2 Si-kayon aahik, no pechasen joy ekila-kilasin digat, panchadsak kayon chili ngorechan. 3 Tep amta yo i say paras jo na digat, si-kathoy mengipakedsang na pamati yo say mebedin a ontolo-toloy kayon memati. 4 Tan mesepol a ontolo-toloy kayon memati et say onchono-chonong kayo pay ingkathod nagwariy pankolangan jo.

5 Nem no gwared si-kayoy nat amta thoy piyan Afo Chiyos a a-magen to, ibaga tho komiy daing a naedafod Afo Chiyos. Tep si Afo Chiyos, maikan tan i-kan tod si-katho ma inbaga tho. Tan eg to pay baingan. 6 Nem sema mengibaga, mesepol a patien ton pasiya i i-kan Afo Chiyos cha si-katho ma towan ibaga. Mesepol a eg manchegwa-chegwa tep no pesing to man, inges toy chalojon a naintekjab na chahem. 7 Sema toon inges to jay, nat namnamaen to koma i i-kan Afo Chiyos i ibaga tho 8 tep naiyanchegwa-chegwa ma too tan naiyansina-dat i nainpasing to.

9 Si-kayon aahid pamatin ebitheg, pan-imdeng kayon chili tep epateg kayod nemnem Afo Chiyos. 10 Si-kayon baknang, pan-imdeng kayo ngon chili no mankombaba kayo tep memati kayo wed Jesus. Tep sema baknang a too, singen bongen magenon ma-kas. 11 Tep no kimayang i akow tan petang men pasiya, naedayday i tanem tan naiya-kas i bonga tho, et mechechal i boya tho. Inges to ngoy baknang a too. Metiy ngorechan angken maramen mansasafol na pilak na olay.

12 Magesat i toon naengitolo-toloy na pemati thod Afo Chiyos angken mandigat. Tep no maamtaan ma i mahedsang i pamati tho, egwathen toy kongkonen biyag a nagwariy pengingkaan to tep si-kathoy inkarin Afo Chiyos ired ma mahasemek cha si-katho. 13 No gwariy toon esolisog kagol na digat to ngo, eg to koma konen i si Afo Chiyos i enolisog cha si-katho. Tep si Afo Chiyos, nat mebedin a mesolisog na ngaaw, tan nat solisogen to ngoy too. 14 Tep say naenolisog na too, sema ngaaw a naedafod nemnem to tan kamkam to ngo. 15 Tan sema iren ngaaw a nemnem tan ngaaw a kamkam, si-kathoy naedafoan na basol, tan sema iyanbalinan na basol, sema pathiy tan kaysi-jan cha Afo Chiyos na ingked ingka.

16 Isonga, aahik a ensemek ko, enog i siyaol i angel jo i si Afo Chiyos i naenolisog cha si-kayo 17 tep naedafoy mapteng tan kinachonong bengat cha si-katho. Piyarsowa tho ira ma nanimihal cha iyaykayang, tan sema iren piyarsowa tho, naiyanbinaliw i chalan cha tan naiyanbinaliw i silow cha, nem si Afo Chiyos, eg manbalbaliw. 18 Say piyan to ket, panbalin to kiyen aanak to kagol na inpamati thayo na podnon ese-esel to say si-kathayoy kahejangan cha emiin a piyarsowa tho.

19 Aahik a ensemek ko, nemnem jo jay. Onsi-met kiya komen manki-ngel tan manemnemnem kiya komed pan-aa-sel tayo. Eg kiya pay koma onbonget a chakos 20 tep say bonget, nat mengitorong cha kinachonong a piyan Afo Chiyos. 21 Isonga, emiin a ensekig tan sema iren echom a ngaaw, ekal jod nemnem tan aramid jo, et ikombaba yoy angel jo et onori yoy esel Afo Chiyos a intanem tod nemnem jo. Tep sema esel Afo Chiyos, si-kathoy mengisalakan cha si-kayo.

22 Enog bengat i inki-ngelan i esel Afo Chiyos, nem pati yo pay tep no naiyanki-ngel kayo bengat tan eg kayo naemati, jowan saoliy angel jo. 23 Tep sema manki-ngel na esel Afo Chiyos nem eg to patien, inges to ngoy meni-neng na kasi-neng tod ispiho. 24 Et onbetik et magenon dingdingen toy kasi-neng to. 25 Nem sema mannemnemnem na mapteng a dinteg Afo Chiyos a naengibolos na too tan patien to, nat dingdingen to bengat i inki-ngelan to, no diket tongpalen to. Et si-kathoy bindisjonan Afo Chiyos cha emiin a a-magen to.

26 Sema naengowan i rilihiyoso, nem nat natiyanchaanan toy esel to, nasiyaol tho ngoy angel to tep sema karilihiyoso tho, nagwariy silbi tho. 27 Nem sema toon gwariy pamati thon podno tan nagwariy naiyankolangan tod sangoanan Afo Chiyos a Awa thayo, inges niyay a natiyolongan toy ebalo tan engoso no mandigat ira, tan eg to naiyonoran i ngaaw a naimag na tothood ja dobong.