Sema Chegwen Iyantistigo Na Inpaamten Afo Chiyos
11
Idi iyakcheng ma, gwariy engi-kan cha si-kak na bila-jon maosal na para dohod. Kigwan tod si-kak i “Mo dohod i timplon Afo Chiyos tan altar, et bilang mo ira ma manchachayaw chiwan. 2 Nem enog i diyohod i bo-dayan na timplo. Iolay mod man tep iyay-i-kan iwan ired Gentile. Ipaskig chiy esantoan a siyodad na epat a polo tan chegwen bolan. a 3 Sema alin sandibo tan chegwen dasos tan enem a polon akow, gwara diy chegwen tistigon ito-nok chithan. b Gwariy karebengan chen mankasaba na minsahin Afo Chiyos, tan manbaro ira na saho.” c4 Sema iren chegwen tistigo, may-arig chiwa chegwen kejow a olive tan chegwen ejanan na silow cha sangoanan Afo Chiyos a Afo na emiin a tood dobong. 5 No gwariy mengiparas a menokat iren ma tistigo, onbo-day aliy afoy cha temi ra, et kolpin maomas ira ma naengontred si-kara. Sema iren mengiparas a menokat cha si-kara, sigoradon metiy iren inges niwan. 6 Sema iren chegwen tistigo, gwariy karebengan chen singen mengibengbeng na iyaykayang say nat on-oran na timpo na pankasaba ra na minsahin Afo Chiyos. Gwara ngoy karebengan chen panbalin chiy temtem na chala, et gwariy karebengan chen mengi-kan na ekila-kilasin digat cha tood dobong angken meminchakel no si-kathoy piyan cha.
7 No kekchengen niwa chegwen tistigon mengipaamta na minsahin Afo Chiyos, onbo-day i emanekot a animal chiwa echalek a ebot a nagwariy kaysespaan to, et kobathen to ira. A-gwahen to ira et bonoen to ira. 8 Et sema angel iren ma chegwen etiy, may-olig bengat ired kalsared ma banay a siyodad a iyaydansaan Criston Afo red koros. Sema siyodad, iyanngaran pay na Sodom tan Egypt tep sema iren toon naiyan-iyan chiwan, ngaaw i nainpasi-pasing chen inges toy nainpasi-pasing iren ma iyan-iyan cha Sodom tan Egypt. 9 Sema iren edafod emiin a too, emiin a tribo, emiin a ekila-kilasin esel, tan emiin a ili, boyaen cha ira ma etiy a angel na tedo tan kagachowen akow. Nat itolok chen may-ejan ira ma angel cha panchon. 10 Et sema iren nat naematin naiyan-iyan chiya dobong, onchadsak ira. Manpiyasta ira tan man-inikan ira na rigalo tep etiy ira ma chegwen profita. Tep sema iren chegwa, inpadiga-digat chen chiliy toon naiyan-iyan chiya dobong.
11 Nem nonta epalabas iwa tedo tan kagachowen akow, inpanpawil iren Afo Chiyos, et imakgwat ira. Emiin a eni-neng cha si-kara, timahot iren chili. 12 Et inki-ngelan na chegwen profitiy mapkes a esel a edafo did dangit a kigwan to i “Gomalid jay!” Et kimayang ired dangit a iyay-olop cha kolpot iy manboboya ira ma naengontred si-kara. 13 Seman met laeng a oras, gwariy mahedsang a jegjeg, et echaral i ingkasampolo niwa siyodad. Etiy i pithon dibon too kagol niwa mahedsang a jegjeg. Sema iren toon ebay-anan, timahot iren chili, et chijaw ches Afo Chiyos cha dangit kagol na banay a panakabalin to.
14 Iyakcheng miy maykadgwen emanekot a digat, nem onmothok ali no engkay i maykatdo.
Sema Maykapithon Trompita
15 Iyantrompitiy maykapithon anghil, et gwariy mapkes a ese-esel cha dangit a kigwan cha i “Manipod niman nagwariy mantoray chiya dobong malaksid si Afo Chiyos a Afo thayo tan si Criston into-no thon mengisalakan na too. Mantoray na ingked ingka.” 16 Et sema iren chegwen polo tan epat a naengibalnay a mantoktokkong cha throno red sangoanan Afo Chiyos, iyantalimohod ira et chijaw cha. 17 Kigwan cha i:
“Si Afo Chiyos a
manakabalin a
gwara nontan da
tan gwara niman,
mansalamat kawid si-kam
tep inbiybiy moy
panakabalin mo
tan inchogim a mantoray
cha dobong.
18 Sema iren nat naematid
si-kam,
paladoy bonget cha,
nem mimothok miy timpon
pengibiybiy mo na bonget
mod si-kara.
Tep niman i timpon
pengowis mo na emiin a
iyangketiy.
Niman pay i timpon
pengi-kan mo na
kongkona ired ma
bagaen mon profita
tan emiin a toom a mathekot
tan marispiktar cha si-kam,
pati sema iren
iyangkebaba
tan sema iren
iyangkekayang.
Niman i timpon
penechal mo na emiin
a enaral na tood dobong
kagol na ngaaw
a ima-imag cha.”
19 Et edohatan i timplon Afo Chiyos chiwa dangit, et masi-neng iwa baol na tolagan Afo Chiyos chiwan. Et bimakilat, kimirol, jimegjeg, tan dimanti na mapkes.