2 Chi yalon Jehová tet conobꞌ Israel jaxca tiꞌ: Jain tiꞌ caw ey jin camcꞌulal je yin. Asan xin, jaꞌ yet che yalon pax jaxca tiꞌ: ¿Tzet chi yun kotajnen eloj, ta tol ey ja camcꞌulal kin jon? je chi che yaloni. Yuxan jain chi walaꞌ: ¿Tumi man yuẍtaj oj sbꞌa Esaú yetoj Jacob? Jain tiꞌ jix jin camcꞌulne pax naj Jacob tuꞌ, 3 jal naj Esaú jix wintajne can eloj. Jaꞌ txꞌotxꞌ sjolomlaj wonan bꞌey caan ebꞌ yicꞌaal Esaú tuꞌ, jix waoc txꞌotxꞌ yin cusiltaj txꞌotxꞌal, jaxa cꞌal noꞌ xol-laj teꞌal noꞌ caan tituꞌ, ẍi Jehová.

4 Ta jaꞌ ebꞌ Edomita, yicꞌaal Esaú, chi alon jaxca tiꞌ: Caxcꞌal jix uchletoj cu conobꞌ tiꞌ, jix cu caꞌ waꞌne cꞌal pax a cu conobꞌ junelxa, ta ẍi ebꞌ, jain Jehová jin tol Miman Yeoc Wipalil chi walaꞌ: Jain oj wuch lawoj ey junelxa, caxcꞌal chi scaꞌ waꞌne sconobꞌ ebꞌ junelxa. Jaꞌ ebꞌ ánima oj alon yin sconobꞌ ebꞌ tuꞌ jaxca tiꞌ: Jaꞌ jun conobꞌ tiꞌ caw wal pena, ey cꞌal oc sjowal scꞌul Jehová yibꞌan, ẍi ebꞌ yin. 5 Jaex Israel jex tiꞌ, caw oj je yil tzet oj elocoj, catuꞌ oj je yalon jaxca tiꞌ: Jaꞌ Jehová tiꞌ, yel xacꞌal miman yeloc apnoj Naj bꞌey masanil yul yibꞌankꞌinal tiꞌ, man asanne oj bꞌey yul cu moon, je chi, oj je yaloni, ẍi Jehová.

6 Chi yalon cꞌal pax Jehová, Naj Miman Yeoc Yipalil tet ebꞌ yakꞌomal xaambꞌal jaxca tiꞌ: Jaꞌ ebꞌ cꞌaale, ey yeloc apnoj smam ebꞌ yul sat; ebꞌ yakꞌomal servil, ey cꞌal pax yeloc apnoj spatrón ebꞌ yul sat. Yu jun tuꞌ, ta tol mame jin ey jex je yaloni, ¿tzet yu, yuxan tol cꞌam pax weloc apnoj yul je sat? Yetoj cꞌal pax oj, ta tol je Yaawil jin je yaloni, ¿tzet yu, yuxan cꞌam pax weloc apnoj yul je sat? Jaex tiꞌ, tol chin je yintajne can eloj, catuꞌ chi to wal je yalon pax jaxca tiꞌ: ¿Tzet chi yun pax jaach kintajne eloj? je chi, che yaloni. 7 Jaex tiꞌ che yiꞌtej ixim pan man smooaliloj bꞌey jun yet xaambꞌal, catuꞌ chi to wal je kꞌanlen jaxca tiꞌ: ¿Tzet to wal yinal chi oc cu penail ey jaach? je chi. Jaex tiꞌ chi oc je penail, yutol che yintajne can el jun yet xaambꞌal tuꞌ. 8 ¿Tumi watxꞌ che naꞌ, ta jaꞌ noꞌ noꞌ cꞌam chi skeꞌ yilwi, che yakꞌ yin xaambꞌalil, noꞌ kꞌail, cꞌal noꞌ yaꞌey? Iꞌwejtoj wan noꞌ noꞌ tuꞌ je saꞌbꞌealoj tet ebꞌ je yaawil. ¿Oj mi tzala ebꞌ je yetoj che naꞌ? ¿Oj mi ẍaꞌ ebꞌ ey jex che naꞌ? 9 Chi yal ebꞌ ánima ey jex jaxca tiꞌ: Jex yakꞌomal xaambꞌal, kꞌanwej tet Dios, yet watxꞌ chi okꞌ scꞌul Naj kin, ta ẍi ebꞌ conobꞌ tuꞌ. Jain Jehová jin, tol Miman Yeoc Wipalil, jain chi walaꞌ: Ta tol jaꞌ wan chi wal ey jex tiꞌ, oj je yakꞌ yin je yofrendaoj ey jin, man oj jin chaꞌ yin tzalacꞌulal ey jex. 10 Toloj wal jaꞌ junoj jex jaex tiꞌ che majche spuertail jin templo, yet watxꞌ man naꞌbꞌa oj chi oc skꞌakꞌal jun yet jin xaambꞌal tuꞌ. Yutol jain Jehová jin, caw cꞌam jin tzalacꞌulal je yetoj, manxa cꞌal oj jin chaꞌ je yofrenda tuꞌ, yutol cꞌam niꞌoj yeloc apnoj. 11 Jain caw Jehová jin chi walaꞌ tol Miman weloc apnoj yul sat masanil nacionlaj bꞌey yul yibꞌankꞌinal tiꞌ, yuxan chi yakꞌ tzꞌaꞌ xaambꞌal ebꞌ, cꞌal yakꞌon yofrenda ebꞌ ey jin yin smooalil, yutol miman weloc apnoj yul sat ebꞌ. 12 Jal jex jaex tiꞌ, cꞌam weloc apnoj niꞌoj yul je sat, yet che yaloni tol cꞌam yeloc apnoj jun yet xaambꞌal tol wet yeocoj, yetoj wan chiꞌbꞌe che yakꞌ yin xaambꞌalil ey jin. 13 Che yalon cꞌal pax jaxca tiꞌ: Caw jix cu cꞌuumbꞌi kunen wan tiꞌ, je chi, catuꞌ chi tit je jowal. Chi lawi tuꞌ che yakꞌon je xaambꞌal ey jin, noꞌ tol elkꞌanebꞌil je yu, noꞌ kꞌail, cꞌal noꞌ yaꞌey, ¿chim je naꞌ tol oj jin chaꞌ wan tuꞌ ey jex je yaloni? 14 Jain Rey jin tiꞌ, tol eyxa smey yeoc wipalil xol masanil conobꞌlaj, jain chi walaꞌ, tol okꞌbꞌal cꞌul junoj mactxequel tol chi yakꞌ stiꞌ yakꞌon junoj noꞌ meꞌ tol caw watxꞌ yoc yin xaambꞌalil, catuꞌ chi sqꞌuexon pax toj, jaxa junoj noꞌ yaꞌey chi yakꞌa, ẍi Jehová Naj Miman Yeoc Yipalil.