Sema Emanekot A Animal A Kima-jat Cha Baybay
13
Et gwariy mitak a emanekot a animal a kima-jat cha baybay. Gwariy pithon toktok to tan sampolon sakdod ton gwariy korona cha. Sema emiin a toktok to, gwariy ekila-kilasin ngaran Afo Chiyos a iyaysolat ired man a nagwariy karebengan ton mengosal. 2 Sema mitak a animal, singen leopard. Sema seki tho, singen seki na bear, tan sema ngoseb to, singen ngoseb na lion. In-i-kan na dragon cha emanekot a animal i panakabalin to tan banay a karebengan ton mantoray. 3 Sema sa-kin toktok niwa animal, gwariy banay a sogat ton mengipathiy komed si-katho, nem epigid ngorechan. Et iyasdaaw i emiin a tood dobong, et iyonoran cha man a animal. 4 Chijaw na tooy dragon tep in-i-kan toy karebengan tod ma emanekot a animal. Chijaw cha pay iwa animal a kigwan cha i “Sejay a animal, nagwariy kay-ingesan to. Nagwariy mahaagwak cha si-katho.”5 Intolok Afo Chiyos iwa emanekot a animal a ondastog a konen to i si-kathos Afo Chiyos. Intolok ngon Afo Chiyos i gwariy karebengan ton mantoray na epat a polo tan chegwen bolan. a 6 Iyomang na animal si Afo Chiyos tan ngaran to tan pan-iyanan tod dangit tan emiin a naiyan-iyan chiwan. 7 Iyaytolok ngoy animal a mengobat na toon Afo Chiyos, et egwahen to ira. Iyay-i-kanan na karebengan ton mantoray na toon edafod emiin a tribo, emiin a too, emiin a ili, tan ekilasi-kilasin esel. 8 Emiin a toon naiyan-iyan cha dobong, chijaw cha ma emanekot a animal. Sema iren iyanchayaw niwa animal, si-kariy nat iyaysolat i ngaran ched ma dibchon kegwen na Ngalobon Kalniron biyono ra. Tep sema iren toon iyaysolat i ngaran ched ma dibcho, si-kariy toon gwariy biyag to na ingked ingka. Nonta aneng nin meparsowiy dobong, iyaysolat i ngaran ched man.
9 Si-kayon manki-ki-ngel, nemnem jo jay:
10 Sema toon iyaykecheng a maykalebos,
maykalebos ngo.
Tan sema toon iyaykecheng a metiy na ispada,
metiy ngo na ispada.
Isonga, mesepol a anosan na toon Afo Chiyos i diga-digat cha et memasig iren memati.
Sema Maykadgwen Emanekot A Animal A Bimo-day Cha Pithek
11 Et gwariy mitak mowan a sa-kin emanekot a animal a manbo-bo-day alid pithek. Gwariy chegwen sakdod ton singen sakdod na ngalobon kalniro, tan sema esel to, singen esel na dragon. 12 Sema maykadgwen emanekot a animal, gwared si-kathoy emiin a karebengan na pilmiron animal, et naiyosal ton mansilbid ma pilmiron animal. Pinidit na maykadgwen animal i emiin a toon gwared dobong a manchejaw na pilmiron animal a epigid i sogat to angken mengipathiy komed si-katho. 13 Sema maykadgwen animal, engamag na kaskasdaaw a milagro, kaspangarigan, inpasa-kod to diy afoy chiwa iyaykayang iy manboboya ira ma too. 14 Isonga, siyaol toy tood dobong babaen na kaskasdaaw a milagron iyaytolok a a-magen tod pansilbi thod ma pilmiron animal. Et kigwan to iriy toon mengemag na bolton inges to ma pilmiron animal a esogathan na ispada nem sibibiyag pay. Kigwan to man say cheja-chejawen cha ma bolto. 15 Iyaytolok a ipajasjas na maykadgwen animal i bolto na pilmiron animal say mahaesel i bolto, et kigwan to ngo i emiin a nat manchejaw niyay, metiy ira. 16 Pinidit ngon ma maykadgwen animal i emiin a toon memalkaan cha gwanan na diwa ra ono chiwa temok cha. Angken sema iren iyangkebaba tan iyangkekayang, sema iren babaknang tan iyangkebitheg, sema iren bagaen tan nat bagaen, pinidit to iren memalkaan. 17 Imag to man say nagwariy mebedin a menongkal ono mandeko no nat emalkaan na ngaran niwa pilmiron animal ono sema nomiro na ngaran to. 18 Mesepol a gwariy daing na too no amtaen toy banag na nomiron ma pilmiron animal tep sema nomiro, sema ngaran na sa-kin too. Et seman a nomiro, 666.