—Chi skeꞌ cha wal ja bꞌa tinaniꞌ xin,

ẍi naj tet Pablo.

Catuꞌ jix yiꞌon a skꞌabꞌ naj Pablo tuꞌ yu stzꞌini ey ebꞌ,

catuꞌ jix ẍaꞌon el yich yalon jaxca tiꞌ:

2 —Jaach Mamin rey Agripa,

caw chin tzala an,

yutol cha chaꞌ wal jin bꞌa ey jaach an.

Chi woche chi wiꞌel masanil tzet jix yaoc ebꞌ Israel tiꞌ wibꞌan an.

3 Yel ton watxꞌ chi wal ey jaach an,

yutol ja wotajxa cu ley jaon Israel jon tiꞌ.

Ja wotajxa tzet yinal chi cu teele cu bꞌa jon.

Yuxan chin kꞌan ey jaach an.

Miman cha wute ja cꞌul win an,

catuꞌ cha wabꞌen tzet oj wal an.

4 Yotaj masanil ebꞌ wet Israelal tzet utbꞌil yili jin bꞌeybꞌal yet jix jin titoc yin jin yaliẍal bꞌey jin conobꞌ,

cꞌal bꞌey Jerusalén.

5 Ta chi yoche ebꞌ chi yalaꞌ,

chi skeꞌ yalon ebꞌ,

tol Fariseo jin yin tax wachꞌeal.

Jaꞌ ebꞌ Fariseo tuꞌ,

yel jijem ebꞌ yin cu cuybꞌanil tet wanojxa.

6 Jal pax tinaniꞌ chin yakꞌ pax queja ebꞌ,

yu cꞌal tol chi waoc yipoj jin cꞌul,

tol oj akꞌle pitzcꞌu a ebꞌ camnaj yu Dios,

jaxca jix yute yakꞌon can stiꞌ Dios tet ebꞌ kichmam.

7 Jaꞌton ebꞌ lacawebꞌ bꞌulan wet Israelal,

echbꞌanebꞌil yunen el tzet yalnaj can Dios ku,

cu masanil jon.

Yuxan chi yiꞌatej scꞌul ebꞌ yakꞌon servil Dios cꞌualil cꞌal akꞌbꞌalil.

Mamin rey Agripa,

yu cꞌal tol chi wechbꞌane yunen el jun tuꞌ,

yu cꞌal tuꞌ,

yuxan chin yakꞌ queja ebꞌ Israel tiꞌ tinaniꞌ.

8 ¿Tzet yuxan,

cꞌam che yaoc yin je cꞌul jaex a Israel jex tol chi pitzcꞌu a ebꞌ camnaj yu Dios?

9 Jaꞌ jin naꞌon yet yalantoj an,

tol watxꞌ ta miman tzet chi el wunen an,

yet acꞌul jin oc yin ebꞌ yet Jesús a Nazaret an.

Jaꞌ jin naꞌoni,

tol watxꞌ chi wute jin bꞌa an.

10 Queytuꞌ wutenaj jin bꞌa bꞌey Jerusalén.

Ocnaj wopiso yu ebꞌ yaawil yakꞌomal xaambꞌal tet Dios.

Yuxan,

ecꞌal ebꞌ creyente wanaj oc preso an.

Jain jun chi wal wet yet chi makꞌle cam ebꞌ.

11 Ecꞌal el cꞌal etnebꞌil ebꞌ wu an,

yet watxꞌ cꞌamxa chi yaoc scꞌul ebꞌ yin Jesús,

jin naꞌoni.

Jaxca cꞌal tuꞌ jix ecꞌ wute an bꞌey junjun snail sculto ebꞌ wet Israelal an.

Caw chi chichon jin cꞌul yin ebꞌ an.

Catuꞌ jix jin bꞌet pax bꞌey wanxa txꞌoj conobꞌal naat,

yu cꞌal wetnen ebꞌ an.

12 Yu jin chichoncꞌulal tuꞌ,

yuxan jix jin to bꞌey conobꞌ Damasco junel.

Jix akꞌle wopiso yu ebꞌ yaawil yakꞌomal xaambꞌal tet Dios,

catuꞌ jix jin chejletoj yu ebꞌ an.

