2 “ ‘Amtak a emiin i naima-imag jo. Amtak i masdo kayon man-obda tan naiyanosan joy diga-digat kagol na pamati yod si-kak. Nakiyontra yo iriy toon naiyantoro na nat podno. Piyarasan jo ira ta toon naengowan i apostolis ira kono, et iyamtaan jo i man-ite-itek ira. 3 Amtak i agpayson naemasig kayon memati tan aanos kayo nonta edigathan kayo kagol cha si-kak. Eg jo binekan i pamati yo.

4 “ ‘Nem gwariy ibasolan kod si-kayon sema semek jod si-kak tan echom jo niman, nat inges toy semek jo nonta inchogi yon memati. 5 Nemnem joy banay a semek jod si-kak tan echom jo nontan. Panbabawi kayo say a-magen jo mowan i mapteng a inges toy naima-imag jo nonta inchogi yon memati. Tep no eg kayo manbabawi, onkowanak ded tan, et a-kalen koy ejanan na silow jod kad-an to. 6 Nem gwariy naimag jon mapteng a naiyowes joy naima-imag iren ma naengonod Nicolas, et setan i naiyowes ko ngo. ^a

7 “ ‘Si-kayon manki-ki-ngel, nemnem jon pasiyay niyankona na Ispirito Santod emiin a naematid Cristo. Sema toon naigwak toy ngaaw, i-kanan ko na karebengan ton mengan na dawes na kejow a naengi-kan na biyag. Et sema kejow, gwared Paradison kad-an Afo Chiyos.’ ”

8 Et kigwan pay Jesu Cristo i “Isolat moy konen kod si-kam, et ipaw-it mod ma anghil a naiyanbantay iren ma naematin naesa-sa-nop a manchejaw cha Smyrna. Kowan mo i ‘Si-kak i pilmiro tan kaonoran na emiin. Si-kak i etiy et iyanpawil. Gwariy konen kod si-kayod ta Smyrna.

9 “ ‘Amtak i emangkedigathi kayo tan amtak i ebitheg kayo. Nem say podno, baknang kayo kagol na pamati yod si-kak. Amtak pay i naiyomang cha kayo na Hodjos. Nakigwan cha i si-kariy toon Afo Chiyos tep Hodjos ira, nem nat podno man. Too kitdi iren Satanas. 10 Enog i taho-tahot na digat a chanchanin onmothok cha si-kayo. Iki-ngeli yo! Pechasen to kayo na Diablo tep piyan ton mechechal i pamati yo. Ipakalebos toy echom cha si-kayo, tan medigathan kayo na sampolon akow. Nem angken no bonoen cha kayo, petpeti yoy pamati yo, et i-kanan tahejo na kongkonen biyag a nagwariy pengingkaan to.’

11 “ ‘Si-kayon manki-ki-ngel, nemnem jon pasiyay niyankona na Ispirito Santod emiin a naematid Cristo. Sema toon naigwak toy ngaaw, nat da-kamen toy maykadgwen pathiy a chosen nagwariy pengingkaan to.’ ”

12 Et kigwan pay Jesu Cristo i “Isolat moy konen kod si-kam, et ipaw-it mod ma anghil a naiyanbantay iren ma naematin naesa-sa-nop a manchejaw cha Pergamum. Kowan mo i ‘Si-kak i gwariy ispada thon chegwen tarem ton maritem. Gwariy konen kod si-kayod ta Pergamum.

13 “ ‘Amtak i naiyan-iyanan jo. Chithan i naiyantorayan Satanas. Nem angken naiyantoray si Satanas chithan, naemasig kayo pay a mematid si-kak tan nat binekan joy pamati yo. Intolo-toloy jon memiyal cha si-kak angken nonta biyono res Antipas chitha kad-an jon naiyantorayan Satanas. Biyono ra tep naepiyal a mankasaba maypangkep cha si-kak.

