2
Chi walon jaxca tuꞌ yutol chi woche chi naꞌcha el je yu,
tzet utbꞌil caw chin mulna jex wakꞌon servil cꞌal ebꞌ creyente a Laodicea.
Chi wakꞌ pax servil masanil ebꞌ creyente cꞌamto bꞌey chin iloni.
2 Chi wun jaxca tuꞌ yu chi akꞌle stecꞌanil je naꞌbꞌal,
catuꞌ junxane che yun can yin camcꞌulalil,
yet watxꞌ,
watxꞌ chi yun snaꞌcha el je yu.
Chi yal yeloc apnoj tol yel watxꞌ je yotaj masanil tzet jix xꞌoxel Dios yin Naj Cristo.
3 Asan yu Cristo chi skeꞌ snaꞌcha el masanil sjelanil Dios ku,
cꞌal masanil tzet yotaj pax oj.
4 Chi waltoj wan tiꞌ ey jex,
yet watxꞌ cꞌam mac chi iꞌon eytej je sat yetoj montebꞌal kꞌane,
yutol ey mac caw jelan yalon yet ey jex.
5 Caxcꞌal cꞌam chin ecꞌ yin jin mimanil je yetoj tituꞌ,
jaxca wal tol chin ecꞌ je yetoj yet chex jin naꞌontej.
Yuxan,
caw chin tzala yet chi wabꞌeni,
tol watxꞌ je yakꞌon tituꞌ.
Tecꞌan cꞌal che yute je cꞌul yin Cristo.
6 Yu jun tuꞌ,
yuxan jaxca jix yun je chaꞌon Jesucristo je Yaawiloj.
Jaxca tuꞌ che bꞌeybꞌalne jaxca tol junxane jex yetoj.
7 Sowalil caw che yotajne el Naj.
Caw che yaoc je naꞌbꞌal yin,
jaxca chi yun stoo xeꞌ teꞌ xol txꞌotxꞌ.
Caw chex cuywi yintaj Naj.
Sowalil caw che yaoc je cꞌul yin tzettaj yetal yel,
jaxca jix yun yakꞌle je cuyuꞌ,
catuꞌ alwej yu diosalil tet Dios tobꞌalkꞌinal.
8 Che yil cꞌal je bꞌa.
Manche je chaꞌ etex el je naꞌbꞌal yu wan ebꞌ chi alon el tzet chi scuyuꞌ.
Caw jelan ebꞌ yin lekꞌtiꞌal,
cꞌam cꞌal niꞌoj yeloc apnoj tzet chi yal ebꞌ tuꞌ.
Asanne scuybꞌanil yichmam ebꞌ chi yalaꞌ,
cꞌal wanojxa cuybꞌanile yul yibꞌankꞌinal tiꞌ,
yutol manaj bꞌey Cristo chi tit jun yet ebꞌ tuꞌ.
9 Jaꞌ yet eyoc Cristo yin smimanil,
tzꞌajan yeoc Dios yin.
10 Yuxan,
caw tzꞌajan jon xa tinaniꞌ,
yutol junxane keoc yetoj,
yuxan tzꞌajan jon xa tinaniꞌ.
Jaꞌ Naj eyoc yaawil yibꞌan masanil,
ebꞌ ey yopiso,
ma ebꞌ yaawil cꞌam chi kiloc yin.
11 Jaꞌ tinaniꞌ,
jaxca tol akꞌbꞌil jex xa circuncidar,
* yutol junxane je yeoc yetoj Cristo.
Manaj jaxca circuncisión chi oc yin cu mimanil tiꞌ.
Jaꞌ jun yechel eyoc kin,
tol jix elcan masanil cu penail yu Cristo.
12 Jaꞌ yet jix jex akꞌle bautizar,
jaxca tol junne jix yun je mujle yetoj Cristo yul sat Dios.
Yetoj pax oj,
junxane jix yun je pitzcꞌu a yetoj yutol che yaoc je cꞌul yin yipal Dios.
Jaꞌ Dios tuꞌ jix pitzcꞌunen a Cristo xol ebꞌ camnaj.
13 Jaꞌ yet yalantoj,
camnaj jex el yul sat Dios yu je penail catuꞌ che jijen je pena ochwanil.
Man pax sconobꞌoj jex Dios.
Jal tinaniꞌ,
junne jix yute yakꞌon Dios je kꞌinal yetoj Cristo,
catuꞌ jix yakꞌon lawoj cu penail.
