodad. 10 On-akgwat ired aragwi tep ontahot ngo iren mechosa, et konen cha i:
“Kakaasi! Kakaasi ma
echamag a siyodad
na Babylon!
Kakaasi ma banay
a siyodad!
Bigliy chosa tho.
Kolpin echaral na
sa-kin oras bengat.”
11 Sema iren naiyandahod ja dobong, nangisan cha ngo tan engosan cha tep nagwara wiy menongkal na daho ra. 12 Nagwariy menongkal cha si-kara na balitok, silbir, ebanol a batho, tan pirlas. Nagwara ngoy menongkal na palit a dofot a polaw, violet, tan depang. Tan nagwariy menongkal na ekila-kilasin kejow a manbangdo, ekila-kilasin aamag na sangi na elephant, tan ekila-kilasin aamag na palit a kejow, danchok, tan batho. 13 Nagwara ngoy menongkal na ekila-kilasin para namnam na sira tan bangbangdon inges toy insinso, frankincense, tan myrrh. Tan nagwariy menongkal na inom, maltiha, arina, tan wheat, tan baha, kalniro, kabajo, tan kariton, tan toon naindaho ren bagaen. 14 Et emiin a naiyandaho, konen ched ma siyodad i:
“Sema palit a dawes a
napiningithan mo,
nat medeko waled tan.
Emiin a kinabaknang mo tan
mapteng a napiyategan mo,
aomas, et nat sepo-sepolen mo
mowan ali.”
15 Et sema iren naiyandaho iren man a bimaknang kagol na inpandaho red ma siyodad, on-akgwat ired aragwi tep ontahot ngo iren mechosa. Onnangis iren mapkes tan on-engos iren konen cha i:
16 “Kakaasi! Kakaasi ma
echamag a siyodad!
Tep nontan sema iren
naiyan-iyan chiwan,
iyanbaro ira na palit a polaw,
violet, tan depang.
Aartian ira na balitok tan
ebanol a batho tan pirlas.
17 Nem aomas i emiin a
kinabaknang cha na
sa-kin oras bengat.”
Emiin a afo na bapor tan sema iren naiyan-obded bapor tan sema iren pasahirod man tan sema ngo iren emiin a naiyan-obded ma baybay, on-akgwat ired aragwi, 18 et no takmangen chiy asok a manbo-bo-day chiwa emangkepoolin siyodad, onkeljaw iren konen cha i “Nagwaren polos i siyodad a may-inges chiwan a kainportantian a siyodad.” 19 Et ipa-tok chiy pithek cha toktok chen sinjal na engos cha iy mannanangis ira. Et konen cha i:
“Kakaasi! Kakaasi ma
echamag a siyodad!
Emiin a gwariy bapor cha,
bimaknang ira
kagol na kinabaknang
niwa siyodad.
Et niman echaral na
sa-kin oras bengat.
20 Si-kayon gwared dangit,
chadsak kayo.
Si-kayon toon Afo Chiyos,
apostolis, tan profita,
chadsak kayo ngo.
Tep chiyosen Afo Chiyos
iwa siyodad
kagol na ngaaw a
ima-imag tod si-kayo!”
21 Et gwariy mahedsang a anghil a engala na banay a bathon inges toy bathon naaosal na pankiding na irik, et inta-boy tod baybay a kigwan to i:
“Inges niyay i kedsang
na kechechal na
echamag a siyodad
na Babylon,
et eg mesi-si-neng mowan.
22 Isonga, si-kam a siyodad
na Babylon,
nagwara wiy manmosiko
tan mankalchang chithan.
Nagwara wiy mankomising
tan mantrompited tan.
Nagwara ngo wiy edaing a
naengamag na ekila-kilasin
ma-mag chithan,
et nagwara wiy notheng na
kidingan na irik.
23 Nagwara wiy silow a
manninihal chithan,
et nagwara wiy notheng na
chadsak na kasal.
Mechosa ma siyodad na
Babylon
tep sema iren naiyandahod
man,
pahi-tek ira tan nakigwan cha i
si-kariy kabaknangan a
tood dobong,
et siyaol chen emiin i
tood ja dobong
babaen na ite-itek cha.
24 Mechosa ma siyodad na
Babylon
tep chiwan i enafolan cha
na chala iren ma profita
tan toon Afo Chiyos
tan emiin a biyono-bono red
ja dobong.”