13 Jal jaach Mamin rey,

oj waltej ey jaach tzet jix yunne.

Lalan jin bꞌey yet chuman mi cꞌu,

catuꞌ jix wilon jun sajkꞌinal jix tit kopna satcan.

Ecꞌbꞌan sajil yintaj sajil yajan cꞌu,

catuꞌ jix eyol kopna wibꞌan cꞌal yibꞌan ebꞌ wetbꞌi an.

14 Jix cu telcꞌo cu masanil jon yu jun sajkꞌinal tuꞌ.

Catuꞌ jix wabꞌen yoc jayebꞌ kꞌane yin stiꞌ Hebreo jaxca tiꞌ:

“Saulo,

Saulo,

¿tzet yuxan chin ja wetne an?

Jaach cꞌal cha wetne ja bꞌa ja txꞌojli,

jaxca junoj noꞌ wacax chi tejle oc teꞌ eel yin,

catuꞌ chi tecꞌwa yin xaam teꞌ teꞌ tuꞌ,

quey jaach pax tuꞌ,”

ẍi ey jin an.

15 “¿Mac jaach txequel Mamin?”

jin chi tet.

Catuꞌ jix yalon Naj Kaawil tuꞌ ey jin jaxca tiꞌ an:

“Jain ton Jesús jin,

lalan jin ja wetnen an.

16 Aan linanoj.

Chin jul jin txꞌox jin bꞌa ey jaach an,

yet watxꞌ oj jin ja wakꞌ servil,

catuꞌ oj ja walon el skꞌaneal tzet jix ja wil tiꞌ,

cꞌal jantaj tzet tol to oj jin txꞌox ey jaach an.

17 Jaꞌ tinaniꞌ,

chach jin chejtoj bꞌey ebꞌ man Israeloj.

Oj jaach jin colel yul skꞌabꞌ ebꞌ an yetoj cꞌal yul skꞌabꞌ ebꞌ ja wet Israelal.

18 Chach jin chejtoj bꞌey ebꞌ,

yu too ja wakꞌon can snaꞌbꞌal ebꞌ,

yet watxꞌ chi sbꞌejcan sbꞌeybꞌalnen kꞌejkꞌinal ebꞌ,

catuꞌ chi oc ebꞌ yin sajkꞌinalil yet Dios,

cꞌal yu yelcan ebꞌ yul skꞌabꞌ naj diablo,

catuꞌ chi oc can ebꞌ yul skꞌabꞌ Dios.

Yu pax jin yaon oc ebꞌ yin scꞌul,

yet watxꞌ chi akꞌle can lawoj spenail ebꞌ yibꞌan.

Catuꞌ oj oc can ebꞌ stzꞌajiloj ebꞌ ocnaj xa yetoj Dios tuꞌ,”

ẍi Jesús ey jin an.

19 Yuxan,

Mamin rey Agripa,

jix jin jije tzet jix yal can Jesús ey jin an,

yet jix tit satcan catuꞌ jix xꞌoxon el sbꞌa ey jin an.

20 Yuxan,

jaꞌ bꞌey Damasco tuꞌ,

jatuꞌ jix bꞌabꞌi walel skꞌane Dios.

Catuꞌ jix jin ecꞌ walon el bꞌey Jerusalén,

cꞌal bꞌey junjun conobꞌ yul yet Judea tuꞌ.

Jix walon pax yabꞌ ebꞌ man Israeloj,

tzet utbꞌil tol chi snaꞌ sbꞌa scꞌul ebꞌ,

catuꞌ chi yaon oc snaꞌbꞌal ebꞌ yin Dios.

Catuꞌ jix walon tet ebꞌ,

tol sowalil watxꞌ chi yute sbꞌeybꞌal,

yet watxꞌ miman txequel tol chi snaꞌ sbꞌa scꞌul ebꞌ.

21 Yu cꞌal jun tuꞌ xin,

yuxan jix jin smitxꞌ ebꞌ Israel bꞌey yul stemplo Dios.

Catuꞌ chi yakꞌon yip ebꞌ jin smakꞌon cam an.

22 Tol yu cꞌal pax scolwal Dios wetoj an,

yuxan,

tecꞌan cꞌal chi wute jin bꞌa an.

