Jix Jajcha El Jerusalén
12
Jaꞌ Jehová jix waꞌnen satcan, jix swaꞌnen cꞌal pax ey sbꞌatxlubꞌal yich txꞌotxꞌ txꞌotxꞌ tiꞌ, jaꞌ chi akꞌon cꞌal pax yiquisal ebꞌ ánima, jaꞌ chi alon yin Israel jaxca tiꞌ: 2 Jain Jehová jin tiꞌ, jain oj wakꞌbꞌalne Jerusalén jaxca tiꞌ, tol oj wakꞌ ecꞌ tzꞌeytzꞌon wan conobꞌ ey scawilal tuꞌ jaxca ebꞌ uqꞌuem an, jaꞌ yet oj yakꞌon jowal ebꞌ yin Jerusalén tuꞌ, cꞌal yin wanxa conobꞌlaj ey yul yet Judá. 3 Jaꞌ yet tuꞌ, jaꞌ Jerusalén laan oj wute jaxca junoj chꞌen chꞌen tol manxa jantajoj yalil, jaxca tuꞌ oj wute tet wanxa nación. Jaꞌ mactxequel oj yoche oj yakꞌle yiꞌon aoj, oj yasitoj yu. Masanil xacꞌal nacionlaj oj syambꞌa oc sbꞌa yakꞌon jowal yin Jerusalén. 4 Yu jun tuꞌ xin, jain xa oj jin xibꞌte masanil noꞌ che yaman ecꞌ tituꞌ; jaꞌ ebꞌ eyoc yibꞌan noꞌ che tuꞌ, oj wakꞌ tit joyna oj yil ebꞌ yu xiwcꞌulal. Tol manxa oj skeꞌ yilwan ẍe wan nación tuꞌ, yutol jain oj jin teyne ebꞌ yicꞌaal Judá. 5 Jaꞌ yet oj yilon ebꞌ yaaw yeoc bꞌey Judá wan tuꞌ, oj yalon ebꞌ jaxca tiꞌ: Jaꞌcaw Jehová, Naj Miman Yeoc Yipalil, jaꞌton sDiosal ebꞌ Jerusalén tiꞌ ketoj, jaꞌ chi akꞌon yip ebꞌ, ẍi ebꞌ, oj yalon ebꞌ. 6 Jaꞌ yet jun cꞌual tuꞌ, jaꞌ ebꞌ syaawilal Judá, laan oj wute ebꞌ jaxca junoj stzakꞌakꞌ tuxa cꞌal cajxeinaj chi oc xol teꞌ siꞌ, jaxca xacꞌal ya kopna xaj skꞌakꞌal junoj yuchan teꞌ taa chi oc xol ixim tiriw tol kꞌalbꞌilxa ey yin stopanil; oj yakꞌon lawoj el masanil wan nación ebꞌ ey scawilal tuꞌ, bꞌey yetcꞌulal swatxꞌ, cꞌal bꞌey sqꞌuexan kꞌabꞌ. Jaꞌ yet tuꞌ, watxꞌ cꞌal oj yun scaey ecꞌ ebꞌ caan bꞌey Jerusalén, bꞌey sconobꞌal junelxa.7 Jain Jehová jin tiꞌ, yin sbꞌabꞌelal oj jin colcan el ebꞌ yicꞌaal Judá, yet watxꞌ, jaꞌ ebꞌ yicꞌaal David, cꞌal masanil ebꞌ caan bꞌey Jerusalén man oj smeyne sbꞌa ebꞌ yibꞌan ebꞌ a Judá. 8 Jain Jehová jin tiꞌ, oj jin teyne cꞌal ebꞌ caan bꞌey Jerusalén tuꞌ. Jaꞌ ebꞌ cꞌam wal sjelanil yakꞌon jowal xol ebꞌ tuꞌ, caw oj jelanbꞌoj ebꞌ jaxca naj rey David. Jal pax ebꞌ yicꞌaal David xin, laan sjelanil oj eloc jaxca jin jelanil, ma jaxca sjelanil ebꞌ wángel tol bꞌabꞌel stoo sattaj ebꞌ. 9 Jaꞌ yet tuꞌ, jain oj wakꞌ lawoj yal cꞌal tzet conobꞌal oj yakꞌ jowal yin conobꞌ Jerusalén tuꞌ.
10 Oj waoc jun espíritu yet watxꞌ naꞌbꞌale yin ebꞌ yicꞌaal David, yetoj cꞌal yin ebꞌ caan bꞌey Jerusalén, yet watxꞌ oj txaloj ebꞌ ey jin. Jaꞌ yet oj jin yilon ebꞌ jix tejon oc chꞌen lanza win, oj okꞌa ebꞌ jaxca yokꞌ junoj mactxequel chi cam junoj qꞌuetxan scꞌaal, ma yu scamichal sbꞌabꞌel scꞌaal chi cami. 11 Jaꞌ yet jun cꞌual tuꞌ, caw oj oc jun miman cuscꞌulal bꞌey Jerusalén, jaxca wal cuscꞌulal ocnaj yu jun comon dios chi yij Hadad-rimón bꞌey spananil yul yet Meguido.a 12-14 Junjun cꞌal tujan icꞌaale bꞌey jun conobꞌ tuꞌ, txꞌoj txꞌoj cꞌal ey ebꞌ yet chi okꞌ ebꞌ, jaxca ebꞌ yicꞌaal David, cꞌal ebꞌ yicꞌaal Natán, cꞌal ebꞌ yicꞌaal Leví, cꞌal ebꞌ yicꞌaal Simí, cꞌal yetoj wanxa icꞌaale, txꞌoj txꞌoj chi okꞌ ebꞌ; txꞌoj txꞌoj cꞌal pax bꞌey chi okꞌ yistil ebꞌ.