2 Jix cu oc yul jun barco a conobꞌ Adramitio.

Jaꞌ teꞌ barco tuꞌ,

tꞌinan yecꞌ teꞌ bꞌey wan lugar bꞌey stiꞌlaj yet Asia.

Jix too naj Aristarco ketoj,

naj a conobꞌ Tesalónica yul yet Macedonia.

3 Jaꞌ yet junxa cꞌual catuꞌ jix cu apni bꞌey conobꞌ Sidón.

Jaꞌ naj Julio tuꞌ caw watxꞌ jix yute scꞌul naj yin Pablo tuꞌ tituꞌ,

yutol jix yakꞌ permiso naj cu bꞌet kꞌanabꞌ yetoj ebꞌ yamigo catuꞌ chi akꞌle servil niꞌoj yu ebꞌ.

4 Catuꞌ jix cu el bꞌey Sidón tuꞌ,

jix cu ecꞌ scawilal jun joyan txꞌotxꞌ snan jaꞌ mar chi yij Chipre,

chi kil can ecꞌtoj bꞌey cu qꞌuexan kꞌabꞌ,

yutol man jichanoj cu yiꞌon bꞌey kaꞌeꞌ.

5 Jix cu ecꞌ yibꞌan jaꞌ mar bꞌey stiꞌ oc jun lugar chi yij Cilicia yetoj Panfilia.

Catuꞌ jix cu apni bꞌey conobꞌ chi yij Mira,

yul yet Licia.

6 Catuꞌ jix seyon ecꞌ junojxa cu barco naj capitán tituꞌ.

Ey jun barco a Alejandría tuxa chi too bꞌey Italia jix ilcha yu naj,

yuxan jaꞌ yul jix cu oc yu,

catuꞌ jix cu toi.

7 Ecꞌal cꞌual jix cu bꞌeyi,

yutol cꞌuancꞌulal cꞌal yakꞌon teꞌ barco tuꞌ.

Catuꞌ jix cu apni sattaj eltoj conobꞌ Gnido.

Catuꞌ jix cu ecꞌ scawilal conobꞌ chi yij Salmona.

Catuꞌ jix cu ecꞌ bꞌey Creta bꞌey jun joyan txꞌotxꞌ snan jaꞌ,

yutol jacꞌalaꞌ man tooloj sbꞌey jun kaꞌeꞌ tuꞌ.

8 Tucꞌal chi cu ecꞌ stiꞌlaj jun lugar Creta tuꞌ,

masantaꞌcꞌal jix cu apni bꞌey jun lugar chi yij Watxꞌ Yocbꞌal Tucan Barco,

bꞌey scawilal conobꞌ chi yij Lasea.

Caw yaꞌtaj jix yun kapni tituꞌ.

9 Ecꞌal cꞌu jix cu ecꞌ tituꞌ.

Catuꞌ jix apni stiempoal tol caw ey smey yecꞌ barco yibꞌan jaꞌ yet tuꞌ,

yutol xax ecꞌ scꞌual kꞌin chi yij skꞌinal yet chi akꞌle mimancꞌulal yin cu penail.

Jix yakꞌon naꞌbꞌale naj Pablo tet ebꞌ tuꞌ.

10 Jix yalon naj jaxca tiꞌ:

—Jex wuẍtaj,

caw ey smey cu bꞌey yibꞌan jaꞌ tinaniꞌ chi wil an.

Oj etextoj teꞌ barco cꞌal masanil ijatz,

catuꞌ ey smey chi cu cami,

ẍi Pablo tet ebꞌ.

11 Ma cꞌaltaꞌ ẍaꞌ yabꞌ naj capitán tuꞌ tzet jix yal naj Pablo tuꞌ.

Asan tzet jix yal naj chi lekꞌon barco yetoj tzet jix yal naj a barco,

asan jix ẍaꞌ yabꞌe.

12 Jaꞌ bꞌey jun lugar tuꞌ,

cꞌam bꞌey watxꞌ scancan barco yibꞌan jaꞌ tituꞌ yet nabꞌilkꞌinal.

