3
Jaꞌ tinaniꞌ,
jix cu pitzcꞌu a yetoj Cristo yul sat Dios.
Yuxan,
sowalil chi kaoc cu naꞌbꞌal yin wan tzet ey bꞌey satcan,
bꞌey chotan ey Cristo bꞌey swatxꞌ kꞌabꞌ Dios.
2 Sowalil asan yin tzet ey bꞌey satcan chi kaoc cu naꞌbꞌal tinaniꞌ.
Cꞌam ojabꞌ chi kaoc cu naꞌbꞌal yin tzet ey bꞌey yul yibꞌankꞌinal tiꞌ,
3 yutol jix cu cam yetoj Cristo yul sat Dios.
Jal cu kꞌinal tiꞌ,
teynebꞌil,
yutol junxane keoc yetoj Cristo yin Dios.
4 Yuxan,
oj xꞌoxel je kꞌinal yetoj Cristo yet chi jul Naj,
catuꞌ oj cu jul pax yetoj,
yutol junxane keoc yetoj.
Jaꞌ yet tuꞌ oj tzꞌajna el cu watxꞌil jaxca swatxꞌil Naj Cristo.
5 Yuxan,
bꞌejwej can masanil sbꞌeybꞌal yet yul yibꞌankꞌinal tiꞌ.
Qꞌueywejcan el yin junelne.
Caw manche xa je yun amulal,
ma junojxa yal cꞌal tzet man watxꞌoj chi el je yunen yetoj je mimanil.
Manche xa je yaoc je naꞌbꞌal je to yin mule,
ma yin junojxa spenail.
Yetoj pax oj,
cꞌam chi skeꞌ je yaon oc je naꞌbꞌal je yoc bꞌeomal.
Yutol jaꞌ yet chi kaoc cu naꞌbꞌal yin koc bꞌeomal,
jaꞌ yul sat Dios,
jaxca tol lalan kalon oc jun cu bꞌeomal tuꞌ cu diosaloj.
6 Yutol oj tit sjowal scꞌul Dios yibꞌan ebꞌ chi cꞌal unen wan chi wal tiꞌ.
7 Jaex tiꞌ,
jix je bꞌeybꞌalne masanil wan chi waltej tiꞌ yet yalantoj.
8 Jaꞌ tinaniꞌ xin,
sowalil che bꞌejwej pax can wanxa oj waltej tiꞌ.
Sowalil che bꞌejwej pax can:
Jowal,
chichoncꞌulal,
penacꞌulal,
bꞌuchwal kꞌane,
cꞌal yal cꞌal tzet pena kꞌaneal.
9 Manche je yakꞌ lekꞌtiꞌal tet junojxa mactxequel.
Manche je yun wan jix wal tiꞌ,
yutol jaꞌ cu naꞌbꞌal yet yalantoj,
cꞌal cu bꞌeybꞌal,
bꞌejbꞌil xa can ku.
10 Jaꞌ tinaniꞌ xin,
qꞌuexbꞌilxatoj cu naꞌbꞌal.
Lalan swaꞌxi oc cu naꞌbꞌal tiꞌ,
yet watxꞌ laan xa oj cu eloc yetoj Cristo.
Jaꞌ jix waꞌnen jun cu acꞌ naꞌbꞌal tuꞌ,
yet watxꞌ chi kotajne el Dios yin tzꞌajanil.
11 Yuxan,
cꞌam yeloc apnoj ta Israel jon,
ma man Israeloj jon.
Cꞌam yeloc apnoj ta akꞌbꞌil jon circuncidar,
ma man akꞌbꞌil jon circuncidar.
Cꞌam yeloc apnoj ta txꞌoj conobꞌal,
ma cabꞌnal jon.
Cꞌam yeloc apnoj ta yakꞌomal servil,
ma yet xa sbꞌa.
Cꞌam yeloc apnoj wan tiꞌ,
yutol asanne Cristo ey yeloc apnoj yu ebꞌ bꞌey eyoc jun acꞌ naꞌbꞌale tuꞌ.
12 Caw ey scamcꞌulal Dios kin.
Jix cu awtele yu koc yetoj.
Jix cu sicꞌle el yu,
yet watxꞌ asan Dios ey jon yet.
Yu wan tuꞌ,
yuxan ey wan tzetyetal chi kunne.
Okꞌ ojabꞌ cu cꞌul yin ket animail,
watxꞌ ojabꞌ chi kute cu cꞌul tet ebꞌ.
