Jix Bꞌetecꞌ Jesús Sattaj Naj Pilato
15
Jaꞌ yet jix sajbꞌi aoj,
jix syambꞌa oc sbꞌa ebꞌ yaawil yakꞌomal xaambꞌal ebꞌ Israel tet Dios yin syambꞌabꞌail yetoj ebꞌ icham winaj,
cꞌal ebꞌ cuywam yin sley Moisés,
yetoj masanil wanxa ebꞌ sat yaaw.
Jix lawi tuꞌ,
jix skꞌalon Jesús ebꞌ,
jix iꞌletoj Naj yu ebꞌ,
catuꞌ jix bꞌet yakꞌon ebꞌ tet naj Pilato,
naj yaaw.
Crucifixión y resurrección de Jesús (Marcos 15-16)
—¿Tumi jaach tiꞌ,
Sreyal jaach ebꞌ Israel?
ẍi naj tet Jesús.
—Jaaꞌ,
jaxca ton ja walon tuꞌ,
ẍi Jesús tet naj.
3 Jaꞌ ebꞌ yaawil yakꞌomal xaambꞌal ebꞌ Israel tet Dios,
ecꞌal tzet jix yal ebꞌ yibꞌan Jesús.
4 Yu jun tuꞌ,
yuxan jix yal Pilato tuꞌ tet Naj jaxca tiꞌ:
—¿Tumi cꞌam chach takꞌwi niꞌoj?
Abꞌ jantaj tzet chi yal ebꞌ ja win,
ẍi naj tet Jesús.
5 Jal pax Jesús xin,
cꞌam niꞌoj jix takꞌwi.
Yu jun tuꞌ,
yuxan tuxa cꞌal chi qꞌueya scꞌul Pilato yin.
Jix Ale Xacꞌal Oc Camich Yibꞌan Jesús
6 Bꞌeybꞌalnebꞌil cꞌaltaꞌ yu Pilato tol chi sjajel junoj a preso yet kꞌin junjun abꞌil.
Jatacꞌalaꞌ mac chi skꞌan jajcha ebꞌ conobꞌ.
7 Ey jun naj chi yij Barrabás,
preso yeoc yetoj jaywanxa yetbꞌi.
Yakꞌlenaj jowal ebꞌ yetoj ebꞌ yaaw.
Ey wan ánima camnaj yu ebꞌ yet jix yakꞌlen jowal ebꞌ tuꞌ.
8 Jaꞌ yet jix apni bꞌulna ánima tuꞌ,
catuꞌ jix skꞌanlen ebꞌ tet Pilato,
ta chi sjajel junoj ebꞌ a preso jaxca cꞌaltaꞌ sbꞌeybꞌal junjun kꞌin.
9 Catuꞌ jix yalon naj tet ebꞌ jaxca tiꞌ:
—¿Jam Naj je Reyal jaex Israel jex tiꞌ che yoche chin jajeloj?
ẍi naj tet ebꞌ.
10 Queytuꞌ jix yute yaloni,
yutol yotaj xa tol yu ẍichoncꞌulal ebꞌ yaawil yakꞌomal xaambꞌal ebꞌ Israel tet Dios yin naj,
yuxan jix yiꞌtej Jesús ebꞌ sattaj.
11 Catuꞌ jix yakꞌon scꞌul ánima ebꞌ tuꞌ yet watxꞌ jaꞌ Barrabás chi skꞌan jajcha ebꞌ.
12 Catuꞌ jix skꞌanlen Pilato tuꞌ tet ebꞌ ánima tuꞌ junelxa:
—¿Tzet che yoche chi wute pax Naj che yaloc je Reyaloj tuꞌ xin?
ẍi naj tet ebꞌ.
13 Catuꞌ jix a bꞌulna ebꞌ yalon yin ipal jaxca tiꞌ:
—Culusnele ojabꞌ Naj,
ẍi ebꞌ.
14 —¿Tzetyetal wal junoj pena jix sey yun jix je yil xin?
ẍi naj tet ebꞌ.
Tol jix a cꞌal yaw ebꞌ yaloni:
—Culusnele ojabꞌ Naj,
ẍi ebꞌ.
15 Caw jix yoche naj Pilato tol watxꞌ chi can yul sat conobꞌ,
yuxan jaꞌ naj Barrabás jix sjajeloj.
Jal Naj Jesús jix yakꞌ makꞌle oj,
catuꞌ jix yaon oc yul skꞌabꞌ ebꞌ chi aon oc yin culus.
16 Jaꞌ ebꞌ soldado jix iꞌontoj Jesús bꞌey yamakꞌil sna naj yaaw,
jun na chi yij Pretorio.
Jaꞌ tituꞌ jix awtele eytej ebꞌ soldado masanil.