Jacꞌalaꞌ jin pax tinaniꞌ,

tecꞌan cꞌal chi wute jin bꞌa walon el skꞌane Dios tet masanil ánima an.

Chi cꞌal wal tet ebꞌ mimej winaj,

cꞌal tet ebꞌ yeynajil.

Jaꞌ tzet chi wal an,

laan cꞌal yetoj tzet jix yal ebꞌ ẍejabꞌ Dios peyxa yetoj Moisés yin eyojto.

Asan jun tuꞌ chi waleloj,

23 catuꞌ chi walon eloj tol jaꞌ Cristo sowalil jix yabꞌ syaꞌil catuꞌ jix cami.

Jaꞌ yet jix cam naj,

jaꞌ naj jix bꞌabꞌi pitzcꞌu pax a xol ebꞌ camnaj.

Queytuꞌ jix yute yalon el skꞌaneal colbꞌanile tet ebꞌ ket conobꞌ,

cꞌal tet masanil ebꞌ ánima,

ẍi Pablo tet naj rey.

24 Lalan yalon sbꞌa Pablo tuꞌ catuꞌ jix a jucna Festo,

catuꞌ jix yalon jaxca tiꞌ:

—Caw loco jaach cha Pablo.

Miman tzet cha cuyuꞌ,

yuxan chach oc locoal yu,

ẍi naj tet Pablo.

25 Catuꞌ jix takꞌwi Pablo tuꞌ tet naj jaxca tiꞌ:

—Mamin yaaw Festo,

man loco oj jin an.

Jaꞌ wan kꞌane chi wal ey jex tiꞌ an,

caw yel,

catuꞌ caw miman yeloc apnoj.

26 Jaꞌ naj rey Agripa tiꞌ,

yotaj naj wan tiꞌ sicꞌlebꞌil.

Yuxan tecꞌan chi wute jin bꞌa,

catuꞌ chi walon wan tiꞌ sattaj naj an.

Jaꞌ wan tzet chi wal tiꞌ,

man ewantaj oj yei,

yotaj ebꞌ ánima masanil.

Yuxan wotaj an,

yotaj pax naj rey tiꞌ.

27 Jal jaach rey Agripa,

¿chim ja waoc yin ja cꞌul tzet albꞌilcan yu ebꞌ ẍejabꞌ Dios yet peyxa?

Wotaj an tol cha waoc yin ja cꞌul,

ẍi Pablo tuꞌ.

28 Catuꞌ jix takꞌwi naj rey tuꞌ tet naj Pablo jaxca tiꞌ:

—¿Chim ja naꞌ tol yu niꞌoj cha wal tiꞌ catuꞌ chin oc can creyenteal ja wetoj an?

ẍi naj Agripa.

29 Catuꞌ jix yalon Pablo tuꞌ tet naj jaxca tiꞌ:

—Ta yin txenne kꞌane ma miman kꞌane,

catuꞌ chach oc canoj.

Jaꞌ jun jin txa tet Dios tol jaach tiꞌ cꞌal masanil ebꞌ eyecꞌ titiꞌ ketoj oj oc ebꞌ jaxca jin tiꞌ an,

asan xin,

man oj jex pixle ey yetoj cadena jaxca weoc jain tiꞌ an,

ẍi Pablo tet ebꞌ.

30 Yet jix lawi yalon Pablo wan tiꞌ,

catuꞌ jix a linan naj rey tuꞌ yetoj ix Berenice.

Catuꞌ jix a pax linan naj Festo yetoj masanil ebꞌ yaman ecꞌ yetoj ebꞌ tuꞌ.

31 Catuꞌ jix sjitzon el sbꞌa ebꞌ xꞌojli yu snaꞌon el ebꞌ tzet watxꞌ chi yun yu naj,

catuꞌ jix yalon ebꞌ jaxca tiꞌ:

—Cꞌam junoj spenail jun winaj tiꞌ smoo scam yu,

catuꞌ man smoo oj naj yoc preso,

ẍi ebꞌ.

32 Jix yalon Agripa tet Festo jaxca tiꞌ:

—Ta ma skꞌantoj sbꞌa naj sattaj naj yaaw bꞌey Roma,

chi skeꞌ cu jajon el tinaniꞌ,

ẍi naj tet Festo.