5
No gwared tan i naematin engamag na ngaaw, rispiktar mo no bidinen mo. No dahin pangodowan iy say si-kam, enog i inbonget, no diket dodop mon mekitbal a singen inges toy awam. Sema iren dalekin orichiyan iy say si-kam, ibilang mo iren aahim. 2 Sema iren bibiin pangodowan iy say si-kam, ibilang mo ngo iren inam, tan sema iren bibiin orichiyan iy say si-kam, ibilang mo iren aahim a nagwariy ngaaw a nemnem mod si-kara.Sema Iren Bili-bilin Maypangkep Na Bibiin Ebalo
3 Sema iren bibiin ebalo, rispiktar mo ira, tan tolongim ira no nagwariy ahi ren onkajod si-kara. 4 Nem no gwariy aanak iren ma ebalo tan poli-poli cha, si-kara komay onkajo ired ma iyangkebalo. Mesepol a egwathan cha i no mansilbi ired Afo Chiyos, say pilmiron a-magen cha, kajoan chiy pamilja ra. A-magen cha koma man say ioli chiy kajo na awecha, inecha, tan afo ra tep si-kathoy piyan Afo Chiyos. 5 Sema ebalon nagwaren polos i onkajod si-katho, si Afo Chiyos i kawad-an na namnama tho. Isonga naiyankararag na gwiya-gwa-gwa tan diyabi-dabin manbaga na tolong Afo Chiyos. 6 Nem sema ebalon naimag to na olay i panchadsahan na angel to, singen etiy maled Afo Chiyos, angken sibibiyag pay. 7 Ibilin mo ira jay ired ma naematid tan say nagwariy ibasolan na tood si-kara. 8 Tep no gwariy naematin nat kajoan toy aahi to, agdalod pamilja tho, binekan toy pamati tho. Sema toon inges niyay, daged iy say sema iren nat naemati tep angken sema iren nat naemati, nakiyajoan chiy ahi ra.
9 Sema iren iyangkebalon maysolat i ngaran ched distaan say metolongan ira, mesepol a enem a poloy tawen cha ono esolok pay tan pinsak bengat i inpangimbaliy cha. 10 Mesepol ngon maremag ira ma mapteng a naima-imag chen inges to jay a nakiyajoan chen kostoy anak cha, nasinintil chiy bisita, nainbaba riy angel chen mansilbid tothoon Afo Chiyos, natiyolongan chiy tothoon mandigat, tan masdo iren mengemag na mapteng.
11 Nem sema iren nganga-ngen iyangkebalo, enog iriy inka-chom ired ma distaan say metolongan ira. Tep no mahedsang pay i piyan na angel cha iy say pangkep chen mansilbid Cristo, piyan chen mengimbaliy mowan. 12 Et no a-magen cha man, manbesol ma ira tep chechalen cha wiy kari chen mansilbid Cristo. 13 Sa-kin kagol a nat mayka-chom i ngaran iren ma nganga-ngen iyangkebalod ma distaan, onsarot ira tan manbelakbol ira. Nat setan bengat, nem onnotnotnot ira, mekibiya-biyang ired ma naima-imag na too, tan man-is-istoriya ira na nat koston metabtabal. 14 Isonga, say piyan ko, sema iren nganga-ngen iyangkebalo, mapteng no mengimbaliy ira mowan say on-anak ira tan taripatoen chiy baliy cha. Et sema iren naengontred si-kathayo, nagwariy ipabasol ched si-kathayo. 15 Sejay i kowan ibilin tep igwan iriy ebalon binekan cha wiy mapteng et iyonoran cha wes Satanas. 16 Ijay i kaonoran a konen ko maypangkep na iyangkebalo. Sema biin naemati, no gwara iriy ahi ton ebalo, si-katho komay onkajod si-kara say sema echom a naematin naesa-sa-nop chithan, nat medigathan iren onkajod si-kara. Et sema iren naematid tan, mebedin a tolongan cha wa ngo iriy iyangkebalon nagwariy onkajod si-kara.
Sema Iren Bili-bilin Maypangkep Iren Ma Naengibalnay Na Naemati
17 Sema iren naengibalnay a mapteng i pengibalnay cha, iyaybagay a rispiktaren mo ira tan echoman moy sowilcho ra, agdalo ired ma masdon mankasaba tan mantoro na esel Afo Chiyos. 18 Tep kigwan tod esel Afo Chiyos i “No ipakathin moy bahed irik say ma-kal i ohis to, enog i biyedberan i ngoseb to say mebedin a mengan na irik.”a Kigwan to pay i “Sema toon naiyan-obda, iyaykarin medagboan.”b 19 No gwariy ibasolan ched naengibalnay na naemati, enog i inki-ngelan ampet gwariy chegwa ono tedon mantistigo i gwariy ngaaw a imag to. 20 Nem no agpayson iyanbasol iwa naengibalnay tan nat isalcheng to, ibonget mod sangoanan iren ma emiin a naemati say ontahot i echom a mengonod cha si-katho.
21 Cha sangoanan Afo Chiyos tan si Cristo Jesus tan sema iren esantoan a anghilis, kowan bilina ka i onoran mon emiin ira jay a kigwan ko. Enog i iyafil i pesing mo ired ma too, no diket iinges moy pesing mod si-karen emiin. 22 Pantanchaan ka. Enog i kanil a chakos a menotok na toon mansilbid Cristo, no diket pannemnemnem ken chili no koston si-kathoy mengemag niwan a obda. Tep maamtaan emo i iyanbasol, et singen ekibasol ka ngod si-katho tep si-kam i enotok cha si-katho. Pantanchaan ka say on-aragwi ked emiin a basol.
23 Nat chanom bengat i inomen mo, nem inom ka ngo na otik a chanom na grape say ma-kasan itha sahit na ekes mo tep eminchakel a iyansahit ka.
24 Sema maypangkep na penotok mo na toon mansilbid Cristo, pantanchaan ka. Tep igwan iriy toon iyaypaamtay basol cha, angken nat iyaycharom pay nin ira. Igwan ngo iriy toon iyay-emot i basol cha, nem maypaamta di nem sa-ki din akow. 25 Inges toy toon naengamag na mapteng. Tep sema echom a too, naaamtaan a chakos i mapteng a naimag cha, nem sema echom ngo, nat naaamtaan a chakos i mapteng a naimag cha, nem maamtaan ngo ali no sa-ki din akow.