3 Babaen na panakabalin Afo Chiyos, in-i-kan tod si-kathayoy emiin a mesepol tayo say onoran tayoy panbiyag a panchadsahan to. Mebedin a a-magen tayo man tep agpayson amta thayos Afo Chiyos a emispis cha si-kathayo babaen na kinakayang to tan kinamapteng to. 4 Babaen niya kinakayang tan kinamapteng Afo Chiyos, in-i-kan tod si-kathayo ira ma kapategan tan kainportantian a inkari tho say on-aragwi kiyed ngaaw a kamkam na tothood ja dobong a oncharal na angel tan nemnem. In-i-kan ngon Afo Chiyos ira man cha si-kathayo say mekibingay kiya ngod kinachonong to tan kinamapteng to. 5 Isonga, kagol ma na engamagan Afo Chiyos a emiin iren jay para cha si-kathayo, mesepol a ipahat joy kabaalan jon menga-chom na mapteng a ogadid pamati yo. Sema iechom jod mapteng a ogadi, sema amta yon koston a-magen jo. 6 Sema ngon iechom jod man, sema pengitifel na piyan na angel jon a-magen, et sema iechom jod man, sema anos. Sema kinaanos, a-choman jo koma na ogadin inges toy ogadin Afo Chiyos. 7 Sema ogadin inges to man, a-choman jo koma na semek cha aahi yon naemati. Tan sema semek jod echom jon naemati, a-choman jo na semek cha emiin a tothoo. 8 Tep no onchake-chakel ira ja mapteng a naimag jo, mapteng aliy panpa-noan to, tan sema naimag jo, gwara diy silbi tho tep agpayson amtaen jo dis Jesu Criston Afo thayo. 9 Nem no gwariy toon nat mengemag iren jay, may-arig cha ekorab ono sema eborabod i matha tho. Tep diningding to i edinisan ired ma basol ton imag to nontan.

10 Isonga, aahik, ipahat joy kabaalan jon mengemag iren ja mapteng say paneknekan to i tiya-gway to kayon Afo Chiyos et pinispis to kayon manbalin na tothoo tho. Tep no a-magen jo ira jay, nat on-ara-aragwi kayod pamati yo. 11 Et mechadsahan si Afo Chiyos a mengi-kan na karebengan jon onsekep cha pantorayan Jesu Criston Afo thayo tan Engisalakan cha si-kathayo. Tan sema pantorayan to, nagwariy pengingkaan to.

12 Isonga, ipala-palagip ko na olay cha si-kayo ira jay, angken amta yo wala tan naemasig kayon mengonod na podnon iyaytorod si-kayo. 13 Say kowan nemnema, mapteng no ipalagip kod si-kayo ira jay basta sibibiyagak pay laeng say nemnemnemen jo. 14 Tep amtak i chanchaniy ketiy ko tep setan i inpaamten Jesu Criston Afo thayod si-kak. 15 Isonga, ipahat kon ipalagip cha si-kayo ira jay say mebedin a nemnemnemen jo na olay no maysi-janak chiya dobong.

16 Sema inpaamta wid si-kayo maypangkep na panakabalin Jesu Criston Afo thayo tan sema pan-oli tho mowan ali, nat is-istoriya bengat a edafod nemnem na too. Tep si-kawin mismoy eni-neng na kinakayang Cristo tan kinachiyos to. 17 Tep gwara kawi nowan nonta si Afo Chiyos a Awa, inkayang tos Cristo, et inbiybiy toy nihal na kinachiyos Cristo. Inki-ngelan mi ngoy esel Afo Chiyos a manakabalin a kigwan to i “Sejay i ensemek kon pasiyen Anak ko. Si-kathoy panchadsahan kon chili.” 18 Sema esel a edafod dangit, inki-ngelan min mismo nonta kiyadgwaan mis Cristod ma esantoan a chontog.

19 Kagol niwa mita wi tan inki-ngelan mi, sigorado kawi i podno nowan i kigwan iren ma profita nontan da maypangkep Cristo. Isonga, mapteng no patien jo ira ma ese-esel cha tep singen inges toy intohan a nasimilow cha enbolinget. Patien jo koma ira ma kigwan cha ingkathod onbo-day i agsapen pasingsing et onnihal alin piyan ton a-seden i ingkathod akow a on-oli dis Cristo et silowan toy nemnem tayo. 20 Gwara nin i mesepol a egwathan jon nagwaren polos a insolat iren ma profiten edafod nemnem chen mismo. 21 Tep sema iren insolat iren ma profita, nat edafod nemnem na too, no diket edafod Ispirito Santon engitorong cha si-kara na pengowan cha na ese-esel a edafod Afo Chiyos.