Sema Solat Paul Cha
PHILEMON
Sema Kapoanan Na Solat
1
Si-kak si Paul a iyaykalebos tep naiyansilbiak cha Jesu Cristo. Say kadgwak chiyay, si Timothy a ahi tayod pamati. Sejay a solat, para cha si-kam, Philemon, a kaobdaan min ensemek mi. 2 Et para ngod Apphia a ahi thayod pamati tan si Archippus a a kasolcharoan a naengitakchel na mapteng a chamag maypangkep Jesu Cristo, tan para cha seta gropon naematin naesi-si-nop chitha baliy mo.3 Sapay koma gwared si-kayoy kaasi tan talnen naedafod Afo Chiyos a Awa thayo tan si Jesu Criston Afo thayo.
Iyansalamat Si Paul Kagol Philemon
4 No nainkararagan taha, naiyansalamathak na olay cha Afo Chiyos kagol cha si-kam 5 tep nainki-ki-ngelan koy maypangkep na pamatim cha Jesus a Afo thayo tan sema semek mod emiin a tothoon Afo Chiyos. 6 Nainkararag ko pay i sema inpan-echom tayod pamati thayo, echoman toy pengegwat mo maypangkep na emiin a mapteng a nain-i-kan Afo Chiyos cha si-kathayo tep iyayka-chom kiyed Cristo. 7 Tep si-kam a ahik, paladoy chadsak ko tan kimedsang i nemnem ko kagol na semek mod tothoon Afo Chiyos. Tep inpakedsang moy nemnem cha.
Iyadok Paul Si Philemon I Pekawanen Tos Onesimus
8 Isonga, gwariy piyan kon ibaged si-kam. Angken gwariy karebengan kon in-i-kan Criston bidinen tahen a-magen moy kosto, ekak ipilit, 9 no diket si-kak a naengiriprisintar Jesu Cristo b a iyaykalebos pay kagol cha si-katho, mengedohak bengat kagol na semek mod tothoon Afo Chiyos. 10 Sema a-dohen ko, pangaasim kaasiim si Onesimus a iyanbalin a anak kod pamati nonta gwaraak pay laeng cha kalebosan. 11 Nontan nagwariy silbi thod si-kam, nem niman gwara nowan i silbi thod si-kathayon chegwa. c
12 Kowan ito-nos Onesimus a ensemek kon chili say on-olid si-kam. 13 Mas piyan ko pay komen on-onong chiyay say singen ija ked jay ngon mantotolong cha si-kak iy iyaykalebosak kagol na toro-torok na mapteng a chamag. 14 Nem ekak piyan a a-magen iwan tep anengak pay ibaged si-kam. Tep ekak piyan a mepidithan ken a-magen moy kosto, no diket seman i piyan mo.
15 Say kagol emon iyaysi-janan Onesimus na kemtang cha si-kam, say on-oli komen man-iyan cha si-kam na olay. 16 Et niman nat bagaen mo bengat, nem mas epateg iy say bagaen tep epateg men ahi tayod pamati. Epateg a pasiyed si-kak et sinto pay med si-kam iy nat bagaen mo wa bengat, nem ahim pay a naematid Afo thayo.
17 Isonga, no agpayson inbilang moak a kadgwam cha obden Cristo, awat mo ngon inges toak. 18 No gwariy imag ton ngaaw, ono gwariy othang tod si-kam, si-kak i memejad. 19 Si-kak i mansosolat niyay: “Si-kak a si Paul, bejaran koy othang Onesimus cha si-kam.” Nat mesepol emon konen ko mowan cha si-kam i sema biyag mod Cristo, si-kathoy othang mod si-kak. 20 Isonga, si-kam a ahik, pangaasim amag mo ja kowan aloha kagol na pamati thayod Criston Afo thayo. Paimdeng moak tan pekedsang moy nemnem ko tep san-ahi kiyen iyayka-chom cha Cristo.
21 Insolat ko ira jay cha si-kam tep kowan namnamaa i esolok a tongpalen mo ja kowan aloha. 22 Say sa-ki pay, no mebedin, pangaasim pengisagana ka na kwadton pan-iyanan ko la. Tep kowan namnamaen songbathan Afo Chiyos i kararag jo i maybolosak et bisitaen tahejo.
Sema Kaonoran Na Solat
23 Si Epaphras a kadgwak a iyaykalebos ngod jay kagol Jesu Cristo, towan komostai ka. 24 Angken ires Mark, Aristarchus, Demas, tan si Luke a kaobdaan ko ira, chiyan komastai ka ngo.
25 Sapay koma gwared si-kayoy kaasin Jesu Criston Afo thayo.