Sema Ese-esel Na Too
3
Aahik, mapteng no manmanod si-kayoy manbalin na maistoro na esel Afo Chiyos tep amta yo i si-kawin naiyantoro, mas enbel-at i chosa wi no mankamali kawi iy say sema iren naetoroan. 2 Si-kathayon emiin a tothoo, kanayon kiyen naiyankamali, agdalod pan-esel tayo. Nem no bilang i gwariy toon nagwaren polos i kolang cha nakigwan to. Nagwaren polos i kolang niwa too tep amta thon mengitifel na emiin a parti na angel to. 3 Kaspangarigan, no pahadathan tayoy temi na kabajo, mebedin a ichalan tayod piyan tayon konan. 4 Inges to ngod bapor. Angken banay a pasiya tan naintolchon na mapkes a chahem, sema naengitorong cha piyan na toon konan, sema otik a pasiyen aamag na kejow. 5 Et inges to ngod ma taytay na too. Angken otik, mahedsang a pasiya. Nemnem joy afoy. Angken otik i chalang to, mahapool toy ekayang a chontog.6 Setan pay i kay-ingesan na taytay tayo. Angken otik a parti na angel tayo, si-kathoy naedafoan na ekila-kilasin ngaaw a naenaral na kinathoo tayon iyanchogid kanga-nga thayo ingkathod ketiy tayo. Tep seja ngaaw, naedafod Satanas. 7 Gwariy kabaalan na toon manmanso na emiin a ekila-kilasin sibibiyag, pati animal, titit, sema nakimorong, tan sema iren gwared baybay. 8 Nem nagwariy mahaitifel na taytay to. Tep seja taytay, esagana na olay a mengsel na ngaaw, tan say ngaaw to, inges toy sabirong a onbono. 9 Seja taytay tayo, naaosal a mengichejaw cha Afo Chiyos a Awa thayo, nem si-katho pay i naaosal a naengomang na echom tayo, angken piyarsowen Afo Chiyos a inges to. 10 Sa-ki bengat i temi thayo, nem no singka-chom naaosal a panchejaw cha Afo Chiyos, tan no singka-chom naaosal a pengomang na echom. Si-kayon aahik, on-ani-ja iyay. 11 Apay mebedin a medepoy mapteng a chanom tan ekilot cha sa-kin temtem? 12 Nagwara pay i kejow a mandawes na dawes na echom a kejow. Say kejow a fig, nat mandawes na olive. Tan say gwahal a grape, nat mandawes pay na fig. Tan nat mebedin pay a mengeda kiya na chanom a mainom cha baybay.
Sema Daing A Naedafod Afo Chiyos
13 No gwariy sa-kid si-kayon edaing tan mahaaw-awat, mesepol a ibiybiy to ma daing to tan pengegwat tod mapteng a ogadi tho tan sema anos a nainpasing ton naedafod ma daing. 14 Nem no maapal kayon chili tan naindagwas joy angel jo, enog i inki-tek i edaing kayo tep no a-magen jo tan, naiyan-itek kayo maypangkep na podno. 15 Tep say daing a inges to jay, nat naedafod Afo Chiyos a igwed dangit, no diket naedafod jay ngon dobong tan chiwa ngaaw a ogadi na too tan cha dimonyos. 16 Tep no gwariy maapal tan naengidagwas na angel to, gwara ngoy kolo tan emiin a kilasin ngaaw. 17 Nem no gwared too ma daing a naedafod Afo Chiyos, poron mapteng i nemnem to. Maonjon tan maanos, tan nat nainpilit toy piya-piyan to. Mahaasi tan chakel i mapteng a naimag to. Epasnek tan nat naiyanchegwa-chegwiy nemnem to. 18 Sema naengisingpet na echom to, inges toy naengitanem na talna tan olnos cha biyag cha. Et no onbadeg ma man a tanem, esantoan a panbiyag i dawes to.