Sema Solat Ired Ma
HEBREWS
Sema Kinachiyos Criston Anak Afo Chiyos
1
Nonta bayag da, sema iren piyan Afo Chiyos a konen to ired ma afo-afo thayo la, inpaamta tho ired ma profita. Sema inpasing ton engipaamta, eminchakel cha ima-imag to, tan ekila-kilasin inpasing to. 2 Nem niman a kaonoran a akow, sema iren piyan Afo Chiyos a konen tod si-kathayo, inpaamta thod Anak to. Seja Anak to, si-kathoy engiparsowaan Afo Chiyos na emiin a gwared dobong tan chiwa iyaykayang, tan si-katho pay i pinispis Afo Chiyos a menegwid na emiin. 3 Sema nihal Afo Chiyos, naesi-neng cha Cristo, tan si-kathoy kosto-koston kay-ingesan Afo Chiyos. Si Cristo pay i naengipatoloy tan naengipaolnos na emiin a parsowa babaen na esel ton manakabalin. Idi iyakcheng a dininisan toy basol na ketoo-too, imoli wed dangit et timokkong cha gwanan Afo Chiyos a Manakabalin. aSi Cristoy Kahejangan Iy Say Anghilis
4 Isonga kagol iren jay a imag Cristo, inpakayang Afo Chiyos iy say anghilis. Sema inngaran Afo Chiyos cha si-kathon “Anak Afo Chiyos,” kahejangan iy say ngaran na anghilis. 5 Tep nat kigwan Afo Chiyos cha angken sa-kin anghil i:
“Si-kam i Anak ko.
Niman ipaamtak i si-kak i Awam.” b
Tan nat kigwa-kigwan pay Afo Chiyos cha anghil i:
“Si-kak aliy awam
tan si-kam aliy anak ko.” c
6 Nem nonta into-non Afo Chiyos i kafangodowanan a Anak to did ja dobong, kigwan to i:
“Si-kayon anghilis ko, chayaw jo si-katho.” d
7 Sejay i kigwan Afo Chiyos maypangkep na anghilis a:
“Anghilis ko, si-kariy bagaen ko, tan
mebedin a panbalin ko ira na inges toy chahem tan afoy.” e
8 Nem sema kigwan to maypangkep na Anak to, sejay a
“Si-kam a Chiyos, mantoray ka na ingked ingka.
Kosto-kostoy pantoray mo.
9 Piyan moy mapteng, nem owes mo ngoy ngaaw.
Isonga si-kak a Chiyos mo, mas banay i chayaw tan chadsak a
in-i-kan kod si-kam iy say echom mo.” f
10 Kigwan pay Afo Chiyos cha Anak to i:
“Nonta kapkapoanan, Afo, si-kam i emarsowa niyay a dobong.
Et sema iren gwared ma iyaykayang, seta ngon mismon diwam i engamag.
11 Sema iren piyarso-parsowam, mepokaw iren emiin,
nem on-ono-onong ka.
Sema emiin, manbalin na chaan a inges toy baro.
12 Tofihen mo iren singen kamisita.
Sa-dathan mo iren singen baro.
Nem si-kam, eg ka mesa-sa-dathan.
Tan say biyag mo, nagwariy pengingkaan to.” g
13 Nem nat kigwa-kigwan Afo Chiyos cha angken sa-kin anghil i kigwan tod Anak ton:
“Tokkong ked ja gwanan ko
ingkathod a-gwahen ko ira ma naengontred si-kam a
singen inkathin mo ira.” h
14 Nengo wiy osal iren ma anghilis? Si-kara ma bagaen Afo Chiyos a nat naesi-neng. Nainto-no iren Afo Chiyos a menolong iren ma tothoon maysalakan.