Syaꞌilal Oj Jul Yibꞌan Wan Scajat Ebꞌ Israel
9
Jaꞌton jun kꞌane tiꞌ jix yal Jehová, yutol oj yaoc syaꞌilal yibꞌan ebꞌ ey yul yet Hadrac, cꞌal yibꞌan miman conobꞌ Damasco. Man asanne oj yin ebꞌ sconobꞌ bꞌey eyoc sat, tꞌanan cꞌal pax oc Naj yin masanil ebꞌ txꞌoj conobꞌal. 2 Yu jun tuꞌ, oj yaoc syaꞌilal Naj yibꞌan conobꞌ Hamat, jatuꞌ ey stiꞌlaj eltoj txꞌotxꞌ Hadrac. Oj yaon cꞌal pax oc syaꞌilal Naj yin conobꞌ Tiro, cꞌal yin Sidón, caxcꞌal mi caw jelan snaꞌbꞌal ebꞌ. 3 Jaꞌ conobꞌ Tiro tuꞌ jix swaꞌne a smuroal sconobꞌ, catuꞌ jix syambꞌan oc oro cꞌal plata yin xa mimej bꞌulan, jaxca chi yun syambꞌale oc bꞌulan txꞌotxꞌ txꞌotxꞌ. 4 Jaꞌ Jehová oj iꞌon ecꞌ masanil sbꞌeomal oj kꞌojletoj sbꞌeomal tuꞌ bꞌey yul jaꞌ mar, catuꞌ oj tzꞌaꞌcantoj jun conobꞌ tuꞌ masanil.5 Jaꞌ yet oj yilon conobