Jaꞌ Yet Jix Apni Pablo Sattaj Naj Festo
25
Jaꞌ yet jix apni naj Festo bꞌey conobꞌ Cesarea tuꞌ yu ẍaꞌon yopiso,
catuꞌ jix oc can yin yaawil.
Caabꞌi to ẍaꞌ yopiso naj tuꞌ,
catuꞌ jix too naj bꞌey Jerusalén.
2 Jatuꞌ jix apni ebꞌ yaawil yakꞌomal xaambꞌal ebꞌ Israel tet Dios scꞌatan naj yetoj wanxa ebꞌ ey yopiso,
yu yakꞌle queja Pablo tuꞌ yu ebꞌ.
3 Jix skꞌan ebꞌ tet Festo tuꞌ,
tol chi iꞌletej Pablo bꞌey Jerusalén tuꞌ.
Jix yal ebꞌ jaxca tuꞌ,
yutol jix yoche ebꞌ tol jaꞌ yul bꞌe jix smakꞌ cam naj ebꞌ.
4 Jix yalon pax naj tet ebꞌ jaxca tiꞌ:
—Preso yeoc Pablo bꞌey Cesarea tinaniꞌ.
Jaꞌ yet to jayebꞌ cꞌu chin apni tituꞌ.
5 Jato yet tuꞌ chi skeꞌ stoo ebꞌ je yaawil bꞌey Cesarea tuꞌ wetoj an.
Ta tol ey smul Pablo tuꞌ,
chi skeꞌ yalon ebꞌ tituꞌ,
ẍi naj tet ebꞌ.
6 Ey mi waxajebꞌoj cꞌu ma laonebꞌoj cꞌu jix bꞌetecꞌ Festo bꞌey Jerusalén tuꞌ.
Catuꞌ jix meltzotoj bꞌey Cesarea.
Jaꞌ yet junxa cꞌual,
catuꞌ jix too bꞌey sdespacho bꞌey chi waꞌxi jowal.
Catuꞌ jix bꞌet yakꞌon awtele Pablo.
7 Jaꞌ yet jix octoj Pablo sattaj,
catuꞌ jix oc joyan ebꞌ Israel jix tit bꞌey Jerusalén tuꞌ yin naj.
Ecꞌal tzet jix tzꞌaj snaꞌa ebꞌ yin,
cꞌam cꞌal niꞌoj tzet chi xꞌox ebꞌ,
ta tol yel chi yal ebꞌ.
8 Yet jix lawi yalon yet ebꞌ xin,
catuꞌ jix yalon sbꞌa Pablo jaxca tiꞌ:
—Cꞌam jin mul chi oc jin tenon tzet chi yal an ley ebꞌ wet Israelal.
Cꞌam jin penail chi oc yin stemplo Dios.
Catuꞌ cꞌam pax tet naj yaaw bꞌey Roma,
cꞌam jin penail chi oc tet naj,
ẍi naj Pablo tuꞌ.
9 Yutol chi yoche pax naj Festo watxꞌ chi can yul sat ebꞌ Israel.
Yuxan jix skꞌanle tet Pablo jaxca tiꞌ:
—¿Chim yoche ja cꞌul chach too bꞌey Jerusalén,
yet watxꞌ jatuꞌ chin naꞌoc ja win?
ẍi naj tet Pablo.
10 Jix takꞌwi Pablo tuꞌ tet naj jaxca tiꞌ:
—Sattaj sdespacho naj yaaw a Roma smoo chin apni.
Asan tituꞌ chi skeꞌ snaꞌle oc win.
Ja wotaj tol caw cꞌam jin penail chi oc tet ebꞌ Israel tiꞌ.
11 Ta tol ey junoj jin penail tol smoo chin cam yu,
cam ojabꞌ jin yu.
Ta cꞌam pax jin penail chi txeclo el yu ebꞌ Israel tiꞌ,
cꞌam junoj mac chi skeꞌ jin yaon oc yul skꞌabꞌ ebꞌ.
Chin kꞌantoj jin bꞌa tet naj yaaw bꞌey Roma.
Jaꞌ naj oj naꞌon tzet oj wunne,
ẍi Pablo tuꞌ tet naj Festo tuꞌ.
12 Jix kꞌanabꞌ Festo tuꞌ yetoj wan ebꞌ yet yaawil chi akꞌon snaꞌbꞌal tet naj.
Catuꞌ jix yalon tet Pablo tuꞌ jaxca tiꞌ:
—Jaach tiꞌ,
cha kꞌantoj ja bꞌa sattaj naj yaaw bꞌey Roma,
yuxan oj jaach watoj an,
ẍi Festo tet naj.
Jaꞌ Yet Jix Apni Pablo Sattaj Naj Rey Agripa
13 Eyxam jayebꞌoj cꞌu tuꞌ catuꞌ jix apni naj rey Agripaa yetoj ix Berenice bꞌey Cesarea tuꞌ,
catuꞌ jix julecꞌ ebꞌ kꞌanabꞌ yetoj Festo yutol jix ẍaꞌ yopiso.
14 Ecꞌal cꞌal cꞌual jix ecꞌ ebꞌ tituꞌ.
Ey jun cꞌual jix yaltej Festo tet naj rey tuꞌ tzet yeoc Pablo.
Catuꞌ jix yalontej jaxca tiꞌ:
—Jaꞌ yet jix el Félix yin yopiso,
ey jun winaj chi yij Pablo ey can oc preso yu.
