Sema Iren Pithon Anghilis Tan Sema Kaonoran A Diga-digat
15
Idi iyakcheng ma, gwariy mitak a sa-kin kaskasdaaw a sinjal cha dangit a pithon anghilis a iyay-i-kanan na pithon diga-digat. Sejay iriy kaonoran a digat tep no mekcheng ira jay, kolpin maybiybiy i bonget Afo Chiyos.2 Et gwariy mitak a singen baybay a singen inges toy salming a edaohan na afoy. Mitak pay ira ma toon engagwak niwa emanekot a animal. Nat chijaw cha ma animal tan bolto tho, et eg ira emalkaan niwa nomiro na ngaran na animal. Sema emiin a too, man-ak-akgwat ired kilig niwa baybay a singen salming, et man-eg-egchi iren emiin na kalchang a in-i-kan Afo Chiyos cha si-kara. 3 Inkansiyon chiy kansiyon Moses a bagaen Afo Chiyos. Sema kansiyon Moses i kansiyon pay niwa Ngalobon Kalniro. Kigwan cha i:
“Si Afo Chiyos a manakabalin,
naechayaw tan kaskasdaaw i emiin a naima-imag mo.
Si-kam a ari na emiin a ili,
kosto tan podnoy naima-imag mo.
4 O, Afo Chiyos, siyay nat ontahot cha si-kam?
Siyay nat manchejaw cha si-kam?
Tep si-kam bengat i kolpin esantoan.
Sema iren toon edafod
emiin a ili,
onkowan ira din
manchejaw cha si-kam
tep mita ra i kosto-kostoy
nainpasing mon
mengowis.”
5 Idi iyakcheng ira ma toon iyankankansiyon, mitak chiwa timplod dangit i edohatan i Kasantoan a Kwadton kad-an na iyaysolat a bili-bilin Afo Chiyos. 6 Et bimo-day chiwa timplo ira ma pithon anghilis a iyay-i-kanan na pithon diga-digat. Iyanbaro ira na polaw a edinis tan mandingsi, et gwara ngoy balitok a iyaybalkes cha pahow cha. 7 Et sema sa-kin epat a sibibiyag a parsowa, in-i-kanan toy pithon anghilis a sa-ki tan sa-kin ebalitohan a malokong a iyapno na bonget Afo Chiyos a sibibiyag na ingked ingka. 8 Et iyapnoy timplo na asok na sinjal na nihal tan panakabalin Afo Chiyos. Nagwariy nahasekep chiwa timplo ingkathod iyakcheng ira ma pithon diga-digat a iyay-i-kan ired ma pithon anghilis.