Sema Inpaamten Jesu Cristod John
Sema Kapoanan Na Solat
1
Sema iyaysolat chiya dibcho, si-kathoy inpaamten Jesu Cristo maypangkep na chanchani din mepesamak. Si Afo Chiyos i engipaamted Cristo say ipaamten Cristo ired ma toon Afo Chiyos a bagaen to. Isonga, into-non Cristoy anghil ton mengipaamted si-kak a si John a bagaen Cristo. 2 Insolat kon emiin iwa iyaybiybiy cha si-kak, et paneknekan ko i sejay iriy podnon ese-esel Afo Chiyos a inpaamten Jesu Cristo. 3 Magesat ira ma toon mapkes a memesa na padton iyaysolat chiyay, tan magesat ngo iriy toon mengi-ngel tan memati. Tep chanchani din mepesamak ira jay.4 Si-kak a si John, kowan isolat cha si-kayon naematid Afo Chiyos a naesa-sa-nop a manchejaw chitha pithon siyodad cha probinsiya na Asia.
Sapay koma gwared si-kayoy kaasi tan talnen naedafod Afo Chiyos tan Ispirito Santo tan si Jesu Cristo. Si Afo Chiyos, gwara nontan da, gwara niman, tan gwara di na olay. Sema Ispirito Santon gwariy pithon pesing ton pengibiybiy na panakabalin to, a gwared sangoanan na thronon Afo Chiyos. 5 Tan si Jesu Cristo, naepiyal a manpaneknek na podnon inpaamten Afo Chiyos. Si-katho pay i pilmiron iyanpawil a nat meti-metiy mowan, tan si-kathoy mantoray na emiin a naiyantoray chiya dobong.
Ensemek to kiyen Cristo et indibchi to kiyed basol tayo babaen na chala thon imayos nonta etiy. 6 Inpanbalin to kiyen ari say mekitoray kiya, tan inpanbalin to kiya ngon pari say mansilbi kiyed Afo Chiyos a Chiyos to tan Aweto. Sapay koma mecheja-chejaw tan mantora-toray si Jesu Cristo na ingked ingka. Amen.
7 Nemnemnem jo jay. Onkowan alis Jesus a edikmothan na kolpot, et metaen ali na emiin a too. Angken sema iren iyanbek cha si-katho nonta biyono ra, metaen cha ngo. Tan emiin a tood ja dobong, onngogngog ira kagol Jesus a mengowis cha si-kara. Agpayson-agpayso jay. Amen.
8 Si Afo Chiyos a manakabalin, si-kathoy gwara nontan da tan gwara niman tan gwara di na olay. Kigwan to i “Si-kak i Alpha tan Omega a kapoanan tan pengingkaan na emiin.” b
Iyanparang Si Jesu Cristod John
9 Si-kak si John a ahi yod pamati. Si-kak i kadgwa yod anos jo na diga-digat a nadiya-kaman tayo tep ekisa-ki kiyed Jesus. Si-kak ngoy kadgwa yod ma mayka-chom cha pantorayan Afo Chiyos. Intolod chaak alid ja Patmos. Imag cha man say maykalebosak chiyay tep nainkasabak i esel Afo Chiyos tan sema inpaamten Jesu Criston podno. 10 Nonta sa-kin Domingko, inpakokip toak na Ispirito Santo, et gwariy inki-ngelan kon mapkes a esel cha beneg kon singen trompita. c 11 Kigwan niwa esel cha si-kak i “Isolat mon emiin i metaen mo, et ipaw-it mo ired ma naematin naesa-sa-nop a manchejaw chiwa pithon siyodad na Ephesus, Smyrna, Pergamum, Thyatira, Sardis, Philadelphia, tan Laodicea.”
12 Nonta inki-ngelan ko ma esel, iyanboli-negak a meni-neng no siyay mantetebal cha si-kak, et mitak i pithon ejanan na silow a aamag na balitok. 13 Et singen gwariy Anak na Tood kawa iren man a ejanan na silow a iyanbaro na edayad tan gwariy balitok a iyaybalkes cha pahow to. 14 Polaw i bowek ton singen bolak ono angchap, tan sema matha tho, singen birangdang a afoy. 15 Sema seki tho, inges toy mandingsin bronze a iyaydechang cha afoy. Sema esel to, inges toy notheng na ekayang a pajaspas. 16 Cha gwanan na diwa tho, gwariy pithon pasingsing a iyagchian to, tan gwariy ispaden chegwen tarem ton maritem a bimo-day cha temi tho. Tan sema dopa tho, manikal a inges toy akow na alas dosi.
17 Idi mitak iwa too, etongbaak cha sangoanan ton singen etiyak. Nem insagpat toy gwanan na diwa thod si-kak a kigwan to i “Enog i tahot. Si-kak i pilmiro tan kaonoran na emiin. 18 Si-kak i sibibiyag. Etiyak, nem niman ma manbiyagak na ingked ingka. Naiyagchian koy tolbek na pathiy tan Hades a kawad-an na iyangketiy. Isonga, gwariy karebengan kon mantoray na pathiy tan kawad-an na iyangketiy. 19 Isolat mo wen emiin i ibiybiy kod si-kam a sema mepesamak niman tan mepesamak ali. 20 Sema pithon pasingsing a mitam cha gwanan na diwak tan pithon ebalitohan a ejanan na silow, gwariy echalek a banag cha. Sema pithon pasingsing, si-kariy anghilis a naiyanbanbantay niwa pithon gropon naematin naesa-sa-nop a manchejaw. Tan sema pithon ejanan na silow, si-kara ma pithon gropon naemati.”