Yuxan,

txenxane man masaniloj ebꞌ chi snaꞌ tol yel watxꞌ chi tocꞌal ebꞌ.

Yet watxꞌ chi apni ebꞌ bꞌey conobꞌ Fenice bꞌey yul yet Creta.

Jaꞌ tituꞌ chi yoche ebꞌ chi yechbꞌane yecꞌ nabꞌilkꞌinal,

yutol man jow oj slow kaꞌeꞌ tituꞌ.

13 Yin cꞌuancꞌulal jix yun scꞌoli stit jun kaꞌeꞌ tuꞌ bꞌey sur.

Jix snaꞌon ebꞌ tol watxꞌ chi cu toi.

Catuꞌ jix cu toi.

Jix cu ecꞌ scawilal stiꞌlaj Creta tuꞌ.

14 Yin jun jix too txolan tuꞌ,

catuꞌ jix tit jun miman kaꞌeꞌ chi ecꞌ bꞌey jun txꞌotxꞌ tuꞌ.

15 Jix makꞌle ecꞌ tzꞌeyna teꞌ barco tuꞌ yu jun miman kaꞌeꞌ tuꞌ.

Manxa jichanoj sbꞌey teꞌ yu.

Yuxan jix cu bꞌej cu lekꞌoni,

catuꞌ jix cu too bꞌey chi yoche chi cu too yu jun kaꞌeꞌ tuꞌ.

16 Jix cu ecꞌ yintaj jun yaliẍ joyan txꞌotxꞌ ey snan jaꞌ mar chi yij Cauda.

Manxa wal jowoj yecꞌ kaꞌeꞌ tituꞌ jaxca jix yun yet sbꞌabꞌelal.

Ey jun cu yaliẍ barco tokꞌbꞌil oc yu teꞌ miman tuꞌ.

Caw yaꞌtaj jix yun yelcan yibꞌan jaꞌ ku.

17-18 Jaꞌ yet jix cu tokꞌon atej teꞌ xin,

catuꞌ jix bꞌakꞌle can oc lasu yin teꞌ miman barco tuꞌ yu scawxi canoj.

Tutun chi xiw ebꞌ tala cꞌuxan chi smakꞌ ey sbꞌa teꞌ barco tuꞌ yibꞌan jun tujan arena chi yij Sirte bꞌey chi melmon sat jaꞌ tuꞌ.

Yuxan jix xuyle eytej skꞌapil teꞌ eyatoj yibꞌan,

jun chi iꞌon bꞌey yu ebꞌ tuꞌ.

Wan an bꞌey chi low kaꞌeꞌ.

Jix cu cancan jaxca tuꞌ catuꞌ tucꞌal jix iꞌletoj teꞌ yu kaꞌeꞌ tuꞌ.

Catuꞌ jix ẍaꞌon el yich ebꞌ skꞌojon eytoj yijatz teꞌ xol jaꞌ.

19 Oxebꞌxa cꞌu tuꞌ xin,

catuꞌ jaon tiꞌ jix cu kꞌojon eltoj smitxꞌkꞌabꞌil teꞌ barco tuꞌ xol jaꞌ.

20 Ecꞌal cꞌual ma kil yin sat cꞌu yetoj weycan.

Tutun caw jow slow jun kaꞌeꞌ tuꞌ kin xin,

cꞌamxa chi cu naꞌ ta tol oj cu colcha can eloj.

21 Ecꞌal cꞌual cꞌamxa loꞌo chi kunne.

Catuꞌ jix a linan Pablo snan xol ebꞌ tuꞌ,

catuꞌ jix yalon jaxca tiꞌ:

—Jex wuẍtaj,

ta jix je jije tzet jix wal ey jex an,

tol man watxꞌoj cu tit bꞌey Creta tuꞌ.

Ta ma cu tita,

ma lawoj el niꞌoj je tzetyetal.

22 Chi wal pax ey jex an,

manche jex xiwi,

yutol cꞌam junoj jon oj cu camoj.

Jal teꞌ barco tiꞌ xin,

oj lawoj el teꞌ.