17 Jix yaoc jun moradotaj pichile ebꞌ yin Jesús,
jaxca wan pichile chi yaoc ebꞌ yaaw.
Jix skꞌalon ey xoyan jun qꞌuix ebꞌ.
Jix yaon oc ebꞌ yin sjolom scoronaoj.
18 Catuꞌ jix stzaꞌjon yal ebꞌ tet jaxca tiꞌ:
—Tzalaan jaach Sreyal ebꞌ Israel,
ẍi ebꞌ tet Jesús.
19 Jix cꞌoli smakꞌon oc jun aa ebꞌ yin sjolom.
Chi tzubꞌli oc ebꞌ yin Naj,
catuꞌ jix tzꞌaj scabꞌan ey sbꞌa ebꞌ tet.
20 Jix lawi yetnen ebꞌ jaxca tuꞌ xin,
jix yiꞌon el an moradotaj pichile ebꞌ tuꞌ yin,
catuꞌ jix yaon cꞌaltaꞌ can oc spichil Naj ebꞌ.
Catuꞌ jix yiꞌontoj Naj ebꞌ bꞌey oj ale oc Naj yin culus tuꞌ yu ebꞌ.
Jix Ale Oc Jesús Yin Culus
21 Ey jun winaj a Cirene chi yij Simón,
smam Alejandro yetoj Rufo.
Lalanto sjul bꞌey jix bꞌet ecꞌabꞌoj.
Catuꞌ jix akꞌle jun sculusal Jesús yijtoj naj yu ebꞌ soldado.
22 Jaꞌ bꞌey jun lugar chi yij Gólgota,
jatuꞌ jix yiꞌtoj Jesús ebꞌ tuꞌ.
Gólgota chi yal yeloc apnoj:
Slugaril Sbꞌajil Jolome.
23 Jix yakꞌ yal uva calan yetoj junxa tujan chi yij mirra yucꞌ Naj ebꞌ.a
Ma cꞌaltaꞌ ẍaꞌ yucꞌ tet ebꞌ.
24 Jix lawi jun tuꞌ,
catuꞌ jix ale oc Naj yu ebꞌ yin teꞌ culus,
catuꞌ jix yakꞌon suerte ebꞌ soldado yin spichil Naj,
yu yilon ebꞌ tzettaj yetal chi yiꞌcan junjun ebꞌ.
25 A las nueve yet skꞌinibꞌalil,
catuꞌ jix oc Naj yin culus yu ebꞌ.
26 Ey jayebꞌ letra tzꞌibꞌebꞌil ocoj.
Jaꞌ chi alon tzet yuxan jix elol camich yibꞌan.
“Jaꞌ Naj Sreyal ebꞌ Israel,”
ẍi jayebꞌ letra tuꞌ.
27 Ey pax cawan elkꞌom jix culusnele yetoj Naj,
jun bꞌey swatxꞌ kꞌabꞌ,
junxa bꞌey sqꞌuexan kꞌabꞌ.
28 Yuxan jix yun ton jaxca yalon can yul An Juun Tzꞌibꞌebꞌilcanoj,
bꞌey chi yal jaxca tiꞌ:
“Oj utele jaxca chi utele ebꞌ penawom,”
ẍi yul An Juun tuꞌ.b
29 Jaꞌ ebꞌ jix ecꞌ scawilal tuꞌ,
jix bꞌuchwa can atoj ebꞌ yin.
Catuꞌ jix a txꞌumna ebꞌ tet,
jix yalon ebꞌ jaxca tiꞌ:
—A… jaach ton tiꞌ,
cha wuchey stemplo Dios ja walaꞌ,
catuꞌ cha waꞌnen a sqꞌuexel yin yox cꞌual.
30 Col ja bꞌa.
Eyantej yin teꞌ culus tuꞌ,
ẍi ebꞌ tet Jesús.
31 Jacꞌalaꞌ ebꞌ yaawil yakꞌomal xaambꞌal ebꞌ Israel tet Dios,
yetoj ebꞌ cuywam yin sley Moisés,
jix bꞌuchwa pax atoj ebꞌ yin Naj,
catuꞌ jix yalon ebꞌ jaxca tiꞌ:
—Ey mac jix scoloꞌ,
jal tinaniꞌ,
cꞌam pax chi skeꞌ scolon sbꞌa,
ẍi ebꞌ.
32 —Ta chi yiꞌeytej sbꞌa yin culus,
jun chi yaloc sbꞌa Cristoal,
cu Reyaloj,
jaon Israel jon tiꞌ,
chi kaoc cu cꞌul yin,
ẍi ebꞌ.
Tol tax ebꞌ locan a yin culus tuꞌ yetoj,
jix bꞌuchwa pax ebꞌ yin.
