Sema Iren Naiyantoro Na Nat Podno
4
Sema Ispirito Santo, inpaamta thon kosto i no sa-ki din akow, gwara ira di ma benekan chiy pamati red Cristo. Tep patien chiy onsaol a toro-toron naedafod dimonyos. 2 Sema iren naiyantoro iren ma ngaaw, naiyan-itek ira tan nainbili-biling cha i naemati ired Cristo. Ebayag a nainchoro-chorog chen a-magen i ngaaw say nat manbabawi wa ira no manbesol ira tep singen epoolan maliy konsinsiya ren pasiya. 3 Sema iren too, nakigwan cha i parit i pengimbaliy tan parit ngoy echom a mekan. Nem sema podno, piyarsowen Afo Chiyos i emiin a mekan say si-kathayon naematid Criston mahaamta na podnon toro-toro, mansalamat kiyed Afo Chiyos et mekan ma ira man. 4 Tep mapteng a emiin i piyarsowen Afo Chiyos, isonga nagwara komay mayparit, no diket egwathen tayoy emiin a nain-i-kan Afo Chiyos, et mansalamat kiya ngod si-katho. 5 Tep emiin a mekan, mapteng tep si-kathoy kigwan Afo Chiyos tan iyankararag kiya ngo et iyansalamat kiyed si-katho.Sema Mapteng A Toon Naiyansilbid Cristo Jesus
6 No itorom ira jay cha aahi tayon naemati, mapteng i pansilbim cha Cristo Jesus. Tan onkedsa-kedsang pay i pamatim no acha-achalen moy podnon maypangkep na pamati tayo tan ono-onoran moy mapteng a toro-toro. 7 Enog i inki-ki-ngelan i is-istoriya na too nontan den nagwariy silbi tho tep nat naedafod Afo Chiyos. Ingsaim kitdin a-magen i piyan Afo Chiyos. 8 Tep no toroan tayoy angel tayo, otik i pansilbi tho, nem no ingsaan tayon onoran i piyan Afo Chiyos, nagwariy pengingkaan na panmaptengan tayo. Tep sema badon biyag a inkarin Afo Chiyos, may-i-kan cha si-kathayo niman tan ingked ingka. 9 Podno jay a kowan kona, et patien koma na emiin a too. 10 Sejay i kagol na pengipahatan tayo na pantoro na podnon toro-toro tep say kawad-an na namnama thayo, igwan cha sibibiyag a Afo Chiyos a piyan ton mengisalakan na emiin a tothoo, tan podnon isalakan to ira ma naematid si-katho.
11 Emiin a kigwan kod si-kam, itorom ired ma naematid tan, tan bilin mo ira i onoran cha ira man. 12 Enog i intolok a damsisen chaka na too chafot ngalobo ka pay nin, no diket ibiybiy moy pesing koma na naematin manbiyag say onoran na echom a naematiy naima-imag mo. Pemapteng moy nakigwan mo tan naimag mo. Semek moy echom mo, petpetim i pamatim, tan pedinis moy nemnem tan pesing mo. 13 Say piyan kon a-magen mo ingkathod onkowanak ded tan, basam i esel Afo Chiyos ired ma naemati no mesa-sa-nop ira, tan itorom cha si-kara i banag to. Bilin mo ngo ira say onoran chiy esel Afo Chiyos. 14 Enog i in-olay itha daing mon in-i-kan na Ispirito Santod si-kam nontan a timpon inpangipadto iren ma profita tan sema inpangisagpat iren ma naengibalnay na diwa red si-kam. a 15 Nemnem mo na olay ira ma inbili-bilin kod si-kam. Ipahat moy kabaalan mon mengemag iren man say si-nengen na emiin a too i manmapmapteng pay i nainpasing mon mengemag iren man. 16 Isingpet moy panbiya-biyag mo tan sema pantoro-torom. Pemasig ken mengemag iren man say nat si-kam bengat i maysalakan, nem sema ngo iren naiyanki-ki-ngel cha si-kam.