9
Et iyantrompitiy maykalimen anghil, et gwariy mitak a pasingsing a iya-kas ma did dangit chiya dobong. Sema pasingsing, iyay-i-kanan na tolbek a mandokat na bengbeng niwa echalek a ebot a nagwariy kaysespaan to. 2 Idi diyohatan toy bengbeng, biglen kimayang i asok alid ma ebot a singen asok na banay a pool. Siya-dinan na asok i akow tan iyaykayang, et bimolinget i dobong. 3 Et gwara ngo iriy choron a bimo-day chiwa asok, et iyaygwalak cha dobong. Iyay-i-kan i kabaalan chen mengedat a singen kamajan a naiyan-iyan cha dobong. 4 Binidin cha ira i nat chechalen chiy do-bet ono kejow ono sema iren nasimimit chiya dobong, no diket sekithan cha bengat ira ma toon nagwariy malken Afo Chiyos chiwa temok cha. 5 Nat iyaytolok ira ma choron a menono iren ma too, no diket pesekithan cha ira bengat na dimen bolan. Et sema sahit na kalat cha, onsahit a chilin inges toy sahit na kalat na kamajan. 6 Sema dimen bolan, mas piyan na toon chilin metiy, nem nat mebedin. Piyan chen pasiyen metiy, nem ontolo-toloy iren manbiyag ngorechan.7 Sema kasi-neng na choron, singen kabajon naiyansahayan iren ma naekikobat. Chiwa toktok cha, gwariy singen koronen aamag na balitok. Sema dopa ra, singen dopa na too. 8 Sema bowek cha, singen bowek na bii, tan sema sangi ra, singen sangi na lion. 9 Naesa-dinan i pahow cha na singen danchok. Sema palakpak na payad cha, inges toy mapkes a notheng na chakel a kariton a nakiyojod na kabajon mapkes a manbebtik cha kobathan. 10 Sema ihol cha, gwariy kalat ton singen kamajan, et sema kabaalan chen menekit na too na dimen bolan, gwared ihol cha. 11 Gwariy ari chen naiyantoray iren man. Si-kathoy anghil a naiyantoray na echalek a ebot a nagwariy kaysespaan to. Say ngaran tod ma esel na Hodjo, si Abaddon, tan chiwa esel na Greek, si Apollyon a say banag to, sema Naenaral.
12 Iyakcheng miy pilmiron emanekot a digat, nem gwara pay nin i chegwen onmothok ali.
13 Et iyantrompita ma mayka-nem a anghil, et inki-ngelan koy esel a edafo did epat a sohong na ebalitohan a altar a kad-an na sangoanan Afo Chiyos. 14 Sema imesel, kigwan tod ma mayka-nem a anghil a man-eg-egchi na trompita i “Ibolos mo ma epat a anghilis a iyay-iket chitha kilig na banay a kolos a Euphrates.” 15 Iyaybolos ira ma epat a anghilis tep iyaysagana ira para chiya kosto-koston oras tan akow tan bolan tan tawen say bonoen chiy ingkatdo na tood dobong. 16 Et sema iren solcharo chen naiyansahay na kabajo, inki-ngelan koy kabibilang chen 200,000,000.
17 Inges niyay i kasi-neng iren ma kabajo tan sema iren iyansahay ired man a iyaybiybiy cha si-kak cha singen kokip. Sema sa-din na pahow iren ma iyansahay, gwariy tedon color ton depang a singen afoy, blue a singen iyaykayang, tan yellow a singen sulfur. a Sema iren toktok na kabajo, singen inges toy toktok na lion, tan manbo-bo-day cha temi riy afoy, asok, tan manchachalang a sulfur. 18 Etiy i ingkatdon tood dobong kagol na tedon diga-digat a afoy, asok, tan sulfur a manbo-bo-day cha temi iren ma kabajo. 19 Tep sema kabaalan iren ma kabajon memono, gwared temi tan ihol cha. Et sema ihol cha, singen oleg tep gwariy toktok chen mebedin a mengedat, et seman i naiyosal chen menekit na too.
20 Nem sema iren ebay-anan a toon nat etiy kagol niwa diga-digat, eg ira pay nin iyanbabawi, tan eg cha binekan a manchejaw na sinan chiyos a imag cha. Eg ira simalcheng a manchejaw na dimonyos tan sinan chiyos a aamag na balitok, silbir, bronze, batho, tan kejow. Intolo-toloy chen manchejaw iren ma sinan chiyos angken sema iren sinan chiyos, nat mahasi-neng tan mahaki-ngel tan mahaahad. 21 Nat iyanbabawi ira na ngaaw a naima-imag chen inges toy pemono, pena-gway na ngaaw a ispiritos, penarog na nat imbaliy cha, tan pengibot.