Sema Iren Naiyantoro Na Nat Podno
2
Nem gwara da ira ma nat podnon profiten iyanparang cha tothoo nontan da. Et inges to ngo niman. Igwan ali chiy mantoro na nat podnon manparang cha si-kayo. Onsaol ali cha tan mantoro ira na afil, et sema iren memati na toro-toro ra, mechosa ira na ingked ingka. Sema iren naiyantoro na nat podno, bebnekan cha ngos Criston Afo ren etiy say maydibchi ired basol. Sema panpa-noan to di, biglen kowisen iren Afo Chiyos et mechosa ira na ingked ingka. 2 Chakel aliy mengonod na ensekig a naima-imag iren ma naiyantoro. Kagol na nainpangamag chen man a ensekig, konen na too i ngaaw maypangkep niwa podnon toro-toron Afo Chiyos. 3 Kagol na kinaagom iren ma naiyantoro, saolen cha kayod pan-istoriya cha na edafod nemnem cha bengat say panpilahan cha kayo. Nem enog i kigwan i manjo-jo-kow si Afo Chiyos a mengowis cha si-kara tep ekowis mala ira nontan da tan iyaysagana wiy chosa ra.4 Sema iren naiyantoro na ite-itek, amta thayo i mechosa ira tep angken sema iren anghilis a iyanbasol nontan da, chiyosa iren Afo Chiyos. Inta-boy to ired inpiyirno say maykalebos ired ma kawad-an na enbolinget cha sa-kod ingkathod ma akow alin pengowis Afo Chiyos na emiin. 5 Chiyosa ngon Afo Chiyos iriy toon nat timahot cha si-katho nonta timpon Noah. Tep jiyowjow Afo Chiyos i dobong say melned ira. Nem si Noah a naiyankasaba i mesepol a onoran chiy mapteng a panbiyag, biyantayan Afo Chiyos, pati emiin a pithon pamilja tho, say nat metiy ira. 6 Chiyosa ngon Afo Chiyos ira ma toon gwared siyodad na Sodom tan Gomorrah. a Kolpin piyoolan to ira ma too tan siyodad cha say mebanchaanan ira ma echom a nat entahot ches Afo Chiyos. 7 Nem si Lot a iyan-iya-iyan ngod Sodom, tiyolongan Afo Chiyos a onbetik. Tep maronong si Lot tan ensahit a chiliy nemnem to kagol na ensekig a naima-imag iren ma ngaaw a too. 8 Kagol a maronong a toos Lot, epaladoy sahit na nemnem to nonta ekiiyan ired ma too tep nainki-ngelan to tan namita thon gwiya-gwa-gwiy ngaaw a naima-imag chen oncharal na dinteg Afo Chiyos. 9 Sema iren emiin a epasamak nontan da, seman i pesing a pengamtaan tayo i amten Afo Chiyos a ontolong iren ma maronong a toon naedigathan. Tan amta tho ngon menosa iren ma ngaaw a too, et a-magen to man no akow alin pengowis to na emiin. 10 Mas enbel-at pay aliy chosa iren ma naengonod na ensekig a kamkam na angel cha tan sema iren naiyandisjon iren ma gwariy karebengan to.
Sema iren naiyantoro na nat podno, nagwariy baing cha, tan nainpilit chiy piyan cha. Nat entahot iren man-a-sel na ngaaw maypangkep iren ma manakabalin a anghilis. 11 Nem angken sema iren anghilis a mas banay i panakabalin to iy say sema iren naiyantoro na nat podno, nat nakigwan chiy ngaaw cha sangoanan Afo Chiyos maypangkep na echom chen anghilis a iyanbasol. 12 Nem sema iren naiyantoro na ite-itek, nakigwan chiy ngaaw maypangkep na nat egwathan cha. Singen may-arig ired athap a animal a nagwariy nemnem chen naengonod bengat na piyan na angel cha. Sema iren athap a animal, iyay-anak bengat et say chedmeten na too et bonoen cha. Sema iren naiyantoro na nat podno, inges niwan i mepesamak cha si-kara tep mechosa ira na ingked ingka. 13 Tep sema digat a inpasakbat ched echom, on-olid si-kara say mandigat ngo ira. Say nainbilang iren ma toon panchadsahan, sema pengemag na kompormin ngaaw a piyan na angel cha, angken kaakawan tan si-nengen na tooy naimag cha. Singen may-arig ired mansen onngithi na edinis a baro tep naiyayka-chom ired si-kayo no mengan tan mankolmogar kayo angken ngaaw i panbiya-biyag cha tan maradsak iren menaol cha si-kayo. 14 Piyan iren ma toon menechog na kompormin biin si-nengen cha, tan angken naeminpiyen naiyanbasol ira, eg pay laeng ira mepnek. Nasiyolisog cha ngo ma toon kolang i pamati ra say onbasol ira. Aagom ira tan edaing iren mengeda na emiin a piyan cha. Nem chosaen iren Afo Chiyos! 15 Sema iren naiyantoro na itek, in-olay chiy koston chalan et imaragwi ired podno. Iyonoran chiy imag Balaam a anak Bosor nonta imag toy ngaaw tep piyan ton medagboan. b 16 Nem sema donkey a iyansahayan Balaam, angken animal a nat mahaesel, inpaesel Afo Chiyos, et inseg-ang niwa donkey si Balaam say nat itoloy toy kedsel a niyemnem ton a-magen.
17 Sema iren naiyantoro na nat podno, singen may-arig ired temtem a iya-tian ono singen may-arig ired kolpot a itekjab na chahem tep sema naintoro iren ma too, nagwariy silbi tho. Insaganen Afo Chiyos i dogad chiwa enbolinget cha sa-kod a kaykalebosan cha. 18 Chakel i nainki-tek iren ma too, nem sema nakigwan cha, nagwariy silbi tho. Tep naintoro cha i nat ngaaw no onoran na tooy ngaaw a kamkam na angel cha, et sejay i nainpasing chen menolisog iren ma toon ahay pamati thod Cristo tan ahay payas cha na echom chen ngaaw i panbiyag cha. 19 Sema iren naiyantoro na nat podno, nainkari cha ired ma naengonod na toro-toro cha i angken a-magen chiy kompormin piyan cha tep maydibchi met laeng ired ma dinteg. Nem say podno, sema iren naiyantoro iren man, si-karen mismoy bagaen na basol chen naengiskig tan oncharal cha si-kara. Tep say too, manbalin na bagaen na kompormin mantoray cha si-katho. 20 Nemnem jo iriy toon bintihan chiy ensekig a naimag na tothood ja dobong tep iyamta ra wes Jesu Criston Afo thayo tan Engisalakan cha si-kathayo. Et no on-oli ired ma ensekig say manbalin ira mowan na bagaen na basol cha, mas karkaro pay iwa kaonoran a kasasaad cha iy say sigod. 21 Magangkana no eg cha iyamtaan i chalan a ontorong cha mapteng a panbiyag iy say iyamtaan cha et binekan chiy esantoan a bilin a iyaytorod si-kara. 22 Sema naimag iren ma too, inges to ira jay a ese-esel a kigwan to i “Nakiyakan na aso mowan i in-otha to.” c Tan sa-ki pay a kigwan to i “Say kechel a ena-mes, naimoli mowan a manpalow.”