Sejay a solat, iyaysolat ired ma Hodjon engaranan pay na Hebrews a emati ired Jesus. Nagwariy mahaamta no siyay engisolat niyay, nem sema gwa-gwa-chen naengachal na Biblia, nakigwan cha i Hodjo emo ngon ematid Jesus. Nakigwan cha pay i insolat emon ma too nonta aneng i A.D. 70.

Say kagol niya solat ket, say pekedsang niwa engisolat i nemnem iren ma Hodjon emati tep napidiga-digat cha pay iren pasiya, tan chanchanin bebnekan chiy pamati red Cristo. Kigwan niwa engisolat ired ma emati i memasi-masig ira komen memati tep kahejangan si Cristo iy say emiin.

Sema engisolat, gwariy tedon in-iksplikar to maypangkep Cristo. Pilmiro, si Cristoy Anak Afo Chiyos. Isonga si Cristo, kahejangan iy say si Moses tan profita ira tan angken anghilis. Maykadgwa, si Cristoy chiyotohan Afo Chiyos a sa-sa-kin pari thayo na ingked ingka kagol na etiyan tod koros para cha emiin a too. Isonga, si-kathoy kahejangan iy say emiin a echom a pari. Maykatdo, si Cristoy podnon mengisalakan cha si-kathayo tep tiyongpal ton emiin i mesepol a kigwan Afo Chiyos cha Chaan a Tolagan.

Sema kapitolon 11, si-katho emoy mas echamag a parti niyay a dibcho. Kigwan tod ma kapitoloy maypangkep na tothoon iyanbiyag nonta bayag den mahedsang a pasiyay pamati ra. Angken epaladoy diga-digat a diya-da-kaman cha, piyetpetpetan chiy pamati red Cristo tep sinigorado ren si-kathoy mengisalakan ira.