Jix Iꞌletoj Jesús Sattaj Naj Pilato
27
Jaxa yet jix sajbꞌi,
jix syambꞌa oc sbꞌa ebꞌ yaawil yakꞌomal xaambꞌal ebꞌ Israel tet Dios,
yetoj ebꞌ ichamtaj winaj ey yopiso xol ebꞌ.
Jix cꞌoli slatiꞌne ebꞌ tzet oj yute yakꞌon cam Jesús ebꞌ.
2 Catuꞌ jix kꞌal-le Naj yu ebꞌ.
Jix yiꞌontoj ebꞌ sattaj naj Poncio Pilato,
naj yaawil yeoc tituꞌ.
Scamichal Naj Judas
3 Jaꞌ yet jix yilon naj Judas,
naj jix aon oc Jesús yul skꞌabꞌ ebꞌ,
tol oj cam xacꞌal Naj yu ebꞌ,
caw jix snaꞌ sbꞌa scꞌul yu spenail tuꞌ.
Jix too scꞌatan ebꞌ yaawil yakꞌomal xaambꞌal ebꞌ Israel tet Dios,
cꞌal scꞌatan ebꞌ icham winaj yeoc yul conobꞌ.
Jix yoche jix yakꞌ meltzo chꞌen treinta tumin plata jix ẍaꞌ tet ebꞌ.
4 Yuxan jix yal naj tet ebꞌ jaxca tiꞌ:
—Caw jix oc jin penail waon oc Naj yul skꞌabꞌ camich,
yutol cꞌam niꞌoj spenail Naj,
ẍi naj Judas tet ebꞌ.
Catuꞌ jix yalon ebꞌ tet naj jaxca tiꞌ:
—Jaon tiꞌ bꞌian,
cꞌam cꞌal kalon ket yin jun ja penail tuꞌ,
junel cha naꞌ,
il cꞌal tzet cha wute ja bꞌa,
ẍi ebꞌ tet naj.
5 Jaꞌ yet jix yabꞌen naj jaxca tuꞌ,
jix skꞌojon can octoj chꞌen tumin tuꞌ yul stemplo Dios,
catuꞌ jix toi.
Jix yaon oc jun txꞌan naj yin snukꞌ.
Jix stꞌunbꞌan a sbꞌa,
catuꞌ jix cami.
6 Jaꞌ ebꞌ yaawil yakꞌomal xaambꞌal ebꞌ Israel tet Dios tuꞌ jix sicꞌon a chꞌen tumin tuꞌ.
Jix yalon ebꞌ jaxca tiꞌ:
—Ma skeꞌ kaontoj wan tumin tiꞌ xol chꞌen saꞌbꞌeal,
yutol stool camich chꞌen,
ẍi ebꞌ.
7 Catuꞌ jix snaꞌon ebꞌ tzet oj oc chꞌen yu ebꞌ.
Jix manle el jun xꞌotxꞌ jun naj tzꞌajlom yetoj chꞌen tumin tuꞌ,
catuꞌ jix oc camposantoal,
yet watxꞌ ey bꞌey chi muji ebꞌ txꞌoj conobꞌlaj chi cam tituꞌ.
8 Yuxan,
jix yij can sbꞌi jun lugar tuꞌ,
Xꞌotxꞌal Chicꞌ.
Jacꞌalaꞌ sbꞌi tinaniꞌ.
9 Jaxca ton tiꞌ jix yun yunen tzet jix yal can jaxca tiꞌ:
“Jix yiꞌa chꞌen treinta tumin plata ebꞌ,
chꞌen stool jun mactxequel jix manle yu ebꞌ Israel.
10 Jaꞌ yetoj jun tumin tuꞌ,
jix sman el xꞌotxꞌ naj tzꞌajlom ebꞌ.
