3 Pilmiro, gwariy mesepol a egwathan jon no onmothok aliy kaonoran a akow, igwan ira diy mengang-angjed si-kayo. Onoran iren ma tooy ngaaw a kamkam na angel cha. Ngi-ngian cha kayo, 4 et konen cha i “Inkarin Jesus a on-oli di, anya? Toy kad-an to ngarod i? Manipod nontan den timpon etiy iriy pilmiron afo-afo thayo la ingkathod niman, imono-onong a emiin. Tan manipod nonta eparsoway dobong, nagwariy esa-dathan.” 5 Nem no konen iren ma naengang-angja i nagwariy mesa-dathan, nat podno man tep inchorog chen diningding i imag Afo Chiyos nontan da. Tep piyarsowen Afo Chiyos i dobong tan iyaykayang babaen na panakabalin na esel to. Insi-jan toy chaged chanom et inbo-day to diy chaga babaen na chanom. 6 Tan iyosal ngon Afo Chiyos i chanom nonta jiyowjow toy dobong, et iyalned a emiin i too tan echaral maliy sigod a dobong. 7 Et chechalen mowan Afo Chiyos iya dobong tan iyaykayang babaen na panakabalin na esel to. Banbantayan to ja dobong tan iyaykayang ingkathod akow alin kolpin poolan to ira man. No seman alin akow, kowisen Afo Chiyos i tothoon nat entahot cha si-katho say mechosa ira na ingked ingka.

8 Si-kayon ensemek ko, gwariy sa-kin mesepol a nat dingdingen jon sema pesing a pannemnem Afo Chiyos na timpo, afil cha pannemnem tayo. Cha nemnem to, sa-kin akow, singen sandibon tawen mala, tan sema sandibon tawen, singen sa-kin akow. 9 Gwara iriy toon naengowan i edaraw si Afo Chiyos a menongpal na kari thon on-oli dis Cristo. Nem say podno, aanos a chilis Afo Chiyos cha si-kayo tep piyan to i nagwariy mechosa, no diket sema panbabawi na emiin a tothoo na basol cha. 10 Nem sema akow a pan-oli din Criston Afo thayo, onmothok nowan. Sema pan-oli tho di, singen inges toy ikowan ali na mahibot tep mepesamak angken nagwariy bancha tho. No seman alin akow, igwan aliy mapkes a notheng, et mepokaw i iyaykayang. Sema iren akow, bolan, tan pasingsing, melnay cha afoy, tan seja dobong tan emiin a gwared jay, kolpin mepoolan.

11 Inges niwan i kechechal na emiin, isonga mesepol a onoran jo na olay i esantoan a panbiyag tan patien jo na olay si Afo Chiyos iy marama ngon jowan sekera man alin akow a pengowis Afo Chiyos na emiin. 12 No seseskeren jo man alin akow a pengowis Afo Chiyos, ipahat joy kabaalan jon mengemag na piyan Afo Chiyos say mas magenon onmothok iwan a akow. Et no onmothok iwan a akow, mepoolan i iyaykayang tan kolpin mechechal, tan sema akow, bolan, tan pasingsing, melnay cha afoy. 13 Nem angken ngon mepesamak ira man, emangkesked i tongpalen Afo Chiyos iwa inkari thon onbadoy dobong tan iyaykayang, tan maronong a kolpiy emiin a man-iyan chiwan.

14 Si-kayon ensemek ko, kagol a sejay i jowan sekera, ipahat joy kabaalan jo say nagwariy kolang jo tan nagwariy maypabasol cha si-kayo, et say etalniy nemnem jo no on-akgwat kayod sangoanan Afo Chiyos. 15 Nemnem jo jay. Say kagol na nat mothohan pay ali na pengowis Afo Chiyos, ino-inosan thoy tothoo tep piyan ton manbabawi ira say maysalakan ira. Si Paul a ahi thayon ensemek tayo, sejay ngoy insolat tod si-kayo babaen na daing a in-i-kan Afo Chiyos cha si-katho. 16 Sema emiin a insolat to maypangkep na pan-oli din Jesus a Afo thayo, inges to ngoy kowan kona. Gwara nowan iriy edigat a ma-gwathan ired ma solat Paul. Et sema iren toon kolang i awat to tan ekapsot i pamati tho, nasiya-dathan chiy banag na insolat to. Et inges niwan ngoy naimag ched ma echom a ese-esel Afo Chiyos. Isonga, mechosa ira na ingked ingka.

17 Nem si-kayon ensemek ko, amta yo wa i maypangkep iren ma toon naiyantoro na nat podno tan naenaral na dinteg Afo Chiyos. Isonga, pantanchaan kayo say nat mesaol kayo na ite-itek cha, nahol ni ipaaragwi ra kayod podnon napiyati yo. 18 No diket itoloy jon onoran i podnon toro-toron Afo Chiyos say pecha-pechasen jo pay i kaasin Jesu Criston Afo thayo tan Engisalakan cha si-kathayo, et mas am-amtaen jo pay si-katho. Sapay koma mechejaw si Cristo niman tan ingked ingka. Amen.