Sema Anghil Tan Otikel A Ekofikop A Papil
10
Idi iyakcheng ma, gwariy mitak a sa-kin mahedsang a anghil a mansa-sa-kod alid dangit a iyanketap na kolpot. Gwariy bolnong cha sa-pat na toktok to. Sema dopa tho, singen akow, tan sema seki tho, singen manchachalang a tohod. 2 Man-eg-egchi na otikel a papil a aokjad. Sema gwanan na seki tho, inkathin tod baybay, et sema gwilin seki tho, inkathin tod chaga. 3 Et kimeljaw, et sema esel to, inges toy mapkes a ngarednged na lion. Idi kimeljaw, gwariy pithon kirol a imesel na mapkes a simongbat cha si-katho. 4 Idi iyakcheng men kimirol, chanchanin isolat koy kigwan na kirol. Nem gwariy esel a inki-ngelan kon edafod dangit a kigwan to i “Enog i inpaamtiy kigwan na pithon kirol. Enog i insolat.” 5 Et sema mitak a anghil a man-ak-akgwat cha baybay tan chaga, inkayang toy gwanan na diwa thod dangit, 6 et iyansapathen iyosal toy ngaran Afo Chiyos a sibibiyag na ingked ingken emarsowa na dangit, dobong, baybay, tan emiin a gwared man. Insapata tho i “Sema mepesamak, nat metaktak ma.” 7 Tep no mantrompita ma maykapithon anghil, tongpalen Afo Chiyos i plano thon inpaamta tho bengat ired ma bagaen ton profita.8 Et inki-ngelan ko mowan iwa esel a edafod dangit. Kigwan tod si-kak i “Mo ala ma aokjad a papil a niyan-egchiin ma anghil a man-ak-akgwat cha baybay tan chaga.” 9 Et kimowanak chiwa anghil et inbagak iwa otikel a papil. Kigwan tod si-kak i “Alam et kakan mo. On-amis a inges toy chanom na dinowan cha temim, nem engkay onsahit i ekes mo kagol na pait to.” 10 Idak iwa otikel a papil a niyan-egchii na anghil, et kiyakan ko. On-amis nowan a singen chanom na dinowan, nem idi kiyakan ko, simahit i ekes ko. 11 Et gwariy engowan cha si-kak i “Mesepol a itoloy mon mengipaamta na mepesamak ired ma ili tan ari tan chakel a toon naimesel na ekila-kilasin esel.”