Scamichal Jesús
33 Jaꞌ yet jix oc chuman cꞌu,
jix kꞌejbꞌi masanil yul yibꞌankꞌinal masantaꞌcꞌal yet a las tres.
34 Yet xacꞌal jun txolan tuꞌ,
jix a yaw Jesús yin ipal:
—Eloí,
Eloí,
¿lama sabactani?
ẍi aoj.c
Chi yal yeloc apnoj:
Jaach jin Diosal,
Jaach jin Diosal,
¿tzet yuxan chin ja bꞌejcan jin txꞌojli?
35 Jaꞌ ebꞌ eyecꞌ scawilal tuꞌ,
jix yabꞌ ebꞌ yoc jun kꞌane tuꞌ,
yuxan jix yal ebꞌ jaxca tiꞌ:
—Abꞌwej,
jaꞌ jun ẍejabꞌ Dios chi yij Elías chi yawte,
ẍi ebꞌ.
36 Jix lawi tuꞌ,
ey jun winaj ani stoi,
jix cꞌal apni tituꞌ,
catuꞌ jix yaon eytoj jun tzet chi labꞌabꞌi xol vinagre.
Jix yaon oc xaam jun teꞌ aa,
catuꞌ jix yaon atoj yin stiꞌ Jesús,
jix yaloni:
—Yilxa sbꞌa,
oj kilaꞌ ta oj jul iꞌle eytej Naj yu Elías tuꞌ,
ẍi.
37 Catuꞌ jix a yaw Jesús junelxa yin ipal,
catuꞌ jix cami.
38 Jaꞌ yet jix cam Jesús tuꞌ,
jix ey nicꞌna snan an kꞌap eyoc smajiloj yul snan stemplo Dios tuꞌ.
Jix ẍaꞌeytej snicꞌchatoj sjolomtaj,
masantaꞌcꞌal jix eyol stiꞌlaj.
39 Jix yabꞌ naj yaawil ebꞌ soldado linan oc sattaj Jesús yel yaw.
Jix yil tzet jix yun scami,
yuxan jix yal jaxca tiꞌ:
—Jaꞌ jun jix cam tiꞌ,
tol yel caw Scꞌaal Dios,
ẍi naj.
40 Ey pax wan ebꞌ ix ix tꞌanantej naat.
Yaman ix María Magdalena yetoj ebꞌ,
cꞌal ix Salomé,
cꞌal María xutx José yetoj Jacobo,
naj tzunan unin.
41 Jaꞌ wan ebꞌ ix ix tiꞌ,
jix ecꞌabꞌ cꞌal ebꞌ yintaj Naj yet eyecꞌ Naj bꞌey Galilea.
Jix akꞌle servil Naj yu ebꞌ.
Ecꞌal tocꞌal wanxa ebꞌ ix ix yaman stoo yetoj Naj bꞌey Jerusalén.
Oclenajtoj Smimanil Jesús Yul Chꞌen Bꞌey Smujbꞌanil Ebꞌ Camnaj
42 Jaꞌ yet jun cꞌu tuꞌ,
scꞌual swaꞌnen stzettaj yetal ebꞌ oj skꞌanbꞌalne yutol yecaloj xacꞌal scꞌual xewilal.
Jaꞌ yet lalanxa skꞌejbꞌi xin,
43 jix apni naj José a Arimatea.
Mimej winaj xol ebꞌ yet yaawil.
Jaꞌ José tuꞌ,
echbꞌanebꞌil pax yoc Dios Yaawil yu.
Cꞌam niꞌoj chi xiwi catuꞌ jix octoj sattaj Pilato,
jix bꞌet skꞌanon smimanil Jesús tet.
44 Caw jix qꞌueya scꞌul Pilato yet jix yabꞌeni tol camnajxa Jesús.
Yu jun tuꞌ,
yuxan jix bꞌet yakꞌ tit naj yaawil ebꞌ soldado,
catuꞌ jix skꞌanlen el tet,
ta camnajxa Jesús tuꞌ.
45 Jaꞌ yet jix yabꞌeni,
tol camnajxa,
catuꞌ jix yaloni,
tol chi skeꞌ stoo yiꞌon eytej smimanil Jesús tuꞌ naj José tuꞌ.
46 Jaꞌ José tuꞌ,
jix sman jun sábana caw watxꞌ.
Catuꞌ jix bꞌet yiꞌon eytej jun mimanile tuꞌ.
Jix spichon oc jun sábana tuꞌ yin.
Catuꞌ jix bꞌet yaon can octoj yul jun chꞌen chꞌen jolbꞌilxa tuꞌ,
jix smajchen can yetoj jun chꞌen tuꞌ.
47 Jaꞌ ix María Magdalena yetoj ix María xutx José,
jix yil ebꞌ bꞌey jix octoj smimanil tuꞌ.