2
Chi yalon cꞌal pax Jehová, Naj Miman Yeoc Yipalil jaxca tiꞌ: Jaꞌ tinaniꞌ jex yakꞌomal xaambꞌal, je yet yeoc wan chejbꞌanile tiꞌ: 2 Jaex tiꞌ, sowalil tol ey weloc apnoj yul je sat yin tzet che yun yin je yopiso. Ta man oj je jije jaxca tuꞌ, oj jex wintajne can eloj. Oj jin qꞌuextoj je alo watxꞌ kꞌane yin pena kꞌaneal. Caw yel, jaꞌ jun je yopiso tuꞌ tuxa jix wintajne can eloj, yutol cꞌam che yaoc jin chejbꞌanil yin je cꞌul.3 Je yu jaex tiꞌ, yuxan oj waoc sjowal jin cꞌul yibꞌan ebꞌ je yicꞌaal. Jaꞌ noꞌ noꞌ che yiꞌtej yin xaambꞌalil tuꞌ, oj jin tiẍoc stzꞌaꞌ noꞌ xaambꞌal tuꞌ yin je sat. Catuꞌ junne oj yun je kꞌojle el yetoj stzꞌaꞌ noꞌ noꞌ tuꞌ. 4 Jaxca tuꞌ oj yun snaꞌcha el je yu, tol jain Jehová jin, tol Miman Yeoc Wipalil, jain chi wakꞌ jun tenchebꞌal tiꞌ, yet watxꞌ jaꞌ jin wa kꞌane jix wakꞌcan yetoj ebꞌ yicꞌaal Leví, oj bꞌey cꞌaltoj yet bꞌakꞌin.
5 Jaꞌ jin wa kꞌane yetoj ebꞌ je mam icham, jaꞌton ebꞌ yicꞌaal Leví, tol chi wakꞌ scawil, cꞌal swatxꞌcꞌulal ebꞌ. Jix wakꞌ jin wa kꞌane tuꞌ yetoj ebꞌ, yet watxꞌ ey weloc apnoj yul sat ebꞌ. Jaꞌ ebꞌ tuꞌ, caw ey weloc apnoj yul sat ebꞌ, ey cꞌal xiwcꞌulal ebꞌ ey jin. 6 Yel cꞌal tzet jix yal ebꞌ, cꞌam cꞌal lekꞌtiꞌal jix ilcha el yin skꞌane ebꞌ. Caw watxꞌ cꞌal jix yun yeecꞌ ebꞌ wetoj. Ecꞌal mactxequel jix spoꞌocan el ebꞌ yin spenail. 7 Jaꞌ yopiso ebꞌ yakꞌomal xaambꞌal, tol chi cuyle ebꞌ ánima yu ebꞌ, yet chin yotajne el ebꞌ. Smoo ton chi apni oc masanil ánima scꞌatan ebꞌ, yet chi yabꞌen cuybꞌanile, yutol jaꞌ ebꞌ tuꞌ, jin chejabꞌ yeoc ebꞌ jain Jehová jin tol Yaaw jin yibꞌan Masanil.
8 Jal pax jaex yakꞌomal xaambꞌal jex tiꞌ, tuxa jix je poꞌocan el je bꞌa yin watxꞌ bꞌeybꞌale. Yu cꞌal cuybꞌanile che yakꞌa, yuxan ecꞌal mactxequel tuxa jix eyqꞌueyi. Yu jun tuꞌ, jaex caw tuxa jix je yetnetoj jin wa kꞌane jix wakꞌcan yetoj naj je mam icham, Leví. 9 Yu jun tuꞌ xin, oj jex wintajne can eloj, yutol cꞌam je yeloc apnoj yul jin sat, caw yeynajil oj je yun yul sat masanil ánima, yutol cꞌam che jije tzet chi walaꞌ, catuꞌ man laan oj che yute je naꞌon oc yin masanil ánima, ẍi Dios.
