5 Aahik a ensemek ko, nemnem jo jay. Pinispis Afo Chiyos i ebitheg chiya dobong say onbaknang ired pamati, tan say mayka-chom ired pantorayan Afo Chiyos a inkari thod ma mahasemek cha si-katho. 6 Nem si-kayo, nadiyamsis joy ebitheg. Ampet siya iy nat sema iren baknang i naengipadigat cha si-kayo? Ampet siya iy nat si-kara pay i naengicharom cha si-kayo? 7 Tan ampet siya iy nat si-kara pay i naengomang niwa echayaw a ngaran Jesu Criston iyayka-choman tayo?

8 Chiwa epateg a dinteg Afo Chiyos a inpasolat to, kigwan to i “Semek moy echom mon inges to ngoy penmek mo na angel mo.” ^a No podnon naiyonoran jo jay a bilin, jowan amagiy mapteng. 9 Nem no nat naimag joy mapteng cha emiin a too, angken ebitheg ono baknang, naiyanbasol kayo, tan nakigwan tod ma dinteg i ngaaw i imag jo. 10 Tep angken menechal i too na sa-kin dinteg bengat, ibilang Afo Chiyos i chichal ton emiin i dinteg to. 11 Tep kigwan Afo Chiyos i “Enog i charog na nat imbaliy mo,” tan kigwan to pay i “Enog i bono.” ^b Isonga, no eg kayo enarog na nat imbaliy jo, nem emono kayo, chichal jo met laeng iwa emiin a dinteg. 12 Isonga, tanchaani yo i emiin a nakigwan jo tan emiin a naimag jo tep kowisen to kayon Afo Chiyos chiwa dinteg a naengibolos na tood basol. 13 Tep sema eg mengaasi na echom to, nat kaasian ngon Afo Chiyos no kowisen to. Nem sema mahaasi, nagwariy tekothan to di na pengowis Afo Chiyos.

14 Si-kayon aahik, no gwariy mengowan i naematid Afo Chiyos iy nagwariy naimag ton mengibiybiy i agpaysoy pamati tho, nagwariy kanas na pamati tho tep ngoy pesing ton maysalakan no seman i itsora na pamati tho? 15 Et no bilang i gwariy ahi tayon kolang i baro tho tan kakanen to, 16 tan gwariy sa-kid si-kayon mengowan i “Taha, sapay koma bindisjonan token Afo Chiyos. Sapay koma nat mektel ka, tan sapay koma on-anay i kakanen mo” iy nagwariy in-i-kan tod ma too, nagwariy kanas na kigwan to. 17 Inges to met laeng cha pamati. No ese-esel bengat tan nat naesi-neng cha naaamag, nagwara ngoy kanas niwa pamati tho tan singen etiy met laeng.

18 Nem gwara emoy mandiskotil i “Chakel i kilasin pesing na toon naemati tep sema sa-ki, gwariy pamati tho bengat, nem sema sa-ki ngo, gwariy mapteng a pesi-pesing to bengat.” Say songbat kod tan i “Nem no naemati ka bengat, ngoy pesing mon mengibiybiy i agpaysoy pamatim? Nem si-kak ngo, ibiybiy koy pamatik cha naima-imag ko.” 19 Nakigwan jo i napiyati yo i sa-sa-kiy Afo Chiyos. Mapteng! Nem seta pamati yo, kolang pay tep angken dimonyos, napiyati ra tan et nakimayengkeng ira tep entahot ches Afo Chiyos. 20 Nem si-kayo, eg jo pay nin egwathan! Apay mesepol a ipaamtak i nagwariy kanas na pamati yo no nagwara ngoy mapteng a nainpasing jon kasi-nengan to? 21 Nemnem jos Abraham a afo thayo la nonta bayag da. Inbilang Afo Chiyos a maronong tep piyatin Abraham nonta inpa-tok tos Isaac a anak tod altar say itangdal tod Afo Chiyos. ^c 22 Mafoot i sema pamati tho tan imag to, iyan-echom. Sema imag Abraham, aamtaan i agpaysoy pamati tho. 23 Et si-kathoy etongpalan na iyaysolat cha esel Afo Chiyos a “Piyatin Abraham i kigwan Afo Chiyos, isonga inbilang Afo Chiyos a maronong.” Sejay pay i kagol a engaranan ton kajem Afo Chiyos. ^d 24 Isonga, sejay i kaamtaan to i si Afo Chiyos, nainbilang toy toon maronong kagol na naimag to, nat sema kagol na pamati tho bengat. 25 Inges to ngod Rahab a naekidahi-dahi nonta bayag da. Inbilang Afo Chiyos a maronong kagol na mapteng a imag tod tothoon into-non Afo Chiyos a mandipdip cha ili tho. Tep sinintil to ira et intoro thod si-kariy bebtihen cha. ^e 26 Isonga, sema pamati, inges toy angel na too. No nagwariy ispirito niwa angel, etiy. Tan sema pamati ngo, no nagwariy mapteng a pesi-pesing to, etiy ngo.