Jaxca tuꞌ jix yute yalon can Naj Kaawil ey jin an,”
ẍi naj Jeremías yul An Juun Tzꞌibꞌebꞌilcan tuꞌ.a
Skꞌanlebꞌal Naj Pilato Tet Jesús
11 Jaꞌ yet jix apni Naj Jesús sattaj naj Pilato,
naj yaawil conobꞌ tuꞌ,
jix skꞌanlen el naj tet Jesús jaxca tiꞌ:
—¿Tumi jaach tiꞌ Sreyal jaach ebꞌ Israel?
ẍi naj tet Jesús.
—Jaaꞌ,
jain toni,
ẍi Jesús tet naj.
12 Jaꞌ ebꞌ yaawil yakꞌomal xaambꞌal ebꞌ Israel tet Dios cꞌal ebꞌ icham winaj jix naꞌon a kꞌane yibꞌan Naj,
cꞌam cꞌal tzet jix spajtze Naj.
13 Yuxan jix yal naj Pilato tet Jesús junelxa:
—¿Tumi cꞌam cha wabꞌ wan chi yal ebꞌ ja win tiꞌ?
ẍi naj tet Jesús.
14 Cꞌam cꞌal junoj kꞌane jix spajtze tet ebꞌ.
Yuxan caw jix qꞌueya scꞌul Pilato yin Naj Jesús tuꞌ.
Jaꞌ Yet Jix Oc Can Camich Yibꞌan Jesús
15 Jaꞌ yet chi ecꞌ kꞌin junjun abꞌil,
bꞌeybꞌalnebꞌil yu ebꞌ yaaw tol chi jajle el junoj presowom,
jatacꞌalaꞌ mac chi skꞌan jajcha conobꞌ.
16 Ey jun naj chi yij Barrabás,
eyoc naj preso.
Otajbꞌil naj yu masanil ánima.
17 Jaꞌ yet jix yambꞌa sbꞌa conobꞌ tuꞌ,
jix skꞌanlen Pilato tet ebꞌ:
—¿Mac junoj che yoche chin jajeloj,
jam naj Barrabás,
ma jaꞌ Jesús,
jun chi al-le Cristoal?
ẍi naj tet ebꞌ.
18 Yutol jix yotajne el naj tol yu ẍichoncꞌulal ebꞌ yaawil yakꞌomal xaambꞌal ebꞌ Israel tet Dios,
yuxan jix iꞌletej Naj yu ebꞌ bꞌey naj Pilato tuꞌ.
Yuxan queytuꞌ jix yun yalon tet ebꞌ.
19 Jaꞌ yet chotan octoj naj Pilato tuꞌ yul sdespacho,
jix yaltej ix yistil naj tet jaxca tiꞌ:
“Cꞌam niꞌoj ja wet cha waltoj xol tzet chi ale oc yibꞌan Naj cꞌam niꞌoj spenail tuꞌ,
yutol jix jin weyichne jun tiꞌ maꞌi akꞌbꞌalil.
Caw chin xiw yu jun jin weyich tuꞌ an,”
ẍi ix.
20 Jal pax ebꞌ yaawil yakꞌomal xaambꞌal tuꞌ,
cꞌal ebꞌ ichamtaj winaj jix akꞌon scꞌul ebꞌ ánima,
yuxan jaꞌ naj Barrabás jix skꞌan jajcha ebꞌ.
Jaꞌ Jesús,
jix skꞌan ebꞌ,
tol chi cam Naj.
21 Jix skꞌanlen el naj yaaw tuꞌ junelxa tet conobꞌ:
—¿Mac junoj ebꞌ cawan tiꞌ che yoche chin jajle eloj?
ẍi naj tet ebꞌ.
—Jaꞌ naj Barrabás chi koche cha jajeloj,
ẍi ebꞌ.
22 —¿Tzet oj wute pax Jesús tiꞌ,
jun chi al-le Cristoal?
ẍi naj.
—Tol chi cam yin culus,
ẍi ebꞌ.
23 —¿Tzetyetal junoj pena jix sey yun jix je yil xin?
