Sema iren kowan koned si-kam, itorom, tan bilin mo ira ma naematid tan i onoran cha. 3 No gwariy naiyantoro na afil tan nakiyontra thoy podnon ese-esel Jesu Criston Afo thayo tan sema podnon toro-toron naengitorong cha si-kathayod panbiyag a panchadsahan Afo Chiyos, 4 pahi-tek iwa too tan nagwariy am-amta tho. Sema toon inges to man, say piya-piyan to, mekisamsampitaw bengat na timen nagwariy silbi tho tan mandiskotil na banag na ese-esel. Say panpa-noan to ket, apal, pengontra, omang, tan pengibasol na echom a too. 5 Seja iren too, inam-ay iren mekibekal tep ngaaw i nemnem cha tan binekan chiy podno. Sema gwared pannemnem cha, panbaknangan i pematid Afo Chiyos.

6 Agpayson sema toon naematid Afo Chiyos, chakel i kongkonaen to no mepnek na nain-i-kan Afo Chiyos cha si-katho. 7 Tep nagwariy intahin tayo did ja dobong nonta iyay-anak kiya, tan nagwara ngoy itahin tayo no metiy kiya la. 8 Isonga, no gwariy kakanen tayo tan gwariy ibaro thayo, on-anay iwan tan mepnek kiya ngo. 9 Nem sema iren piyan chen onbaknang, inam-ay a mesolisog ira. Singen esaol ira kagol na chakel i banag a piyan chen chilin nagwariy silbi tho tan oncharal. Sema iren banag a piyan a chili iren ma too, si-kathoy mengianod cha si-kara, et da-kaman chiy chosen nagwariy pengingkaan to. 10 Tep sema kinaagom pay na pilak, si-kathoy naedafoan na emiin a ngaaw. Kagol niwa kamkam chen menepol pay na pilak, gwariy echom a binekan chiy pamati ra. Say panpa-noan to ket, palado wen chiliy sahit na nemnem cha.

11 Nem si-kam, Timothy, bagaen token Afo Chiyos, isonga aragwiim a emiin ira ma ngaaw. Ipahat mo ngon a-magen ira man a mengitorong na mapteng a panbiyag, amag moy panchadsahan Afo Chiyos, petpetim i pamatim, semek mos Afo Chiyos tan echom mon too, anosim i digat, tan anosim i echom a too. 12 Ipahat moy kabaalan mon mengitoloy a mematid Cristo Jesus tan mansilbid si-katho, a singen inges to ma mekidongben piyan ton mengegwak. Amag mo man say may-i-kanan ka na kongkonen biyag a nagwariy pengingkaan to. Tep pinispis token Afo Chiyos a mengegwat niya biyag nonta tinistigoan mod sangoanan na chakel a too i naemati ked Cristo. 13 Sejay ngoy kowan ibilin cha si-kam cha sangoanan Afo Chiyos a naengi-kan na biyag cha emiin a parsowa tan si Cristo Jesus a iyantistigo maypangkep na podnod sangoanan Pontius Pilate. 14 Say kowan ibilin, onorim a emiin i bili-bilin Afo Chiyos, tan pantanchaan ka say nat mayka-chom i nat podno ired ma bili-bilin Afo Chiyos, et say nagwariy mengowan i gwariy kolang iren ma bili-bilin to. Amag mon kosto ira jay ingkathod onmothok aliy akow a manparang mowan si Jesu Criston Afo thayod ja dobong. 15 Tep panparang mowan alin Afo Chiyos si Cristo no kosto din timpo. Si Afo Chiyos bengat i mechejaw. Si-katho bengat i naiyantoray na emiin tep si-kathoy kahejangan a Ari na emiin a ari tan kahejangan a Afo na emiin a afo. 16 Si Afo Chiyos bengat i nat meti-metiy. Manikal a pasiyay naiyan-iyanan to say nagwaren polos i mahaesop chiwan. Nagwaren polos i eni-neng cha si-katho, tan nagwara ngoy mahasi-neng cha si-katho. Sapay koma mechejaw tan mantoray na ingked ingka. Amen.

17 Sema iren naematin gwariy kinabaknang ched ja dobong, bilin mo ira i nat onpahi-tek koma ira. Kowan mo ngo ira i say panchinelan cha koma, nat kinabaknang chen nat onbayag, no diket si Afo Chiyos a naengi-kan na emiin a mapteng para cha panchadsahan tayo. 18 Bilin mo ira i a-magen cha komay mapteng say onbaknang ngo ired mapteng a aramid. Kowan mo ira i nat on-ikot ira na kinabaknang cha, no diket itolong cha koma ired ma echom a too. 19 Tep no a-magen cha man, singen chiyan echo-echomiy kongkona ren iyaykamid cha dangit. Et egwathen chiy podnon biyag a nagwariy pengingkaan to.

20 Timothy, petpetim i inpiyal Afo Chiyos cha si-kam. Aragwiim ira ma toon naekitabtabal na nagwariy silbi tho, a naiyansongbat maypangkep na toro-toro. Sema iren toro-toro, nakigwan na echom a too i achal, nem nat podno man. 21 Tep gwariy echom a toon emati niwa toro-toro, et imaragwi maled podnon pamati.

Sapay koma gwariy kaasin Afo Chiyos cha si-kayo.