Sema Pengkal Na Maykapithon Engipket Na Ekofikop A Papil
8
Idi ingkal niwa Ngalobon Kalniroy maykapithon engipket na ekofikop a papil, nagwaren polos i esel cha dangit na kagachowa na oras. 2 Et mitak i pithon anghilis a naimakgwat cha sangoanan Afo Chiyos. Iyay-i-kanan i sa-ki tan sa-kin anghilis na trompita.3 Gwara diy sa-kin anghil a mimothok a man-eg-egchi na ebalitohan a ejanan na insinso, et kimowan a imakgwat cha kad-an na ebalitohan a altar a iyaysangod thronon Afo Chiyos. Chakel i insinson iyay-i-kan cha si-katho say iechom tod karkararag na emiin a toon Afo Chiyos et say itangdal tod ma ebalitohan a altar. 4 Et sema asok na insinson edafo did ma ejanan a iyagchian na anghil, iyay-echom ired ma karkararag na toon Afo Chiyos a mankakayang cha sangoanan Afo Chiyos. 5 Et ida na anghil iwa ejanan na insinso, et pino tho na manchachalang a kosang a edafod ma altar, et inba-tok tod dobong. Et biglen gwariy kirol, mapkes a notheng, ki-dat na bakilat, tan jegjeg.
Sema Pithon Trompita
6 Et insagana iren ma pithon anghilis a mantrompita. 7 Iyantrompitiy pilmiron anghil, et imoran na mapkes cha dobong na danti tan afoy a iya-choman na chala. Et sema ingkatdo na dobong, kolpin epoolan, tan sema ingkatdo na kejow, kolpin epoolan, tan emiin a do-bet, kolpi ngon epoolan.
8 Et iyantrompitiy maykadgwen anghil, et gwariy singen banay a chontog a emangkapoolin iyayta-boy cha baybay. Et sema ingkatdo na baybay, iyanbalin na chala. 9 Sema ingkatdo na sibibiyag cha baybay, iyangketiy. Tan sema ingkatdo na bapor, iyangkecharal.
10 Iyantrompitiy maykatdon anghil, et biglen gwariy banay a pasingsing a manchachalang a singen silow. Iya-kas alid dangit, et simeped ma ingkatdo na kolos tan temtem. 11 Say ngaran niwa pasingsing, si Wormwood a enpait i banag to. a Pimait i ingkatdo niwa chanom, et etiy i chakel a too tep ininom cha man a chanom a pimait.
12 Iyantrompitiy mayka-pat a anghil, et iyaypontay ingkatdo na akow, bolan, tan pasingsing say iya-chep i ingkatdo na silow cha. Isonga, nagwariy silow chiwa ingkatdo na kaakawan, tan nagwara ngoy silow chiwa ingkatdo na kalebian.
13 Et mitak i banay a titit a mantatayab cha iyaykayang. Inki-ngelan kon mankelkeljaw i “Kakaasi! Kakaasi! Kakaasiy toon man-iiyan cha dobong kagol na emanekot alin mepesamak cha si-kara no mantrompita iriy kaonoran a tedon anghilis!”