22
Et inbiybiy na anghil cha si-kak i kolos a naengi-kan na biyag. Sema kolos, manboningning a singen salming. Edafo did ma thronon Afo Chiyos tan Ngalobon Kalniro, 2 et imayos cha kawa na kalsara niwa siyodad. Chiwa iyanpiniig na kolos, gwara ngoy kejow a naengi-kan na biyag. Sema iren kejow, naeminsawal na chegwa na dawes na mahatawen a piyan ton a-seden i ondawes na biyodan. Tan sema bolong cha, naaosal na agas na tood emiin a ili say nat mansekit ira. 3 Nagwara wiy chosen Afo Chiyos. Tep sema thronon Afo Chiyos tan Ngalobon Kalniro, gwared ma siyodad, tan sema iren naiyansilbid Afo Chiyos, chejawen cha. 4 Metaen chiy dopa tho, tan maysolat i ngaran tod temok cha. 5 Nagwara wiy dagwi, tan nat mesepol miy silow na dampa ono akow tep si Afo Chiyos i silow cha di. Et sema iren tothoon Afo Chiyos, mantora-toray ira na ingked ingka.6 Et kigwan na anghil cha si-kak i “Naepiyal tan podno ira ja ese-esel. Si Afo Chiyos a naengipatorong na profited Ispirito Santo, into-no thoy anghil ton mengipaamted si-kayon naiyansilbid Afo Chiyos na mesepol a mepesamak no engkay.”
Sema Pan-odi Din Jesus
7 Kigwan Jesus i “Ki-ngeli yo. Onmothohak ali no engkay. Magesat i naengonod na iyaypaamted ja dibcho.”
8 Si-kak a si John, si-kak i engi-ngel tan eni-neng iren jay. Idi inki-ngelan ko ira jay tan sini-neng ko ngo, iyantalimohorak cha sangoanan na anghil a engibiybiy cha si-kak say chejawen ko. 9 Nem kigwan tod si-kak i “Enog i imag iwan! Tep naiyansilbiak cha Afo Chiyos a inges mo tan sema iren aahim a profita tan sema iren naemati na ese-esel chiya dibcho. Si Afo Chiyos bengat i cheja-chejawen mo koma.”
10 Et kigwan ngo na anghil cha si-kak i “Enog i in-emot i iyaypadtod ja dibcho tep chanchani diy timpon kepesamak ali chen jay. 11 Nem no onmothok iwa timpo, sema toon ngaaw, itolo-toloy ton mengemag na ngaaw, tan sema toon ensekig, itolo-toloy ton mengemag na ensekig. Sema too ngon maronong, itolo-toloy ton mengemag na mapteng, tan sema toon esantoan, itolo-toloy ton mengonod na esantoan a panbiyag.”
12 Kigwan Jesus i “Ki-ngeli yo. Onmothohak ali no engkay. Et itahin koy kongkonak say i-kan kod sa-ki tan sa-kin iyaybagay chiwa ima-imag to. 13 Si-kak i Alpha tan Omega. Si-kak i pilmiro tan kaonoran. Si-kak i kapoanan tan pengingkaan.”
14 Magesat ira ma toon naiyandaba na baro ra tep gwariy karebengan chen onsekep chiwa siyodad babaen na pasbol to tan gwara ngoy karebengan chen mengan niwa dawes na kejow a naengi-kan na biyag. 15 Nem sema iren naengamag na ngaaw, mebay-anan ired ma awas na siyodad. Sema iren naena-gway na ngaaw a ispiritos, sema iren naenarog na nat imbaliy cha, sema iren naemono, sema iren naiyanchayaw na sinan chiyos, tan sema iren naiyan-itek, nat mahasekep ired ma siyodad.
16 Et kigwan ngon Jesus i “Si-kak a si Jesus, into-nok i anghilis kon mengowan cha si-kayo iren jay say ipaamta yod emiin a gropon naemati. Si-kak i podnon polin David. Si-kak i manihal a agsapen pasingsing.”
17 “Gomali,” kigwan na Ispirito Santo tan emiin a toon Afo Chiyos a may-arig cha biin imbaliyen na Ngalobon Kalniro. Sema mengi-ngel iren ja ese-esel, konen to ngo koma i “Gomali.” Sema iya-kow, onkowan koma ngo di say menginom na chanom a naengi-kan na biyag a dibchid emiin a mahapiyan.
Sema Kaonoran Na Solat
18 Si-kak a si John, kowan banchaanin emiin i manki-ngel na padton iyaysolat chiya dibcho. No gwariy mengchom chiya iyaysolat, iechom ngon Afo Chiyos cha si-kathoy diga-digat a kigwan tod ja dibcho. 19 No gwariy mengkal cha iyaypadtod jay, a-kalen ngon Afo Chiyos i karebengan ton mengan niwa dawes na kejow a naengi-kan na biyag tan karebengan ton onsekep cha esantoan a siyodad a kigwan tod ja dibcho.
20 Si Jesus a iyantistigo i podno ira jay ket, kigwan to ngo i “Sigoradon onmothohak ali no engkay.”
Sapay koma metongpal iwan. Gomali, Jesus a Afo thayo!
21 Sapay koma gwariy kaasin Jesus a Afo thayod si-kayon emiin a toon Afo Chiyos. Amen.