3 Idi ingkal na Ngalobon Kalniroy maykadgwen engipket na ekofikop a papil, inki-ngelan koy esel na maykadgwen sibibiyag a parsowen kigwan to i “Gwali wa!” 4 Et gwariy iyanparang a sa-kin kabajon depang a chili. Sema iyansahay chiwan, iyay-i-kanan na karebengan ton mengkal na talned dobong say mankinobat i too et say manbinono ira. Iyay-i-kanan iwa iyansahay ngo na enchokiy a ispada.

5 Idi ingkal na Ngalobon Kalniroy maykatdon engipket na ekofikop a papil, inki-ngelan koy esel na maykatdon sibibiyag a parsowen kigwan to i “Gwali wa!” Idi sini-neng ko, gwariy mitak a etoling a kabajo. Sema iyansahay chiwan, iyagchian toy kiloan. 6 Et inki-ngelan koy singen esel a edafod kawa na epat a sibibiyag a parsowa. Kigwan to i “Gwara diy bithil chiya dobong. Sema dagbo na too na san-akow, on-anay bengat cha sa-kin kilon wheat ono tedon kilon barley. ^a Nem enog i chichal i maltiha tan chanom na grape.”

7 Idi ingkal na Ngalobon Kalniroy mayka-pat a engipket na ekofikop a papil, inki-ngelan koy esel na mayka-pat a sibibiyag a parsowen kigwan to i “Gwali wa!” 8 Idi sini-neng ko, gwariy mitak a imopsat a kabajo. Sema iyansahay chiwan, si Pathiy i ngaran to, tan sema naengonod cha si-katho, iyanngaran na Hades a kawad-an na iyangketiy. Iyay-i-kanan ira na karebengan chen memono na ingka-pat na tood dobong babaen na kobat, bithil, sahit, tan athap a animal.

9 Idi ingkal na Ngalobon Kalniroy maykalimen engipket na ekofikop a papil, mitak cha chalem na altar iriy ispiriton toon biyono-bono ra kagol na inpamati red ma esel Afo Chiyos tan inpanistigo ra maypangkep na inpaamten Jesu Cristo. 10 Kimeljaw iren kigwan cha i “O, Afo Chiyos a manakabalin, esantoan ka tan naepiyal ka. Sa-noy kebejag na panseked mi? Empiyan aliy timpon pengowis mo iren ma tood ja dobong tan panchosam cha si-kara kagol na emonoan ched si-kawi?” 11 Et iyay-i-kanan i sa-ki tan sa-ki na baron edayad a polaw, et kigwan ched si-kara i man-inana pay nin ira ingkathod megchengan wiy bilang na aahi ren mansilsilbid Afo Chiyos a bonoen chen inges toy inpamono red si-kara.

12 Et biyantayan ko iy maramen ingkal na Ngalobon Kalniroy mayka-nem a engipket na ekofikop a papil, et biglen gwariy mahedsang a jegjeg. Bimolinget i akow a singen etoling a dofot, tan sema bolan, dimepang a singen chala. 13 Sema iren pasingsing cha iyaykayang, iya-kas ired dobong a singen ma-ten dawes a ma-kas no gwedgweren na mapkes a chahem i kejow to. 14 Aomas i iyaykayang a singen papil a ekofikop, tan emiin a chontog tan dogad a dinikmot na baybay, ebegnad ired kad-an cha. 15 Timahot a emiin i tood dobong. Sema iren ari tan echom a toon gwariy karebengan ton mantoray, ainportantin too, naengibalnay na solcharo, babaknang a too, toon naepati, tan emiin a echom a too, angken bagaen ono enchi, iyan-emot ired dohang tan chiwed ma batho-bathod chonchontog. 16 Et iyadok cha ma chonchontog tan batho-batho i “Pangaasi yo, ka-kas kayo di et sa-dini yo kawi say nat si-nengen to kawi na mantoktokkong cha throno, tan say nat da-kaman miy bonget na Ngalobon Kalniro. 17 Tep mimothok miy emanekot a akow na penosa red si-kawi, et nat mahamingel min agpayso!”