ẍi naj tet ebꞌ.
Tucꞌal jix a pax sjowal yel yaw ebꞌ yaloni:
—Tol chi cam yin culus,
ẍi ebꞌ.
24 Jaꞌ yet jix yilon naj Pilato tuꞌ,
tol ma xa yakꞌ ganar scolcha Jesús.
Yutol ip cꞌal xꞌemcha a ebꞌ yu.
Yuxan,
jix yakꞌon bꞌet tit niꞌoj jaꞌ.b
Jix xꞌaon el skꞌabꞌ naj sattaj masanil ebꞌ,
yu xꞌoxon eloj,
tol cꞌam naj eyoc xol yetoj ebꞌ.
Catuꞌ jix yalon tet ebꞌ jaxca tiꞌ:
—Jain tiꞌ,
cꞌam walon wet yin scamichal jun Naj cꞌam niꞌoj spenail tiꞌ.
Ilwej cꞌal je bꞌa jaex tiꞌ je txꞌojli,
ẍi naj tet ebꞌ.
25 Catuꞌ jix yalon masanil ebꞌ tuꞌ tet jaxca tiꞌ:
—Caxcꞌal chi tit kibꞌan cꞌal yibꞌan ebꞌ kicꞌaal,
ẍi ebꞌ.
26 Jaꞌ yet jix yabꞌen naj Pilato jaxca tuꞌ xin,
jix sjajon el naj Barrabás.
Jal Naj Jesús,
jix yakꞌ orden smakꞌlei,
catuꞌ jix bꞌejlecan yul skꞌabꞌ ebꞌ jix aon oc yin culus.
27 Jaꞌ ebꞌ soldado naj yaaw tuꞌ,
jix iꞌontoj bꞌey sna naj gobernador.
Jaꞌ tituꞌ jix oc joyan masanil ebꞌ soldado yin Naj.
28 Jix iꞌle el spichil Naj yu ebꞌ,
jix yaon oc jun morado pichile ebꞌ yin Naj.
29 Jix spatxꞌonen ey jun qꞌuix ebꞌ.
Jix yaon atoj ebꞌ yin sjolom Naj scoronaoj.
Jix yaon oc jun teꞌ aa ebꞌ yul swatxꞌ kꞌabꞌ skꞌojochoj Naj.
Jix lawi tuꞌ xin,
jix stzꞌaj scabꞌan ey sbꞌa ebꞌ tet Naj.
Jix cꞌoli sbꞌuchon ebꞌ.c
Jix tzꞌaj yalon ebꞌ tet Naj jaxca tiꞌ:
—Tzalaan,
jaach Sreyal ebꞌ Israel,
ẍi ebꞌ tet Jesús.
30 Catuꞌ jix cꞌoli stzubꞌli oc ebꞌ yin Naj.
Jix yiꞌon ecꞌ teꞌ aa ebꞌ tet.
Jix smakꞌon oc teꞌ ebꞌ yin sjolom Naj.
31 Jix lawi sbꞌuchwa cꞌal ebꞌ yin Naj jaxca tuꞌ xin,
jix yiꞌon el an pichile morado yili tuꞌ yin Naj.
Jix yaon cꞌaltaꞌ oc spichil Naj ebꞌ.
Catuꞌ jix iꞌletoj Naj yu ebꞌ bꞌey oj ale oc Naj yin culus.
Yet Jix Oc Jesús Yin Teꞌ Culus
32 Lalan sbꞌey ebꞌ yetoj Jesús catuꞌ jix ẍaꞌlen el sbꞌa ebꞌ yetoj jun winaj a Cirene,
Simón sbꞌi naj.
Jaꞌ naj Simón tuꞌ jix al-le octoj yalan sculusal Jesús tuꞌ yu ebꞌ,
jix iꞌletoj naj yu ebꞌ.
