Sema Ekofikop A Papil Tan Ngalobon Kalniro
5
Et mitak iwa mantoktokkong cha thronon man-eg-egchi na ekofikop a papil cha gwanan na diwa tho. Sema papil, gwariy solat chiwa iyanpiniig, tan gwariy pithon engipket niwan say nat mebedin a maokjad. 2 Gwara ngoy mitak a mahedsang a anghil a kimeljaw a kigwan to i “Siyay iyaykarin mengkal niwa engipket na papil say maokjad?” 3 Nem nagwariy esafol cha dangit ono cha dobong ono cha chalem na dobong a kawad-an na iyangketiy a iyaykarin mengkal iren ma engipket na papil say mebesiy iyaysolat chiwan. 4 Nimangi-nangisak tep nagwariy esafol a iyaykarin mengkal niwa engipket na papil say maokjad, et say mebesa ma iyaysolat chiwan. 5 Et kigwan na sa-kin ma naengibalnay cha si-kak i “Enog i nangis. Si-neng mo. Aman aliy iyanngaran na Lion a iyaybilang cha tribon Judah a poli ngon David. Si-kathoy engagwak Satanas, isonga iyaykarin mengkal niwa pithon engipket na papil et okjaren to.”6 Nonta kigwan na naengibalnay iwan, mitak i Ngalobon Kalniron man-ak-akgwat cha askang na throno.a Sema epat a sibibiyag a parsowa tan sema chegwen polo tan epat a naengibalnay, dinikmot cha. Sema kasi-neng niwa Ngalobon Kalniro, singen biyono ra. Gwariy pithon sakdod to tan gwara ngoy pithon matha tho. b Sema banag na pithon matha tho, sema Ispirito Santon gwariy pithon pesing ton pengibiybiy na panakabalin ton iyayto-nod emiin a doga-dogad chiyed dobong. 7 Kimowan iwa Ngalobon Kalnirod ma mantoktokkong cha throno, et ida thoy ekofikop a papil cha gwanan na diwa tho. 8 Nonta ida tho ma papil, sema epat a sibibiyag a parsowa tan sema iren chegwen polo tan epat a naengibalnay, iyantalimohod ired sangoanan to. Et sa-ki tan sa-kin naengibalnay, man-eg-egchi ira na kalchang tan ebalitohan a malokong a iyapno na insinson kararag na tothoon Afo Chiyos. 9 Et iyankansiyon ira na badon kansiyon a kigwan cha i:
“Si-kam i iyaykarin mengeda na ekofikop a papil,
et a-kalen moy engipket niwan say maokjad.
Tep biyono raka, et babaen na chalam a imayos nonta etiy ka,
gwariy iyaydibchi say manbalin iren toon Afo Chiyos.
Sema iren too, naedafo did emiin a tribo, emiin a ekila-kilasin esel,
emiin a too, tan emiin a ili.
10 Inpanbalin mo iren ari say mekitoray ired si-kam
chiyed dobong,
et inpanbalin mo ngo iren pari say mansilbi ired Afo Chiyos tayo.”
11 Et sini-neng ko mowan et inki-ngelan koy esel na dinibon anghilis a nat mebedin a mebilang. Dinikmot chiy throno tan epat a sibibiyag a parsowa tan chegwen polo tan epat a naengibalnay. 12 Kimeljaw iren kigwan cha i:
“Sema Ngalobon Kalniron biyono ra, iyaykarin mechejaw.
Tep banay i karebengan tan kinabaknang
tan kinadaing tan panakabalin to.
Sapay koma mecheja-chejaw tan maykaya-kayang
tan mayki-ki-tek!”
13 Et inki-ngelan koy panchejaw na emiin a eparsowed dangit tan cha dobong tan cha chalem na dobong a kawad-an na iyangketiy tan cha baybay. Sema emiin a eparsowa, chiyan kona i “Sapay koma sema mantoktokkong cha throno tan sema Ngalobon Kalniro, mayki-ki-tek tan mecheja-chejaw tan maykaya-kayang na ingked ingka tep sema panakabalin cha, nagwariy kay-ingesan to!” 14 Et sema epat a sibibiyag a parsowa, nakigwa-kigwan cha i “Amen!” Et sema iren chegwen polo tan epat a naengibalnay, iyantalimohod ira mowan tan chijaw chiy Ngalobon Kalniro tan sema mantoktokkong cha throno.