14 Ey jun tzetyetal jaxca tol cu jec eyoc kibꞌan yet yalantoj,
yutol ma cu jije sley Dios.
Jaꞌ tinaniꞌ,
jaꞌ Dios jix akꞌon lawoj jun jaxca tol yuunal cu jec tuꞌ.
Jix yiꞌel kibꞌan yet jix cam Cristo yin culus.
15 Jaꞌ yet jix cam Cristo yin culus tuꞌ,
jix yakꞌ eyqꞌuey wan ey yopiso,
wan eyoc yaawilal.
Jaꞌ sattaj ánima,
jix xꞌox eloj,
tol cꞌam niꞌoj yeloc apnoj ebꞌ.
Jix can ebꞌ yalan yu yin junelne.
16 Yuxan,
manche je yaoc yin je cꞌul ta ey mac chi yal tol ey je penail yu che loꞌ junoj tzetyetal,
ma yu che yucꞌ junoj tzetyetal,
cꞌal yu cꞌam yeloc apnoj wan kꞌin yul je sat,
jaxca jun kꞌin yet chi ali xꞌaaw,
ma yu wan scꞌual xewilal.
Man je chaꞌ je yabꞌ tzet chi yal ebꞌ.
17 Yutol jaꞌ masanil wan tiꞌ,
asan chi xꞌox eloj tol ey junojxa tzet tol to oj juloj.
Jaꞌ tzet jaꞌcaw chi tit bꞌey Cristo.
18 Manche je yaoc yin je cꞌul tzet chi yal ebꞌ chi alon tol ey je penail,
ta chi yecꞌbꞌane sbꞌa ebꞌ,
yutol ey tzetyetal yotaj,
yutol jix yil yin jun jaxca weyiche.
Chi yal ebꞌ tol sowalil caw yeynajil chi kute cu bꞌa,
catuꞌ sowalil chi kiꞌey cu bꞌa tet ebꞌ ángel.
Comon cꞌal chi yecꞌbꞌane sbꞌa ebꞌ,
caw jelan ebꞌ snaꞌoni.
Jaꞌ spena yochwanilal ebꞌ chi akꞌon mandar.
19 Catuꞌ cꞌam chi yaoc snaꞌbꞌal ebꞌ yin Cristo.
Jaꞌ Cristo jaxca tol cu jolom,
jaon tiꞌ smimanil Naj kei,
yutol junxane keoc yetoj Cristo.
Jaꞌ chi akꞌon kip,
cꞌal chi chꞌibꞌ cu naꞌbꞌal yu Naj.
Chi cu sloꞌtzen Naj,
catuꞌ yu Naj,
yuxan junxane chi kun can eyoj.
20 Jaꞌ tinaniꞌ,
jix cu cam yetoj Cristo yul sat Dios.
Cꞌamxa yeloc apnoj wan comon cuybꞌanile yet yul yibꞌankꞌinal tiꞌ ku tinaniꞌ.
Yuxan,
manche je jije wan comon chejbꞌanile yet ánima tiꞌ,
jaxca tol,
tol to che yun wan bꞌeybꞌale yet yul yibꞌankꞌinal tiꞌ.
21 Wan chejbꞌanile chi yalaꞌ tol,
“ey wan tzetyetal cꞌam chi skeꞌ che loꞌ,
cꞌam chi skeꞌ che yabꞌle cꞌam chi skeꞌ che mitxꞌa,”
ẍi.
22 Jal pax masanil wan chi al-le tol ey sleyal tuꞌ,
cꞌam yeloc apnoj ku tinaniꞌ,
yutol jaꞌ wan tuꞌ,
chi cu kꞌanbꞌalne cꞌaltaꞌa,
eyman chi lawi pax eloj.
Jaꞌ wan chi al-le tuꞌ,
comon chejbꞌanile yei.
Ánima chi naꞌon wan cuybꞌanile tuꞌ yul yet.
23 Yel toni,
quichan watxꞌ wan chejbꞌanile tuꞌ.
Chi ton yaltej tol ey junoj mac tet chi kal cu bꞌa.
Sowalil chi kiꞌey cu bꞌa,
sowalil chi kakꞌ techa syaꞌilal cu mimanil tiꞌ.
Jal wan tuꞌ,
cꞌam niꞌoj yopiso cu stenon oc tucan kunen yochwan cu mimanil yin tzet man watxꞌoj.