33 Jaxca tuꞌ jix yun yapni ebꞌ bꞌey jun lugar chi yij Gólgota.
Jaꞌ jun kꞌane Gólgota tuꞌ,
chi yal yeloc apnoj,
Slugaril Sbꞌajil Jolome.
34 Jix akꞌle yucꞌ vino calan ye yetoj skꞌaꞌil jun tujan caw kꞌaꞌ yu ebꞌ.d
Jaꞌ yet jix yabꞌleni,
ma ẍaꞌ scꞌul jix yuqꞌueꞌ.
35 Catuꞌ jix ale oc Naj yin teꞌ culus yu ebꞌ.
Catuꞌ jix cꞌoli yakꞌon suerte ebꞌ soldado yin spichil Naj,
catuꞌ jix spoꞌon ecꞌ an ebꞌ yin.
/Jaxca ton tiꞌ jix yunne,
yu yunen el tzet tzꞌibꞌebꞌilcan yu jun ẍejabꞌ Dios yet peyxa,
yet jix yalon can jaxca tiꞌ:
“Jix yaoc suerte ebꞌ yin jin pichil catuꞌ jix spoꞌon ecꞌ an xol ebꞌ,”
ẍi yul An Juun Tzꞌibꞌebꞌilcan tuꞌ./e
36 Jix lawi tuꞌ xin,
catuꞌ jix ey chotan ebꞌ steynen Jesús tuꞌ.
37 Jix tzꞌibꞌele oc jayebꞌ letra sjolomtaj atoj.
Jaꞌ jayebꞌ letra tuꞌ chi aloni tzet yuxan chi cami.
“Jaꞌton Jesús tiꞌ,
Sreyal ebꞌ Israel,”
ẍi wan letra tuꞌ.
38 Ey pax cawan elkꞌom jix culusnele yetoj Jesús.
Jun bꞌey swatxꞌ kꞌabꞌ,
junxa bꞌey sqꞌuexan kꞌabꞌ.
39 Jaꞌ ebꞌ chi ecꞌ tituꞌ,
chi bꞌuchwa can atoj ebꞌ yin,
catuꞌ chi a txꞌumna ebꞌ tet Naj.
40 Jix yalon ebꞌ jaxca tiꞌ:
—Jaach ton tiꞌ,
cha wuchtoj stemplo Dios ja walaꞌ,
catuꞌ cha waꞌnen a sqꞌuexel yet yox cꞌual.
Col ja bꞌa tinaniꞌ.
Ta tol yel Scꞌaal jaach Dios,
eyantej yin teꞌ culus tuꞌ,
ẍi atoj ebꞌ tet Jesús.
41 Jaꞌ ebꞌ yaawil yakꞌomal xaambꞌal tet Dios,
cꞌal ebꞌ cuywam yin sley Moisés,
cꞌal ebꞌ Fariseo,
cꞌal ebꞌ ichamtaj winaj,
jix cꞌal bꞌuchwa atoj ebꞌ yin Naj.
Jix yal ebꞌ jaxca tiꞌ:
42 —Ey mac jix scoloꞌ,
cꞌam pax chi skeꞌ scolon sbꞌa tinaniꞌ.
Ta cꞌuxan taꞌ jaꞌ cu Reyal,
jaon Israel jon tiꞌ,
jaꞌ tinaniꞌ,
ey ojabꞌtej yin teꞌ culus tiꞌ kilaꞌ.
Jaxca tuꞌ xin,
oj kaoc cu cꞌul yin.
43 Ilaꞌ chi tzꞌaj yaoc Dios yipoj scꞌul.
Colwa ojabꞌ Dios tuꞌ yetoj,
catuꞌ oj kiloni,
ta tol yel ey scamcꞌulal Dios tuꞌ yin.
Ilaꞌ,
tol Scꞌaal jin Dios,
ẍi ey jon,
ẍi ebꞌ.
44 Jaꞌ ebꞌ elkꞌom locan a yetoj Jesús tuꞌ,
jix bꞌuchwa pax ebꞌ yin.