Jaꞌ Spital Snaꞌbꞌal Ebꞌ A Judá
10 ¿Tumi man junne oj cu Mam cu masanil xin, jaꞌton jun Dios jix cu waꞌneni? ¿Tzet yu, yuxan chi ketnele cu bꞌa, catuꞌ chi kunen spenail kin junjun jon, catuꞌ chi ketnentoj swa kꞌane Dios jix swaꞌne yetoj ebꞌ cu Mam icham? 11 Jaꞌ ebꞌ a Judá, ma sjije yunen ebꞌ bꞌey jix yakꞌ can stiꞌ sattaj Dios. Tol yel xacꞌal miman spenail ebꞌ jix yaoc bꞌey Jerusalén, cꞌal bꞌey masanil yul yet Israel. Tuxa jix yetnetoj scalubꞌal Jehová ebꞌ tol yet yeocoj, jun ey scamcꞌulal yin ebꞌ. Jaꞌ ebꞌ winaj jix iꞌon ebꞌ ix ix chi oc eyilal tet sdiosal junoj txꞌoj conobꞌal. 12 Jaꞌ Jehová, Naj Miman Yeoc Yipalil, toloj wal chi el yin scꞌul, tol jaꞌ chi qꞌueyon el mactxequel cu xol jaon Israel jon tiꞌ, yal cꞌal mactxequel chi unen jaxca tuꞌ, caxcꞌal chi yiꞌtej xaambꞌal tet Dios.
13 Jaex tiꞌ, ey wal junxa tzetyetal che yunne: Caw chi noel yibꞌan jun yet xaambꞌal yu yal je sat je yokꞌi, catuꞌ chex okꞌ wal yin mimej cuscꞌulal, yutol cꞌamxa chi chaꞌle je yofrenda yu Jehová yin tzalacꞌulal. 14 Che kꞌanlen tet Naj jaxca tiꞌ: ¿Tzet yu, yuxan cꞌam chi chaꞌle cu xaambꞌal tiꞌ? je chi, che yaloni. Jaꞌton yu wan tiꞌ: Yutol jaꞌcaw Jehová jix iloni, tol cꞌam che yun bꞌey jix je yakꞌ can je tiꞌ tet ebꞌ ix ix tol jix nupi je yetoj yet achꞌe jexto, caxcꞌal jaꞌ ebꞌ ix tuꞌ je yistil cꞌaltaꞌa, bꞌey jix je yakꞌ can je tiꞌ yet jix jex nupi tuꞌ. 15 Tumi man je yotaj oj tol jaꞌ Dios jix jex akꞌon nupoj yet jix je yiꞌlen je bꞌa yetoj je yistil, yet watxꞌ junxane mimanile je ye yetoj je yistil, cꞌal je pixan yetoj ebꞌ ix. ¿Tzet utbꞌil yeoc snaꞌbꞌal Dios, yuxan queytuꞌ yeocoj? Jaꞌton tiꞌ: Yu cꞌal ebꞌ je yuninal tol caw sconobꞌ Dios chi eloc ebꞌ. Yu jun tuꞌ, yuxan teynewej cꞌal je bꞌa, yet watxꞌ cꞌam ojabꞌ bꞌey chi too qꞌueycꞌulal je yu bꞌey jix je yakꞌ can je tiꞌ yet jix jex nupi yetoj je yistil yin je yachꞌeal. 16 Jaꞌcaw Jehová cu Diosal jaon Israel jon tiꞌ, Naj Miman Yeoc Yipalil chi alon jaxca tiꞌ: Che teyne cꞌal je bꞌa, cꞌam ojabꞌ che yute je bꞌa yin tol cꞌam chi yun bꞌey jix je yakꞌ can je tiꞌ tet je yistil. Yutol jain tiꞌ caw pena yul jin sat ta che poꞌole je bꞌa yetoj je yistil, tam wal chi skeꞌ che yetne ebꞌ ix je yistil tuꞌ, ẍi Dios.
Jun Scꞌual Yet Oj Naꞌle Oc Yin Ebꞌ Ánima
17 Tuxa jix txꞌemchatej sjowal scꞌul Jehová yu tzet che yalaꞌ; tol chi tocꞌal je kꞌanle jaxca tiꞌ: ¿Tzet yu, yuxan caw chi tit sjowal Naj kin? je chi, che yaloni. Jaꞌton yu jun tiꞌ: Yutol che yal jaex tiꞌ tol chi ẍaꞌ cꞌal scꞌul Jehová ebꞌ chi unen spenail, catuꞌ chi tzala yetoj ebꞌ, che yalon cꞌal pax oj. ¿Bꞌeytuꞌ eyoc Dios, Naj chi naꞌon oc yin sjichanil? je chi.