15 Jaꞌ yet jix jin bꞌetecꞌ Jerusalén,
jix apni ebꞌ yaawil yakꞌomal xaambꞌal ebꞌ Israel tet Dios jin cꞌatan an,
yetoj ebꞌ ichamtaj winaj ey yopiso.
Catuꞌ jix cꞌoli yakꞌon queja Pablo ebꞌ tuꞌ ey jin an.
Jix yoche ebꞌ tol jix wakꞌ orden scami.
16 Jix walon tet ebꞌ jaxca tiꞌ:
“Chi yal pax cu ley jaon a Roma jon tiꞌ,
cꞌam chi skeꞌ tol comon cꞌal chi akꞌle cam junoj mactxequel.
Sowalil chi yil-le oc sat ebꞌ yetoj ebꞌ chi akꞌon queja ebꞌ tuꞌ sattaj yaaw,
catuꞌ chi scolon sbꞌa ebꞌ,”
jin chi tet ebꞌ a Jerusalén tuꞌ.
17 Yuxan,
jaꞌ yet jix jul ebꞌ titiꞌ,
ma jin chaꞌ ecꞌtoj ecꞌaloj cꞌual an.
Yewial tuꞌ,
catuꞌ jix jin octoj chotan yul jin despacho bꞌey chin waꞌne el jowal.
Jix wakꞌon bꞌet tit Pablo tuꞌ.
18 Jaꞌ jin naꞌoni,
tol miman mi spenail.
Jal ebꞌ jix akꞌon queja tuꞌ,
cꞌam tzet jix yaoc ebꞌ yibꞌan jaxca jix wute jin naꞌon tuꞌ.
19 Asan janicꞌ tiꞌ jix yal ebꞌ,
tol ey tzet pena chi yal yin scuybꞌanil ebꞌ.
Catuꞌ jix yalontej ebꞌ yu jun naj chi yij Jesús tol camnajxa.
Jal pax naj Pablo tuꞌ xin,
jaꞌ chi aloni tol iquis pax oj.
Asan yu wan tuꞌ,
yuxan chi yakꞌ queja ebꞌ.
20 Jain tiꞌ,
ma naꞌcha wu tzet chi wute jin waꞌnen el ebꞌ an.
Yuxan jix jin kꞌanle el tet Pablo tuꞌ jaxca tiꞌ:
“¿Chim yoche ja cꞌul chach too bꞌey Jerusalén,
yet watxꞌ jatuꞌ chin naꞌoc ja win?”
jin chi tet.
21 Catuꞌ jix yalon ey jin jaxca tiꞌ an:
“Chin kꞌantoj jin bꞌa sattaj naj yaaw bꞌey Roma an.
Jaꞌ naj oj naꞌon tzet oj wun an,”
ẍi Pablo tuꞌ ey jin an.
Yuxan jix wal an,
tol chi can niꞌojxa preso,
masantaꞌcꞌal oj watoj bꞌey naj yaaw tuꞌ,
ẍi Festo tuꞌ.
22 Jaꞌ yet jix yabꞌen naj rey Agripa wan tuꞌ xin,
jix yalon naj tet Festo tuꞌ jaxca tiꞌ:
—Chi woche chi wabꞌ pax tzet ẍi Pablo tuꞌ jain tiꞌ,
ẍi tet naj.
—Ta jaxca tuꞌ,
yecal to oj ja wabꞌ tzet ẍi naj,
ẍi Festo tuꞌ tet.
23 Jaꞌ yet junxa cꞌual,
catuꞌ jix jul naj rey Agripa tuꞌ yetoj ix Berenice.
Eyxa smey yili ebꞌ yetoj spichil,
catuꞌ jix oc apnoj ebꞌ yul bꞌey chi waꞌxi yeoc jowal tuꞌ yetoj ebꞌ yaawil ebꞌ soldado,
cꞌal wan ebꞌ mimej winaj ey yopiso yu conobꞌ.
Jix bꞌet yakꞌon tit Pablo tuꞌ naj Festo tuꞌ.
24 Catuꞌ jix yalon naj Festo jaxca tiꞌ:
—Mamin rey Agripa,
cꞌal jantaj jex jix je yambꞌa je bꞌa ketoj tiꞌ.
Che yil naj Pablo tiꞌ.
Ecꞌal ebꞌ Israel jix aloni tol ey spenail.
Jix yal ebꞌ bꞌey Jerusalén.
Catuꞌ jix yalon pax ebꞌ ey jin an bꞌey Cesarea tiꞌ.
Caw cꞌam chi sbꞌej ebꞌ skꞌanon camich yibꞌan.
25 Jal chi yun jin naꞌon jain tiꞌ,
cꞌam junoj spenail smoo scam yu.
Jix skꞌantoj sbꞌa naj sattaj naj Augusto,
yaaw bꞌey Roma,
yet watxꞌ chi snaꞌ naj tzet chi yunne.
Yuxan chin naꞌ tol oj watoj.
26 Cꞌam cꞌal tzet watxꞌ jin tzꞌibꞌentoj yin naj tet naj yaaw tuꞌ.
Yuxan chi wiꞌtej ja sattaj tiꞌ,
Mamin rey Agripa,
cꞌal je sattaj je masanil.
Jaꞌ tinaniꞌ,
kꞌanlewej je yabꞌ tet,
ta ey pax junoj spenail chi ilcha el je yu xin,
catuꞌ chin tzꞌibꞌentoj tet naj yaaw tuꞌ.
27 Yutol man watxꞌoj chin naꞌ an,
ta ey junoj mac chi watoj preso,
cꞌam cꞌal chin tzꞌibꞌe pax toj spenail,
ẍi naj Festo tuꞌ.