Scamichal Jesús
45 Chuman wal cꞌu,
catuꞌ jix kꞌejbꞌi masanil yul yibꞌankꞌinal,
masantaꞌcꞌal yet a las tres.
46 Jacꞌal oc yet a las tres tuꞌ,
jix el yaw Jesús yin ipal:
—Elí,
Elí,
¿lama sabactani?f
ẍi Jesús.
Chi yal yeloc apnoj:
Jaach jin Diosal,
Jaach jin Diosal,
¿tzet yuxan chin ja bꞌejcan jin txꞌojli?
47 Ey jaywan ebꞌ eyecꞌ tituꞌ,
jix abꞌen tzet jix yal tuꞌ,
catuꞌ jix yalon ebꞌ tuꞌ jaxca tiꞌ:
—Jaꞌ naj Elías,
jun ẍejabꞌ Dios,
jaꞌ chi yawte jun tiꞌ,
ẍi ebꞌ.
48 Jaꞌ yet tuꞌ ey jun yetbꞌi ebꞌ jix too lemnaoj.
Jix bꞌet yaon eytoj jun tzetyetal labꞌabꞌi xol vinagre.
Jix yaon oc ẍumuc jun teꞌ aa.
Jix yaon atoj yin stiꞌ Jesús.
49 Ey wan ebꞌ jix alon yin Naj jaxca tiꞌ:
—Yilxa sbꞌa.
Oj kilaꞌ ta oj jul eytej Naj yu Elías tuꞌ,
ẍi ebꞌ.
50 Jix el yaw Jesús junelxa yin yipal,
catuꞌ jix cami.
51 Jaꞌ yet xacꞌal jun txolan tuꞌ,
catuꞌ jix ey tzilna snan an kꞌap eyoc smajiloj yul snan stemplo Dios tuꞌ.
Jix ẍaꞌeytej stit tzilna sjolom masantaꞌcꞌal jix eyol stiꞌlaj.
Ey pax jun miman quixcabꞌ jix eqꞌui.
Ey wan chꞌen mimej chꞌen jix jatcan a yu.
52 Ey pax chꞌen chꞌen bꞌey mujan octoj ebꞌ camnaj jix jajchai.
Yuxan ecꞌal ebꞌ yet xa Dios camnajxa jix pitzcꞌu a yetoj smimanil.
53 Jaꞌ yet jix pitzcꞌu a Jesús,
catuꞌ jix eltej ebꞌ yul chꞌen bꞌey mujan ebꞌ tuꞌ.
Jix too ebꞌ bꞌey yul conobꞌ Jerusalén.
Jaꞌton jun conobꞌ yet taꞌ Dios yei.
Ecꞌal ánima jix ilon yin ebꞌ.
54 Jaꞌ yet jix yabꞌen jun quixcabꞌ,
cꞌal wanxa tzet jix yun tuꞌ,
naj capitán,
cꞌal ebꞌ soldado chi teynen Jesús tuꞌ,
caw jix xiwa ebꞌ.
Jix yalon ebꞌ jaxca tiꞌ:
—Jaꞌ jun jix cam tiꞌ,
tol yel caw Scꞌaal Dios Naj,
ẍi ebꞌ.
55 Ey wan ebꞌ ix ix tꞌanantej naat.
Ebꞌ ix jix ecꞌ yintaj Naj yet eyecꞌ Naj bꞌey Galilea yu yakꞌle servil Naj Jesús yu ebꞌ ix.
Jaꞌ yet jix tit Naj bꞌey Galilea tuꞌ,
catuꞌ jix tit pax ebꞌ ix yetoj.
56 Eoc María Magdalena xol ebꞌ ix,
yetoj María xutx naj Jacobo yetoj naj José,
yetoj pax xutx ebꞌ scꞌaal naj Zebedeo.
