Sema Biin Iyansahay Chiwa Emanekot A Animal
17
Idi iyakcheng ma, kimowan alid si-kak i sa-kin ma pithon anghilis a man-eg-egchi na pithon malokong. Kigwan to i “Gomali. Ibiybiy kod si-kam i pesing Afo Chiyos a menosa na echamag a biin naekidahi-dahin mantoktokkong cha kad-an na chakel a kolos. 2 Sema iren naiyantoray chiya dobong, ekicharo-charog ired si-katho, et sema tood ja dobong, singen ebotheng ira na adak ton ensekig a ogadi thon naiyono-onoran cha.”3 Et inpakokip toak na Ispirito Santo, et iyodop toak na anghil cha dogad a nagwariy toon naiyan-iya-iyan. Gwariy mitak chiwan a biin mansasahay cha emanekot a animal a depang a gwariy pithon toktok to tan sampolon sakdod to. Et sema intiron angel niwa animal, esola-solathan na ekila-kilasin ngaran Afo Chiyos a nagwariy karebengan ton mengosal. 4 Iyanbaro ma bii na violet tan depang, et aarti-artian na balitok tan ebanol a batho tan pirlas. Man-eg-egchi na ebalitohan a tasen iyapno na ngithi tan ensekig a ima-imag to. 5 Et chiwa temok to, gwariy iyaysolat a ngaran a echalek i banag to. Kigwan to i “Sema echamag a siyodad na Babylon, si-kathoy ina na bibiin naekidahi-dahi tan sema naedafoan na emiin a ensekig a naaama-amag cha dobong.” 6 Mitak i ebotheng iwa bii na chala na toon Afo Chiyos a biyono-bono ra kagol na pamati red Jesus.
Idi mitak iwa bii, iyasdaawak a pasiya. 7 Nem kigwan na anghil cha si-kak i “Niyana iyasdaaw ka? Konen kod si-kam i banag niwa bii tan sema emanekot a animal a towan sahayin gwariy pithon toktok to tan sampolon sakdod to. 8 Sema mitam a animal, iyanbiya-biyag nontan da, nem niman etiy ma. Nem no sa-ki din akow, onbo-day mowan alid ma echalek a ebot a nagwariy kaysespaan to. Et may-odop chiwa chosa thon nagwariy pengingkaan to. Masdaaw ira ma toon naiyan-iyan chiya dobong. Sema iren too, nat iyaysolat i ngaran ched dibchon iyaysolathan na ngaran iren ma gwariy biyag chen nagwariy pengingkaan ton iyaysolat nonta aneng nin meparsowiy dobong. Masdaaw ira di no metaen cha ma emanekot a animal tep iyanbiyag nontan den etiy, et manparang mowan.
9 “Mesepol a gwariy daing na too say egwathan to jay. Say banag na pithon toktok niwa animal, pithon chontog a natimokkongan niwa bii. Say sa-ki pay a banag to, pithon ari. 10 Iya-kal i dimen ma pithon ari. Maramen mantotoray i sa-ki. Et aneng onmothok i sa-ki pay, nem no onmothok, kedpeng bengat i pantoray to. 11 Et sema emanekot a animal a iyanbiyag nontan, nem niman ma etiy, si-katho diy maykagwalon ari, nem maybilang ngod ma pithon ari. Et may-odop chiwa chosa thon nagwariy pengingkaan to.
12 “Sema sampolon sakdod a sini-neng mo, sampolon arin aneng nin mantoray, nem may-i-kanan ira na karebengan chen mekitoray chiwa emanekot a animal na sankaatihan a singen sa-kin oras bengat. 13 Mansa-sa-kiy pannemnem iren ma ari. Isonga i-kan chiy kabaalan tan karebengan ched ma emanekot a animal. 14 Kobathen cha ma Ngalobon Kalniro, nem sema Ngalobon Kalniro tan sema pinispis ton mengonod cha si-kathon naepiyal, a-gwahen cha ira. Tep sema Ngalobon Kalniro, si-kathoy kahejangan a Afo na emiin a afo tan si-kathoy kahejangan a Ari na emiin a ari.”
15 Kigwan ngo na anghil cha si-kak i “Sema chakel a kolos a sini-neng mon natimokkongan niwa biin naekidahi-dahi, si-kariy chakel a toon edafo did emiin a ili tan naimesel na ekila-kilasin esel. 16 Et sema sampolon sakdod a sini-neng mon sampolon ari, tan sema emanekot a animal, owesen cha ma biin naekidahi-dahi. Pingilen chen emiin i kokowa tho tan a-kalen chiy baro tho. Kakanen chiy angel to et kolpin poolan chiy ebay-anan. 17 Tep itorong Afo Chiyos i nemnem cha say tongpalen chiy pangkep to. Isonga mansa-sa-kiy pannemnem cha tan i-kan chiy karebengan chen mantoray chiwa emanekot a animal ingkathod metongpal i emiin a kigwan Afo Chiyos. 18 Sema biin sini-neng mo, si-kathoy echamag a siyodad a naiyantoray na emiin a arid dobong.”