2 Man jaxca oj tuꞌ spajtzebꞌal chi al-le tet ebꞌ chi skꞌanle yabꞌ tet echele cꞌal tet ebꞌ naꞌom el kꞌane, yaloni. Jaꞌ wan tuꞌ, lekꞌtiꞌal cꞌal, cꞌam yeloc apnoj. Jaꞌ tzet chi yalel ebꞌ yin sweyich, tucꞌal chi ijbꞌale qꞌueytoj ebꞌ chi kꞌanlen tuꞌ yu ebꞌ. Jaꞌ skꞌane ebꞌ chi akꞌon smimanil scꞌul junoj mactxequel, cꞌam niꞌoj yeloc apnoj; yu jun tuꞌ, yuxan tucꞌal chi qꞌueyecꞌ jun conobꞌ tuꞌ jaxca noꞌ meꞌ chi yabꞌ syaꞌil, yutol cꞌam yilomal.

3 Yu jun tuꞌ, yuxan chi yal Jehová jaxca tiꞌ: Tuxa jix tit jin jowal yin ebꞌ chi teynen jin conobꞌ, yuxan oj waoc syaꞌilal ebꞌ chi ijbꞌan ebꞌ. Jain Jehová, yaaw jin yibꞌan masanil, jain oj jin teyne jin conobꞌ, jaꞌton ebꞌ yicꞌaal Judá. Jaꞌ ebꞌ oj jin kꞌanbꞌalne jaxca noꞌ che akꞌom jowal.

4 Jaꞌ bꞌey xol ebꞌ tuꞌ oj eltej jun chꞌen chꞌen tol miman yeloc apnoj, cꞌal estaca yet kꞌap na, yetoj cꞌal julbꞌal yet jowal. Chi yal yeloc apnoj, tol jaꞌ bꞌey xol ebꞌ tuꞌ oj eltej masanil ebꞌ oj ijbꞌan ebꞌ.

5 Oj ecꞌ tecꞌton ebꞌ yibꞌan scajat, jaxca chi yun stecꞌon a sokꞌom ebꞌ soldado yul bꞌe cꞌal yul-laj calle. Oj yakꞌon eyqꞌuey jowal ebꞌ, yutol ey jin oc yetoj ebꞌ, oj elcan sqꞌuixwil ebꞌ eyoc yibꞌan che tuꞌ yu ebꞌ.

6 Jain oj wakꞌ yip ebꞌ yicꞌaal Judá, catuꞌ oj wakꞌon colcha el ebꞌ yicꞌaal José, catuꞌ oj wijbꞌan meltzo ebꞌ bꞌey sconobꞌ junelxa, yutol chi okꞌ jin cꞌul yin ebꞌ. Catuꞌ oj can pax can ebꞌ junelxa, jaxca tol cꞌam bꞌey jix wiꞌel ebꞌ yin jin cꞌul. Jain ton Jehová sDiosal jin ebꞌ, tol chi wabꞌ cꞌal tzet chi yal ebꞌ yin xa.

7 Jaꞌ ebꞌ Israel, caw jelan oj eloc ebꞌ jaxca soldado jelan yakꞌon jowal. Oj tzalabꞌoj a scꞌul ebꞌ jaxca ebꞌ chi ucꞌwi vino. Jaꞌ yet oj yilon yuninal ebꞌ jun tiꞌ, oj tzalabꞌoj a scꞌul ebꞌ. Caw oj tzalabꞌoj a spixan ebꞌ yu jin colwal.

8 Oj jin xubꞌloj tet ebꞌ, yu jin yambꞌan oc ebꞌ, yutol colchanajxa ebꞌ wu. Oj a can sbꞌisil ebꞌ, jaxca jix yun ebꞌ yet peyxa.

9 Jix jin sajlemne cantoj ebꞌ bꞌey xol-laj nacionlaj. Caxcꞌal mi naat ey ebꞌ, oj jin naꞌle cꞌaltej yu ebꞌ. Ey jun cꞌual oj meltzo ebꞌ yetoj yuninal.

10 Oj wakꞌ meltzotej ebꞌ bꞌey txꞌotxꞌ Egipto, oj wiꞌ cꞌal pax tej ebꞌ bꞌey Asiria, oj wakꞌ caey ebꞌ bꞌey Galaad cꞌal bꞌey Líbano. Caw miman oj yun syamcha oc ebꞌ, ian cꞌamxa bꞌey oj ey ebꞌ.

11 Jaꞌ yet oj ecꞌtoj ebꞌ xol syaꞌilal, jaxca xol jaꞌ mar, jain oj wiꞌel yipal jaꞌ mar tuꞌ; jal jaꞌ miman Nilo oj tantoj jaꞌ. Oj wakꞌon lawoj ey smeynebꞌail ebꞌ Asiria, cꞌal wakꞌon lawoj ey yopiso ebꞌ yaaw bꞌey txꞌotxꞌ Egipto.

12 Jain oj wakꞌ yipalil ebꞌ jin conobꞌ. Yetoj jin colwal, yuxan oj skeꞌ yu ebꞌ. Jain caw Jehová jin chi wal wan kꞌane tiꞌ, ẍi Jehová.