Smujbꞌanil Naj Jesús
57 Ey jun winaj bꞌeom chi yij José,
a conobꞌ Arimatea.
Jaꞌ jun winaj tuꞌ,
scuywom pax Jesús.
Yeycꞌualil xa jix apni naj,
58 catuꞌ jix octoj naj scꞌatan naj Pilato yu skꞌanon eytej smimanil Jesús yin culus.
Jix yalon naj Pilato tet ebꞌ soldado tuꞌ tol chi akꞌle tet.
59 Catuꞌ jix too naj yiꞌon eytej smimanil Jesús tuꞌ,
catuꞌ jix pichon oc yul jun sábana saj yei.
60 Ey jun chꞌen chꞌen jolbꞌilxa,
yet naj José yei.
Cꞌamto junoj camom xax mujle yul jun chꞌen tuꞌ.g
Jatuꞌ jix bꞌet yaoctoj smimanil Jesús tuꞌ naj.
Jix lawi tuꞌ,
catuꞌ jix sbꞌalon can oc jun miman chꞌen smajiloj,
catuꞌ jix too ebꞌ.
61 Chotan ey María Magdalena yetoj junxa ix María scawilal chꞌen chꞌen tuꞌ yet xax yunne.
Teynebꞌil Bꞌey Jix Muji Jesús Yu Ebꞌ Soldado
62 Jaꞌ yet junxa cꞌual,
yet jix lawi scꞌual swaꞌnen stzettaj yetal oj skꞌanbꞌalne ebꞌ yet sábado,
jix syambꞌan ey sbꞌa ebꞌ yaawil yakꞌomal xaambꞌal tet Dios,
cꞌal ebꞌ Fariseo,
jix apni ebꞌ sattaj naj Pilato.
63 Jix apni yalon ebꞌ jaxca tiꞌ:
—Mamin yaaw,
jix cu naꞌtej,
tol jaꞌ yet cꞌamto chi cam jun lekꞌtiꞌ tuꞌ,
jix yal jaxca tiꞌ:
“Scaabꞌial jin cami,
catuꞌ oj jin pitzcꞌu pax aoj,”
ẍi Naj,
ẍi ebꞌ.
64 Yuxan,
cꞌam mi chach colwa kin jon.
Cha chejtoj teynele bꞌey jix bꞌet oc cantoj smimanil tuꞌ,
masantaꞌcꞌal yet yox cꞌual tuꞌ.
Ta cꞌamaj,
tala oj yelkꞌane eltej smimanil ebꞌ scuywom tuꞌ.
Jaxa taꞌ la chi yun aoj,
oj yalon ebꞌ jaxca tiꞌ xol ánima tol jix pitzcꞌu a xol ebꞌ camnaj.
Ta queytuꞌ oj yute ebꞌ jaxca tuꞌ,
jaꞌ jun tzunan slekꞌtiꞌal ebꞌ tuꞌ,
yel xacꞌal pena yintaj jun bꞌabꞌel lekꞌtiꞌal jix yakꞌ jun winaj tuꞌ,
ẍi ebꞌ tet Pilato tuꞌ.
65 Catuꞌ jix yalon naj Pilato tuꞌ tet ebꞌ jaxca tiꞌ:
—Ta queytuꞌ jaxca tuꞌ,
chi skeꞌ je yiꞌontoj soldado tituꞌ,
yet watxꞌ che teynen yetoj ebꞌ,
ẍi naj Pilato tet ebꞌ.
66 Catuꞌ jix too ebꞌ tuꞌ,
jix yiꞌontoj ebꞌ soldado ebꞌ tuꞌ yetoj.
Jix steynen chꞌen chꞌen ebꞌ bꞌey jix octoj smimanil Jesús tuꞌ.
Jix ya can oc selloal chꞌen chꞌen eyoc smajiloj tuꞌ.
Jaꞌ ebꞌ soldado tuꞌ,
jix can ebꞌ stiꞌ chꞌen tuꞌ steyneni.