23 Jaꞌ yet maꞌi akꞌbꞌalil tiꞌ,

jix jul xꞌox ecꞌ sbꞌa jun yángel Dios ey jin an,

jaꞌ Dios chi wakꞌ servil yutol yet jin xa Dios an.

24 Jix yal jun ángel tuꞌ ey jin jaxca tiꞌ an:

“Manche jaach xiw jaach Pablo,

sowalil oj jaach apnoj sattaj naj yaaw bꞌey Roma.

Catuꞌ oj colcha el masanil ebꞌ eyoc yul barco tiꞌ yu swatxꞌcꞌulal Dios,”

ẍi jun ángel tuꞌ ey jin an.

25 Yuxan,

manche jex xiw wuẍtaj.

Chi waoc Dios tuꞌ yipoj jin cꞌul,

sowalil oj yun tzet jix yal can jun ángel tuꞌ ey jin an.

26 Tol sowalil oj cu kꞌojle can el bꞌey jun joyan txꞌotxꞌ snan jaꞌ,

ẍi naj Pablo tuꞌ tet ebꞌ.

27 Yin xa scanlajonial,

catuꞌ jix cu apni bꞌey jun jaꞌ mar Adriático,

tuxa cꞌal chi cu kꞌaxbꞌon ecꞌ yibꞌan jun mar tuꞌ yu kaꞌeꞌ.

Jaꞌ yet chuman akꞌbꞌal,

jaꞌ snaꞌon ebꞌ naj chi mulna yul teꞌ barco tuꞌ tol lalanxa kapni yetoj teꞌ scawilal junoj txꞌotxꞌ.

28 Catuꞌ jix yechen ebꞌ naj jantaj snaatil yich jaꞌ.

Ey mi junoj cuarenta vara yich jaꞌ.

Jix bꞌeytoj janicꞌ xa teꞌ sattaj,

catuꞌ jix yechen ebꞌ naj junelxa.

Treinta vara xane mi yich jaꞌ yet tuꞌ.

29 Chi xiw ebꞌ tala cꞌuxan chi smakꞌey sbꞌa teꞌ yibꞌanlaj chꞌen chꞌen yul jaꞌ.

Yuxan jix bꞌejletoj tꞌununoj canebꞌ mitxꞌbꞌanil ebꞌ yu yoc tucan teꞌ barco tuꞌ yintaj ẍop teꞌ.

Catuꞌ jix yechbꞌanen sajbꞌi el ebꞌ.

Jix yoche ebꞌ tol yin eymanil chi sajbꞌi eloj.

30 Jix yoche ebꞌ chi mulna yul teꞌ tuꞌ chi eltej teꞌ barco yin eymanil.

Yuxan jix sbꞌej eytoj tꞌununoj teꞌ yaliẍ barco ebꞌ yul jaꞌ.

Jix yute yalon ebꞌ,

tol jaꞌ chꞌen mitxꞌbꞌal,

oj yaeytoj ebꞌ sattaj,

yet watxꞌ cꞌam mac otajnen el tzet chi yun ebꞌ.

31 Jaꞌ naj Pablo,

jix alon a tet naj capitán yetoj tet ebꞌ soldado tzet lalan yunen ebꞌ tuꞌ.

—Ta chi el ebꞌ naj tiꞌ yul barco tiꞌ,

ma jex colcha el jaex tiꞌ,

ẍi naj tet ebꞌ.

32 Eyman jix skꞌuptoj xꞌanil jun yaliẍ barco tuꞌ ebꞌ soldado tuꞌ.

Catuꞌ jix too teꞌ yibꞌan jaꞌ.

33 Jaꞌ yet lalanxa sajbꞌi,

catuꞌ jix yalon Pablo tet ebꞌ masanil,

tol sowalil chi low niꞌoj ebꞌ,

jix yal jaxca tiꞌ:

—Caabꞌxa semana cꞌam chex weyi,

catuꞌ cꞌam chex low pax oj.

34 Yuxan,

jaꞌ tinaniꞌ,

chin kꞌan ey jex,

lowoj jonwej niꞌoj,

yet watxꞌ oj oc kip.

Cꞌam junoj mac oj cam cu xol tiꞌ.

