Sema Pithon Malokong A Iyapno Na Chosa
16
Et inki-ngelan koy mapkes a esel a edafo did timplon kigwan to ired ma pithon anghilis i “Jo iso-jat cha dobong itha bonget Afo Chiyos a iyay-ejan chitha pithon malokong.”2 Et kimowan iwa pilmiron anghil et inso-jat to ma iyay-ejan cha malokong tod dobong. Et sema iren toon emalkaan na malka niwa emanekot a animal a iyanchayaw niwa bolto tho, epelsaan i angel cha. Enbanget a pasiya tan ensahit a chiliy pelsa ra.
3 Et inso-jat niwa maykadgwen anghil i iyay-ejan cha malokong tod baybay. Iyanbalin i baybay na singen chala na etiy a too, et emiin a sibibiyag cha baybay, iyangketiy.
4 Et inso-jat niwa maykatdon anghil i iyay-ejan cha malokong tod kolos tan temtem, et iyanbalin i chanom na chala. 5 Et inki-ngelen koy anghil a gwariy karebengan ton mantoray na chanom a kigwan to i:
“O, Afo Chiyos,
si-kam i esantoan a
gwara nontan da tan
gwara pay niman.
Kosto-kosto ira jay a inpanosam.
6 Tep sema iren toon mowan
chosaa,
biyono riy toom tan sema iren
profita
et imayos i chala ra,
et niman chalay ipainom mod
si-kara.
Iyaybagay i chosa red ma
ima-imag cha.”
7 Et inki-ngelan koy esel a edafo did altar a kigwan to i:
“Ahow, Afo Chiyos a
manakabalin,
podno tan kosto ira ma
inpanosam.”
8 Et inso-jat niwa mayka-pat a anghil i iyay-ejan cha malokong tod akow. Et iyay-i-kanan i akow na karebengan ton memool na too niwa chalang to. 9 Epoolan i too na epaladon petang na akow, et biyotbot ches Afo Chiyos a mahaamta iren ma emanekot a diga-digat. Eg ira iyanbabawi na basol cha tan nat chijaw ches Afo Chiyos.
10 Et inso-jat niwa maykalimen anghil i iyay-ejan cha malokong tod throno na emanekot a animal, et bimolinget i pantorayan to. Kidat na tooy temi ra kagol na banay a sahit cha. 11 Biyotbot ches Afo Chiyos cha dangit kagol na sahit tan pelsa ra, nem eg ira iyanbabawi na ngaaw a ima-imag cha.
12 Et inso-jat niwa mayka-nem a anghil i iyay-ejan cha malokong tod ma banay a kolos a Euphrates. Iya-tian iwa kolos say maysaganiy panchedanan na aari tan sosolcharo chen medepo did bosakan. 13 Et gwariy mitak a tedon ispiritos a singen palpalan i kasi-neng cha. Bimo-day i sa-kid temi na dragon, bimo-day i maykadgwed temi na emanekot a animal, et bimo-day i maykatdod temi na naiyan-ite-itek a profita. 14 Sema ispiritos, dimonyos iren gwariy panakabalin chen mengemag na milagro, et kimowan iren siya-nop chen emiin i arid intiron dobong say kobathen ches Afo Chiyos a manakabalin na kainportantian a akow na pengegwak Afo Chiyos a emiin iren ma naengontred si-katho.
15 Et imesel si Jesu Criston kigwan to i “Ki-ngeli yo. Onkowanak alin singen mahibot a onkowan alin nagwariy banchaan to. Magesat i toon nat manjo-jo-kow tan iyanbaro no onkowanak ali say nat medagosan et say nat onbaing cha sangoanan na too.”
16 Et sema iren tedon ngaaw a ispiritos, siya-nop chen emiin i aari tan sosolcharo red dogad a iyanngaran na Armageddon cha esel na Hodjos.
17 Idi iyakcheng ma, inso-jat niwa maykapithon anghil i iyay-ejan cha malokong tod angin. Et gwariy mapkes a esel a edafo did thronod timplon kigwan to i “Iyakcheng ma!” 18 Biglen gwariy ki-dat na bakilat tan mapkes a notheng tan kirol tan mahedsang a pasiyen jegjeg. Sema jegjeg, nagwariy kay-ingesan to manipod na ingkaparsowa na tood ja dobong. Paladoy kedsang niwan a jegjeg. 19 Sema echamag a siyodad na Babylon, iyantedo na pis-ang et kolpin echaral, et echaral ngon emiin iriy siyodad chiwa emiin a ili. Et niyemnem Afo Chiyos i basol na tood echamag a siyodad na Babylon et chiyosa tho ira. Sema inpanosa tho, singen inpainom toy mahedsang a adak a may-arig cha banay a bonget to. 20 Et emiin a dogad a dinikmot na baybay, aomas, tan nagwara ngo wiy chonchontog. 21 Et dimanti na babenay a dimen polon kiloy sa-ki, et epontaan iriy too na danti. Et biyotbot iren ma toos Afo Chiyos kagol niwa danti tep emanekot a chili ma digat.