Sema Ngalobon Kalniro Tan Sema Iren 144,000 a Toon Insalakan To
14
Et sini-neng ko mowan, et gwariy Ngalobon Kalniron man-ak-akgwat cha chontog a Zion. Ekiakgwat ngod si-katho ira ma 144,000 a too, tan iyaysolat cha temok chiy ngaran niwa Ngalobon Kalniro tan sema ngaran na Aweto. 2 Et inki-ngelan koy esel a edafod dangit a singen notheng na ekayang a pajaspas tan mapkes a kirol. Et sema esel a inki-ngelan ko, singen inges to ngoy mosiko na chakel a kalchang. 3 Sema iren 144,000 a too, man-ak-akgwat ired sangoanan na throno tan sema epat a sibibiyag a parsowa tan sema chegwen polo tan epat a naengibalnay. Sema iren 144,000 a too, iyankankansiyon ira na badon kansiyon, et nagwara pay i maytolok a man-achal niwa kansiyon, malaksid si-kara bengat tep si-kariy iyaydibchid ja dobong. 4 Too iren edinis tep nat nachijaw cha ma nat Afo Chiyos. May-arig ired ma dahin eg ena-enarog na nat imbaliy to. Naiyonoran chiy Ngalobon Kalnirod ma kona-konan to. Iyaydibchi ira say maydasin ired too, et iyaytangdal ired Afo Chiyos tan sema Ngalobon Kalniron singen pilmiron aanin iyaytangdal cha Afo Chiyos. 5 Nat iyan-ite-itek ira tan nagwariy iyankolangan cha.Sema Tedon Anghilis
6 Et gwariy mitak a sa-kin anghil a mantatayab cha iyaykayang. Gwared si-kathoy mapteng a chamag a on-ono-onong na ingked ingka. Et kigwan to ired ma toon gwared dobong a edafod emiin a ili, emiin a tribo, emiin a too, tan ekilasi-kilasin esel. 7 Kimeljaw a kigwan to i “Tahoti yos Afo Chiyos tan chayaw joy kinakayang to. Tep mimothok miy timpon pengowis to na too. Chayaw jos Afo Chiyos a emarsowa na dangit tan dobong tan baybay tan temtem.”
8 Gwariy maykadgwen anghil a timened a kigwan to i “Echaral ma! Echaral miy echamag a siyodad na Babylon! Sema siyodad, inges toy biin naekidahi-dahin engipainom na adak cha emiin a too say a-magen chiy ensekig a naima-imag to.”
9 Gwara ngoy maykatdon anghil a timened ired ma chegwen anghilis. Kimeljaw a kigwan to i “Sema iren toon naiyanchayaw na emanekot a animal tan sema bolto thon emalkaan i temok cha ono diwa ra na malka tho, 10 da-kaman cha ngoy paladon bonget Afo Chiyos. Sema bonget Afo Chiyos, may-arig cha adak a nat edaohan na chanom a inso-jat Afo Chiyos cha tasa. Et sema iren toon naiyanchayaw na emanekot a animal, mepidit iren menginom niwan. Mepedigat ira na afoy tan sulfur cha sangoanan iren ma esantoan a anghilis tan sema Ngalobon Kalniro. 11 Et sema afoy a memedigat cha si-kara, onkaya-kayang i asok to na ingked ingka. Sema iren naiyanchayaw na emanekot a animal tan sema bolto thon emalkaan na ngaran niwa animal, nagwariy inana red ma digat cha na san-akow tan sandabi.” 12 Isonga, mesepol a memasig i toon Afo Chiyos a mengonod na bilin Afo Chiyos tan memati ired Jesus.
13 Et gwariy inki-ngelan kon esel a edafo did dangit a kigwan to i “Isolat mo jay. Manipod niman, sema iren toon metiy a naematid Jesus a Afo thayo, magesat ira.” Et kigwan na Ispirito Santo i “Podno tan. Magesat ira nowan tep man-inana ired ma edigat a obda ra, et kongkonaen cha kagol na mapteng a ima-imag cha.”
Sema Kaani Iren Ma Tood Dobong
14 Idi iyakcheng ma, sini-neng ko mowan, et gwariy mitak a polaw a kolpot. Gwariy mantoktokkong chiwa kolpot a sema kasi-neng to, singen inges toy kasi-neng na Anak na Too. Gwariy ebalitohan a koroned toktok to, tan gwariy maritem a kompay cha diwa tho. 15 Et bimo-day aliy sa-kin anghil chiwa timplod dangit, et kimeljaw a kigwan tod ma mantoktokkong chiwa kolpot i “Osal mo ta kompay mo et pan-ani ka tep mimothok miy timpon pan-ani. Tep bimalag miy anid ja dobong.” 16 Et sema mantoktokkong chiwa kolpot, ingwa-jas toy kompay tod ja dobong, et aaniy dobong.
17 Idi iyakcheng ma, bimo-day ngo diy sa-kin anghil chiwa timplod dangit, et man-eg-egchi ngo na maritem a kompay. 18 Et gwara ngoy sa-kin anghil a bimo-day alid ma kad-an na altar a gwariy karebengan ton mantoray na afoy. Kimeljaw chiwa anghil a man-eg-egchi na maritem a kompay a kigwan to i “Osal mo ta kompay mo, et kompay moy ebo-bo-ngol a grape chiwa gwahal ched dobong tep edom ma ira.” 19 Et ingwa-jas niwa anghil i kompay tod ja dobong, et siya-nop ton emiin ira ma grape chiya dobong, et inba-tok tod banay a pespesan. Sema pespesan, may-arig cha epaladon bonget Afo Chiyos ired ma toon nat ematid si-katho. 20 Epespes ira ma grape chiwa pespesan a gwared awas na siyodad. Et sema chalen bimo-day chiwa pespesan, imayos na tedon dasos tan chegwen polon kilomitro, et sema kahejang na chala, sibi thoy ingkathod pahadat na kabajo.