14 “ ‘Nem gwariy otik a ibasolan kod si-kayon gwariy echom cha si-kayon naengonod na toro-toron Balaam. Nontan da intoron Balaam cha Balak i pesing ton menolisog iren ma poli-polin Israel. Isonga, mebedin a igwis iren Balak i mengan ira na mekan a iyaytangdal cha sinan chiyos tan menechog ira na nat imbaliy cha. ^b 15 Singen inges joy poli-polin Israel a esaol et iyanbasol tep gwariy echom cha si-kayon naengonod na ngaaw a toro-toron Nicolas. ^c 16 Isonga panbabawi kayo tep no nat manbabawi kayo, onkowanak ded tan no engkay et kobathen ko ira ma naiyanbasol chithan a osalen koy ispaden onbo-day cha temik. ^d

17 “ ‘Si-kayon manki-ki-ngel, nemnem jon pasiyay niyankona na Ispirito Santod emiin a naematid Cristo. Sema toon naigwak toy ngaaw, i-kanan ko na mekan a iyanngaran na manna a nat mebedin a mesi-neng. I-kanan ko ngo na polaw a bathon kaysolathan na badon ngaran, et nagwariy mengamten ma ngaran, malaksid niwa toon may-i-kanan.’ ”

18 Et kigwan pay Jesu Cristo i “Isolat moy konen kod si-kam, et ipaw-it mod ma anghil a naiyanbantay iren ma naematin naesa-sa-nop a manchejaw cha Thyatira. Kowan mo i ‘Si-kak i Anak Afo Chiyos a singen birangdang a afoy i mathak tan singen bronze a mandingsiy sekik. Gwariy konen kod si-kayod ta Thyatira.

19 “ ‘Amtak a emiin i naima-imag jo. Amtak i semek jo tan pamati yo, sema pansilbi yo ired ma echom jo, tan sema anos jo na diga-digat. Amtak ngo i sema naima-imag jo niman, mas mapmapteng iy say sema naima-imag jo nonta inchogi yon memati.

20 “ ‘Nem gwariy ibasolan kod si-kayon intolok jon mayka-chom cha si-kayo ma biin singen si Jezebel a enaol iren ma tothoo na Israel nontan da. ^e Nakigwan to i profita kono, nem ngaaw i naintoro tho. Tep naiyawis to ira ma naiyansilbid si-kak a menechog na nat imbaliy cha tan mengan na iyaytangdal cha sinan chiyos. 21 Iyanseke-sekerak na panbabawi to na basol to, nem eg to piyan a onsalcheng a menechog iren ma nat imbaliy to. 22 Isonga, ipasahit kon chili ta bii say nat mahabangon cha katiri tho. Sema iren naenarog cha si-katho, no nat manbabawi ira na ensekig a naima-imag ched si-katho, pedigathan ko ngon chili ira. 23 Sema iren singen aanak niwa biin naengonod na toro-toro tho, bonoen ko ira. Et emiin a naematid si-kak, amtaen cha i si-kak i naiyandoktal na nemnem tan kamkam na too. I-kanan koy sa-ki tan sa-kid si-kayo na maybagay chiwa ima-imag jo.

24 “ ‘Nem sema echom maled si-kayod ta Thyatira, eg jo iyonoran ira ma ngaaw a toro-toro niwa bii, tan eg jo ngo iyachal i nakigwan cha i echalek a toro-toron Satanas. Isonga, say konen kod si-kayo, nat menobtobak chiwa bili-bilin a naiyonoran jo wa. 25 Konen ko bengat i itoloy jon petpetan i pamati yo ingkathod on-oliak ded tan.

26 “ ‘Sema toon naigwak toy ngaaw a mengitolo-toloy a mengonod na bili-bilin ko ingkathod on-oliak mowan ded tan, i-kan koy karebengan ton mantoray cha chakel a siyodad. 27 Sema karebengan ton mantoray, inges toy karebengan kon mantoray a in-i-kan Awak. ^f Tan sema pantoray niwa too, mahedsang alin inges toy barita, et sema iren naengontred si-katho, kolpin mechechal ira a inges toy bangen ebosak. 28 I-kanan ko ngo niwa agsapen pasingsing. ^g

29 “ ‘Si-kayon manki-ki-ngel, nemnem jon pasiyay niyankona na Ispirito Santod emiin a naematid Cristo.’ ”