“ ‘Amtak a emiin i naima-imag jo. Amtak i nakigwan na tothoo i sibibiyag kayo, nem say podno, etiy kayo. 2 Pantanchaan kayo! Pekedsang joy pamati yon ebay-anan a chanchanin onsalcheng. Tep amtak i sema iren naima-imag jo, gwariy kolang tod nemnem Afo Chiyos. 3 Nemnem jo ma podnon toro-toron inki-ngelan jo tan piyati yo nontan. Petpeti yo ira man tan panbabawi kayod basol jo. Tep no eg jo a-magen iwan, onkowanak ded tan a menosa cha si-kayo. Nat amtaen jo i oras na imothok kod tan tep onmothohak a singen mahibot na kalebian.

4 “ ‘Nem ithan pay i otikel cha si-kayod ta Sardis a nat engithian i baro ra. Kadgwaan chaak tan manbaro ira na polaw tep maykari iren mayka-chom cha si-kak.

5 “ ‘Sema toon naigwak toy ngaaw, manbaro ngo na polaw. Ekak oma-omasen i ngaran tod ma dibchon iyaysolathan na ngaran iren ma gwariy biyag chen nagwariy pengingkaan to. Tistigoan ko i took iwan cha sangoanan Awak tan anghilis to. 6 Si-kayon manki-ki-ngel, nemnem jon pasiyay niyankona na Ispirito Santod emiin a naematid Cristo.’ ”

7 Et kigwan Jesu Cristo i “Isolat moy konen kod si-kam, et ipaw-it mod ma anghil a naiyanbantay iren ma naematin naesa-sa-nop a manchejaw cha Philadelphia. Kowan mo i ‘Si-kak i esantoan tan podno. Naiyagchian koy tolbek na siyodad David. ^a No dohatan ko, nagwariy mahabengbeng niwan, tan no ibengbeng ko, nagwariy mahadohat niwan. Gwariy konen kod si-kayod ta Philadelphia.

8 “ ‘Amtak a emiin i naima-imag jo. Amtak i otikel bengat i kabaalan jo, nem angken setan, naima-imag jo pay i inbili-bilin ko, tan nat iyandibak kayo i naemati kayod si-kak. Iyandohatak na bengbeng a seskepan jo, et nagwariy mahabengbeng niwan.

9 “ ‘Iki-ngeli yo. Gwariy Hodjos chithan a naengowan i too iren Afo Chiyos, nem nat podno man. Naiyan-itek ira. Too iren Satanas. Pantalimohod ko ired sangoanan jo, et amtaen cha i si-kayoy ensemek ko. 10 Piyati yoy bilin kon man-anos kayo na diga-digat jo. Isonga, bantayan tahejo no onmothok i timpo na emanekot a pandigat chiya intiron dobong. Sema timpo, si-kathoy timpo na kepechas na emiin a tothood dobong. 11 Chanchani diy timpo na imothok ko. Isonga, petpeti yoy pamati yo say nagwariy mengkal na koronen kongkonaen jo.

12 “ ‘Sema toon naigwak toy ngaaw, panbalin kon singen tohod na timplon Afo Chiyos. On-onong chiwan na ingked ingka. Solathan koy angel to na ngaran Afo Chiyos ko tan ngaran na siyodad Afo Chiyos a badon Jerusalem a onsa-kod alid Afo Chiyos kon gwared dangit. Solathan ko pay i angel to na badon ngaran ko. 13 Si-kayon manki-ki-ngel, nemnem jon pasiyay niyankona na Ispirito Santod emiin a naematid Cristo.’ ”

14 Et kigwan Jesu Cristo i “Isolat moy konen kod si-kam, et ipaw-it mod ma anghil a naiyanbantay iren ma naematin naesa-sa-nop a manchejaw cha Laodicea. Kowan mo i ‘Si-kak i iyanngaran na Amen. Naepiyalak tan podnoy emiin a nainpaamtak maypangkep Afo Chiyos. Si-kak i edafoan na emiin a piyarsowen Afo Chiyos. Gwariy konen kod si-kayod ta Laodicea.

15 “ ‘Amtak a emiin i naima-imag jo. Nakigwan jo i naemati kayod si-kak, nem nat ainposoan i pemati yo. Singen inges joy petang a chanom a manchochogin onteg-in a nat petang a chili tan nat teg-in a chili. Say piyan ko, petang kayo koma. Nem nat petang kayo, magangkana no teg-in kayo. ^b 16 Kagol na singen chanom kayon nat petang tan nat teg-in, ichopda tahejo. 17 Nakigwan jo i baknang kayo tan siya-sa-nop joy chakel a kokowa tan nagwariy mesepol jo. Nem say podno, kakaasi kayo. Ebitheg kayo, ekorab kayo, tan iyandagos kayo. 18 Isonga, bidinen tahejon menongkal cha si-kak na balitok a iyanbalin na porod afoy say agpayson onbaknang kayo. Menongkal kayo komed si-kak na polaw a baro say mebaroan kayo et say nat onbaing kayo. Menongkal kayo pay komed si-kak na agas say ma-kasan i matha yo et say mahasi-neng kayo.

19 “ ‘Emiin a ensemek ko, nainbonget ko ira tan nachiyosak ira no ngaaw i a-magen cha. Isonga, pemasig kayon mengonod na toro-torok tan panbabawi kayod basol jo. 20 Iki-ngeli yo. Man-ak-akgwathak cha bengbeng a mantoktoktok. No gwariy mengi-ngel na esel ko et dokathan toy bengbeng, onsekepak tan mekipanganak cha si-katho.

21 “ ‘Sema toon naigwak toy ngaaw, i-kan koy karebengan ton mekitokkong cha si-kak a mantoray. Inges toak ngon igwak kos Satanas, et niman mekitoktokkongak cha Awak a mantoray. 22 Si-kayon manki-ki-ngel, nemnem jon pasiyay niyankona na Ispirito Santod emiin a naematid Cristo.’ ”