Tol tax cꞌam junoj xil je jolom oj elcanoj,

ẍi naj Pablo tuꞌ tet ebꞌ.

35 Yet jix lawi yalon jaxca tuꞌ,

catuꞌ jix yiꞌontej jun pan.

Catuꞌ jix yalon yu diosalil tet Dios sattaj ebꞌ masanil.

Jix xion ey snan ixim tuꞌ,

catuꞌ jix cꞌoli slowi.

36 Catuꞌ jix oc yip scꞌul masanil ebꞌ,

yutol jix low ebꞌ.

37 Ey 276 cu bꞌisil jaon ey jon oc yul teꞌ barco tuꞌ.

38 Yet jix lawi cu low tuꞌ xin,

catuꞌ jix skꞌojon can eytoj wanxa ixim tiriw ebꞌ xol jaꞌ yet watxꞌ chi sebꞌbꞌi a teꞌ barco tuꞌ.

39 Jaꞌ yet jix sajbꞌi xin,

catuꞌ jix yilontoj yin txꞌotxꞌ txꞌotxꞌ ebꞌ chi mulna yul teꞌ barco tuꞌ.

Man pax yotaj oj ebꞌ tzet lugaril bꞌey ey jun txꞌotxꞌ txꞌotxꞌ tuꞌ.

Jix yiltoj jun skꞌabꞌ mar ebꞌ chi eli,

arenalaj xacꞌal stiꞌlaj.

Catuꞌ jix snaꞌon ebꞌ yakꞌlen yiꞌontoj teꞌ barco tuꞌ tituꞌ,

tala cꞌuxan chi skeꞌ yapni oc teꞌ.

40 Catuꞌ jix scꞌupon tujcha xꞌanil chꞌen smitxꞌomal oc tucan teꞌ barco tuꞌ ebꞌ.

Catuꞌ jix can chꞌen yich jaꞌ.

Jix xuyon el xꞌanil slecꞌbꞌanil teꞌ ey eytoj xol jaꞌ ebꞌ yet watxꞌ chi skeꞌ slekꞌon bꞌey teꞌ ebꞌ junelxa.

Jix yaon a skꞌapil teꞌ ebꞌ bꞌey chi low kaꞌeꞌ tuꞌ,

catuꞌ chi bꞌey teꞌ.

Catuꞌ jix too teꞌ bꞌey stiꞌlaj el jaꞌ bꞌey ey arena tuꞌ.

41 Jix smakꞌ cꞌal ey sbꞌa teꞌ yibꞌan yarenail yich jaꞌ,

jix toocan txꞌapan xaam teꞌ xol txꞌotxꞌ.

Cꞌamxa chi bꞌilwi niꞌoj.

Jal pax ẍop teꞌ xin,

jix makꞌle wejcha yu yip jaꞌ.

42 Jix yochen ebꞌ soldado jix smakꞌ cam ebꞌ presowom eyoc yul teꞌ tuꞌ,

yet watxꞌ cꞌam junoj ebꞌ chi smakꞌ el sbꞌa yibꞌan jaꞌ catuꞌ chi elaoj.

43 Jal pax naj capitán tuꞌ,

chi yoche naj chi scol can el Pablo.

Yuxan,

ma ẍaꞌ naj makꞌle cam ebꞌ presowom tuꞌ.

Catuꞌ jix yalon naj tol jaꞌ ebꞌ chi skeꞌ smakꞌon jaꞌ,

jaꞌ ebꞌ chi smakꞌ el sbꞌa sbꞌabꞌelal,

catuꞌ chi ecꞌ apnoj ebꞌ stiꞌ txꞌotxꞌ.

44 Jaꞌ ebꞌ cꞌam chi skeꞌ smakꞌon jaꞌ xin,

ey ebꞌ jix ecꞌtoj yibꞌan chemteꞌ.

Ey ebꞌ jix ecꞌtoj yibꞌan steꞌal teꞌ barco tuꞌ.

Jaxca tuꞌ jix kute ecꞌtoj cu bꞌa,

yuxan jix cu colcha can el cu masanil,

catuꞌ jix cu ecꞌ apnoj stiꞌ txꞌotxꞌ.