Sema 144,000 A Toon Afo Chiyos
7
Idi iyakcheng iwan, gwariy mitak a epat a anghilis a man-ak-akgwat chiwa epat a soli na dobong. Chiyan sa-dini ma epat a naedafoan na chahem say nagwariy chahem a onsipok cha dobong ono baybay ono angken sa-kin kejow. 2 Et mitak i sa-kin anghil a mankakayang chiwa bosakan a engegchi na para malken maosal cha panmalka iren ma ematid sibibiyag a Afo Chiyos. Kimeljaw iwa anghil ired ma epat a anghilis a in-i-kanan Afo Chiyos na karebengan chen menechal na dobong tan baybay. 3 Kigwan tod si-kara i “Enog i chichal i dobong ono baybay ono kejow-kejow ingkathod memalkaan ma ira ma temok na naiyansilbid Afo Chiyos tayo.” 4 Et inki-ngelan koy bilang na toon emalkaan. 144,000 i bilang cha. Sema iren emalkaan, poli-poli iren ma sawal na chegwen anak Israel:5 12,000 ira ma emalkaan a poli-polin Judah,
12,000 a poli-polin Reuben,
12,000 a poli-polin Gad,
6 12,000 a poli-polin Asher,
12,000 a poli-polin Naphtali,
12,000 a poli-polin Manasseh,
7 12,000 a poli-polin Simeon,
12,000 a poli-polin Levi,
12,000 a poli-polin Issachar,
8 12,000 a poli-polin Zebulun,
12,000 a poli-polin Joseph,
12,000 a poli-polin Benjamin.
9 Idi iyakcheng iwan, mitak i chakel a toon nat mebedin a mebilang. Edafo ired emiin a ili, emiin a tribo, emiin a too, tan emiin a ekilasi-kilasin esel. Man-ak-akgwat ired sangoanan na throno tan sema Ngalobon Kalniro. Iyanbaro ira na edayad a polaw, tan iyagchian chiy bolong na niyog a mengibiybiy na chadsak cha. 10 Kimeljaw iren kigwan cha i “Maychejaw si Afo Chiyos tayon mantoktokkong cha throno tan Ngalobon Kalniro tep si-kariy engisalakan cha si-kathayo!” 11 Emiin a anghilis, imakgwat iren dinikmot chiy throno tan sema chegwen polo tan epat a naengibalnay tan sema epat a sibibiyag a parsowa. Et iyantalimohod ira ma anghilis cha sangoanan niwa throno et chija-chijaw ches Afo Chiyos. 12 Kigwan cha i “Amen! Chejawen tayos Afo Chiyos. Tep banay i kinadaing tan chayaw tan karebengan tan panakabalin to. Iki-tek tayo tan ikayang tayo. Mansalamat kiyed si-katho na ingked ingka! Amen.”
13 Et inbaga na sa-kin naengibalnay cha si-kak i “Amtam no siya ira ja toon iyanbaro na polaw? Amtam no toy edafoan cha di i?”
14 Insongbat ko i “Afo, nat amtak, nem si-kam i mahaamta.” Kigwan na naengibalnay cha si-kak i “Si-kariy toon iyanda-kam na timpo na emanekot a pandigat. Indaba riy baro red chala na Ngalobon Kalniro, et pimolaw ma.
15 Isonga naimakgwat ired ma
sangoanan na thronon
Afo Chiyos
et naiyansilbi ired si-kathod
timplo tho na san-akow tan sandabi.
Sema mantoktokkong chiwa throno,
nakiyadgwaan to ira tan
nakiyajoan to ira.
16 Eg ma ira maopa ono ma-kow.
Eg ma ira mandigat kagol na
akow ono petang na
kairi-irin.
17 Tep sema Ngalobon Kalniron
man-as-askang chiwa throno,
kajoan to ira et
ibalnay to ired temtem a
naedafoan na chanom a
mengi-kan na biyag a nagwariy pengingkaan to.
Et ponasan Afo Chiyos i
emiin a saya-saya ra.”