Jun Teꞌ Eyoc Yin Txꞌoxbꞌanileal
11
Jajle ojabꞌ bꞌe bꞌey txꞌotxꞌ Líbano,yet chi tzꞌaꞌcantoj masanil teꞌ kꞌuteꞌ ey tituꞌ yu kꞌakꞌ.
2 Cus ojabꞌ a teꞌ taa, yutol tuxa jix eyqꞌuey teꞌ kꞌuteꞌ, yutol jaꞌ wan teꞌ txꞌojxa swatxꞌil tuꞌ, tuxa jix lawi eyoj. Cus ojabꞌ a teꞌ jii bꞌey yul yet txꞌotxꞌ Basán, yutol jaꞌ teꞌ mimej kꞌajteꞌlaj, tuxa jix lawi ey teꞌ.
3 Jal jex ilom meꞌ jex tiꞌ, el ojabꞌ je yaw je yokꞌi, yutol tuxa jix lawi ey an cꞌultaj. Chi abꞌle yel yaw noꞌ bꞌalam bꞌey stiꞌ jaꞌ Jordán, yutol jix lawi el txꞌotxꞌ mimej eltzabꞌ.
Ebꞌ Cawan Ilom Meꞌ
4 Jix yal Jehová jin Diosal ey jin jaxca tiꞌ: Teyne noꞌ meꞌ tol txequelxa yei tol oj makꞌle camoj. 5 Jaꞌ ebꞌ chi manon el noꞌ tuꞌ, chi smakꞌ cam noꞌ ebꞌ yin tol cꞌam niꞌoj tzet chi snaꞌ ebꞌ, jaꞌ ebꞌ chi txonon noꞌ tuꞌ, chi yalon ebꞌ jaxca tiꞌ: Yuwal dios, jaꞌ tinaniꞌ bꞌeom jon xa, ẍi ebꞌ. Tam wal chi cus scꞌul niꞌoj ebꞌ yilomal noꞌ tuꞌ. 6 Jaxca jin cꞌal pax tuꞌ jin jain tiꞌ, cꞌam chi cus niꞌoj jin cꞌul yin ebꞌ ánima caan sat txꞌotxꞌ tiꞌ; junjun cꞌal ebꞌ oj waoc ebꞌ yul skꞌabꞌ mactxequel caan scawilal, cꞌal yul skꞌabꞌ sreyal ebꞌ. Jaꞌ ebꞌ tuꞌ oj etnentoj sat txꞌotxꞌ tiꞌ. Jain caw Jehová jin chi wal jun tiꞌ. Man xacꞌal oj jin col ebꞌ ánima tuꞌ yul skꞌabꞌ ebꞌ, ẍi Jehová.
7 Queyton tuꞌ jix yun wilon oc noꞌ meꞌ tol tꞌinan smakꞌle cam tuꞌ. Jaꞌ ebꞌ manom meꞌ tuꞌ, jaꞌ ebꞌ chi akꞌon jin tool. Jix jin seyon caabꞌ jin kꞌojoch: Ey jun jix wakꞌ yij, Watxꞌcꞌulal, jal junxa xin, jix wakꞌ yij sbꞌi, Junbꞌanebꞌilal. 8 Asan yin jun xꞌaaw jix jin chejon pax toj oxwan ebꞌ ilom meꞌ; jix lawi a jin mimancꞌulal yin ebꞌ, caw pena jin xacꞌal yul sat ebꞌ.
9 Jix walon tet noꞌ meꞌ tuꞌ jaxca tiꞌ: Manxa oj jex wil tinaniꞌ. Ta ey junoj jex chex cami, camanwej. Ta ey junoj mac chex makꞌon camoj, makꞌle ojabꞌ jex camoj, jantaj jex tol chex cancanoj, qꞌueylewej el je bꞌa, jin chi tet noꞌ.
10 Yu jun tuꞌ xin, jix wiꞌa teꞌ jin kꞌojoch jix wakꞌ yij sbꞌi, Watxꞌcꞌulal tuꞌ, jix jin makꞌon kꞌatoj teꞌ, yet chi xꞌoxel sbꞌa tol chi lawi swa kꞌane Jehová jix swaꞌne yetoj masanil nacionlaj. 11 Jaꞌton yet jun cꞌual tuꞌ, jix lawi can jun wa kꞌane tuꞌ, jal ebꞌ manom meꞌ, lalan snaꞌon oc ebꞌ win, catuꞌ jix naꞌcha el yu ebꞌ, tol jaꞌ Jehová lalan skꞌanabꞌ el yin tzetyetal chi wun tuꞌ. 12 Jix walon tet ebꞌ jaxca tiꞌ: Ta tol watxꞌ che yilaꞌ toolanewej jin; ta cꞌamaj xin, can ojabꞌ jaxca tuꞌ, jin chi tet ebꞌ. Yuxan 30 sbꞌisil chꞌen plata jix yakꞌ ebꞌ ey jin, yin jin tooloj.
13 Jix yalon Jehová ey jin jaxca tiꞌ: Iꞌa wan chꞌen tumin tuꞌ, catuꞌ cha waon cantoj bꞌey scꞌuanbꞌal tumin bꞌey templo, ẍi ey jin, Jix wiꞌontoj jun jin tool miman snaꞌon ebꞌ tuꞌ, tol smoo jin chaꞌoni, catuꞌ jix jin kꞌojon eytoj bꞌey cꞌuanbꞌal tumin tuꞌ. 14 Jix jin makꞌon kꞌatoj junxa teꞌ kꞌojoche jix wakꞌ yij sbꞌi, Junbꞌanebꞌilal tuꞌ. Jaxca tuꞌ jix yun scancan Judá yetoj Israel, yin cꞌamxa uẍtajlebꞌail snan xol ebꞌ. 15 Jix yalon pax Jehová ey jin jaxca tiꞌ: Jaxca ojabꞌ junoj ilom meꞌ cha wute ja bꞌa tol cꞌam niꞌoj chi yaoc yin scꞌul yiloni. 16 Yutol oj waoc junoj yilomal ebꞌ bꞌey jun nación tiꞌ, jaxca junoj ilom meꞌ cꞌam chi oc il yu noꞌ chi qꞌueytoj, tam wal seyon ecꞌoj, tam wal chi yante noꞌ yasinajtoj, tam wal chi yakꞌ sloꞌbꞌe noꞌ chi cam yu wail. Jaꞌ tiꞌ yet, tol chi ẍiꞌeytoj noꞌ bꞌakꞌech, tam wal chito cancan yajan noꞌ yu. 17 Okꞌbꞌal cꞌul jun yilomal jin conobꞌ cꞌam snaꞌbꞌal tuꞌ, yutol jix sbꞌejcan yopiso yin steynen jin conobꞌ. Low ojabꞌ chꞌen espada yin skꞌabꞌ, cꞌal yin sbꞌakꞌ sat bꞌey swatxꞌ. Sicbꞌoj ojabꞌ can el skꞌabꞌ tuꞌ, tan ojabꞌ xacꞌal skꞌakꞌal sbꞌakꞌ sat tuꞌ yin junelne, ẍi Dios.