Yeynajil ojabꞌ chi kute cu bꞌa.
Yin ojabꞌ yoc junoj mactxequel watxꞌil che yaoc je naꞌbꞌal.
Techa ojabꞌ tzet chi yun wanojxa ey jex.
13 Cꞌam ojabꞌ chi kaecꞌ spaj tet ebꞌ.
Akꞌwej mimancꞌulal yin ebꞌ chi alon junoj kꞌane je yin.
Jaxca jix yun yakꞌon mimancꞌulal Cristo kin,
jaxca ojabꞌ tuꞌ chi kute kakꞌon pax mimancꞌulal.
14 Yetoj pax junxa tiꞌ caw sowalil chi kunne.
Sowalil ojabꞌ chi cu camcꞌulne cu bꞌa.
Ta ey cu camcꞌulal,
oj skeꞌ kunen masanil wanxa chi wal tiꞌ an.
Jaꞌ camcꞌulal tuꞌ chi akꞌon tzꞌajna el masanil.
15 Yutol awtebꞌil jon yu Dios,
yuxan sowalil chi kun masanil yin watxꞌcꞌulal.
Jaꞌ Cristo chi akꞌoni,
yet watxꞌ chi skeꞌ tol chi cu ee ecꞌ yin watxꞌcꞌulal yin cu pixan yutol junxane kei,
yetoj pax oj,
chi kal yu diosalil tet.
16 Jijewej ẍejbꞌanil Cristo.
Jelan che yute je bꞌa yet che cuylen je bꞌa,
cꞌal yet che yiptzelen je bꞌa.
Bꞌitnewej salmo yetoj himno,
cꞌal wanojxa bꞌit yet Dios.
Bꞌitnewej tet Dios,
jaxca tuꞌ lalan je yalon yu diosalil tet Dios yin masanil je cꞌul.
17 Yal cꞌal tzet chi el je yuneni,
ma tzet chi el je yaloni,
jaxca ojabꞌ tol jaꞌ Naj Kaawil jix jex chejoni,
jaxca ojabꞌ tuꞌ che yunne.
Alwej pax yu diosalil tet cu Mam Dios yu Cristo.
Sbꞌeybꞌal Ebꞌ Creyente Snan Xol Ánima
18 Jex istile,
jijewej tzet chi yal je yichamil ey jex.
Smoo che yun jaxca tuꞌ yet eyoc je cꞌul yin Naj Kaawil.
19 Jaex ichamile jex,
camcꞌulnewej je yistil junjun jex.
Manche je yiꞌtej cuscꞌulal yibꞌan je yistil.
20 Yetoj jex uninale,
jijewej masanil tzet chi yal je mam je txutx ey jex,
yutol jaxca tuꞌ chi tzala Naj Kaawil je yetoj,
cꞌal smoo chi yun ebꞌ creyente jaxca tuꞌ.
21 Jal jaex mame,
txutxe jex,
manche je txꞌem cajtza je yuninal,
yet watxꞌ cꞌam che txꞌem cusa scꞌul ebꞌ.
22 Jacꞌalaꞌ pax jaex yakꞌomal servil je yei,
jijewej masanil tzet chi yal je yaawil bꞌey yul yibꞌankꞌinal tiꞌ.
Man ojabꞌ asanne oj yet tꞌanan oc ebꞌ je yin catuꞌ caw chex mulnai,
yet watxꞌ chi tzala ebꞌ je yetoj,
je naꞌoni,
tol ojabꞌ caw chex mulnai,
yutol jaꞌ Dios miman yeloc apnoj yul je sat.
23 Masanil cꞌal tzet chi el je yuneni,
unwej yin masanil je cꞌul.
Jaxca ojabꞌ tol jaꞌ tet Naj Kaawil chex mulnai.
24 Yutol kotajxa tol jaꞌ Naj Kaawil oj yakꞌ spaj ey jon jaxca jix yun yakꞌon can stiꞌ ey jon.
Yutol lalan kakꞌon servil Cristo,
Naj Kaawil.
25 Jal mac chi unen spenailal,
oj ẍaꞌ spaj ebꞌ yu tzet man watxꞌoj chi el yunen tuꞌ.
Jatacꞌalaꞌ tzet jix el yunen junjun mactxequel,
queytuꞌ oj yun spajtzen Dios tet ebꞌ.