3 Gwara ngoy sa-kin kaskasdaaw a sinjal a masi-neng chiwa iyaykayang a dragon a depang tan banay a pasiya. Gwariy pithon toktok to tan sampolon sakdod to. Sema pithon toktok to, gwariy korona cha. 4 Inbaras toy ihol tod ma pasingsing cha iyaykayang, et sema ingkatdo niwa pasingsing, iya-kas ired ja dobong. Et imakgwat i dragon cha sangoanan niwa biin chanchanin man-anak say no onbo-day i nga-nga, kakanen to. 5 Idi iyan-anak iwa bii na dahi, piningil chen chakos i nga-nga, et inkayang ched kad-an Afo Chiyos a mantoktokkong cha throno tho. Tep seja nga-nga, si-katho diy mantoray na emiin a too, et sema pantoray to, mahedsang a singen barita. 6 Et sema bii, iyamtik chiwa dogad a nagwariy toon naiyan-iya-iyan, et iyan-iya-iyan chiwed kad-an na insaganen Afo Chiyos cha si-katho. Kiyajoan ched man na sandibo tan chegwen dasos tan enem a polon akow. ^a

7 Idi iyakcheng ma, gwariy kobat cha dangit. Si Michael tan sema iren echom ton anghilis, kiyobat chiy dragon, et sema dragon ngo tan sema iren echom ton ngaaw a anghilis, ekikobat ira. ^b 8 Nem sema dragon tan sema iren echom to, aagwak, isonga nat iyaytolok ma iren man-iyan cha dangit. 9 Et sema banay a dragon, iyayba-tok chiya dobong. Si-kathoy iyanparang na oleg nontan da. Iyanngaran pay na Diablo tan Satanas. Si-kathoy naenaol na emiin a tood ja dobong. Iyayba-tok chiya dobong, pati sema iren echom ton ngaaw a anghilis.

10 Et inki-ngelan koy mapkes a esel cha dangit a kigwan to i “Mimothok miy pengisalakan Afo Chiyos na tothoo to. Inbiybiy toy panakabalin ton mantoray. Tan si Criston into-no thon mengisalakan na tothoo, inbiybiy toy karebengan to. Tep si Satanas a naengipabasol iren ma aahi tayo, iyayba-tok did dobong. San-akow tan sandabi, naincharom to ired sangoanan Afo Chiyos tayo, nem niman iyayba-tok chiyay. 11 Igwak iren ma aahi tayoy Satanas babaen na chala na Ngalobon Kalniron imayos na ingkathiy to tan babaen na penistigo ra na podno maypangkep Jesu Cristo. Tep mas piyategan ches Cristo iy say biyag cha, et esagana iren metiy kagol na pamati red si-katho. 12 Isonga, panchadsak kayon emiin a naiyan-iyan cha dangit! Nem kakaasi kayon gwared dobong tan baybay tep sima-kod i Diablod ta kad-an jo. Et paladoy bonget to tep amta tho i kedpeng i oras ton ebay-anan.”

13 Idi iyamtaan na dragon i iyayba-tok cha dobong, iyosil toy biin iyan-anak niwa dahi. 14 Nem iyay-i-kanan iwa bii na chegwen payad na banay a titit say mahatayab koma, et say sema oleg a dragon, nat mebedin a chedmeten to. Timayab i biid kad-an na iyaysaganaan tod dogad a nagwariy toon naiyan-iya-iyan. Et chiwan i ekajoan to na tedo tan kagachowen tawen. 15 Inchopda na oleg i chakel a chanom a singen barakan a kolos say ma-nod iwa bii. 16 Nem etolongan i bii tep iya-nga i chaga et singen iyakmon toy chanom a inchopda na dragon. 17 Bimonget a pasiya ma dragon chiwa bii. Isonga, kiyobat to ira ma echom a aanak to. Sema iren anak to, si-kariy naengonod na bilin Afo Chiyos tan napiyetpetan chiy podnon inpaamten Jesus. 18 Et imakgwat i dragon chiwa kilig na baybay.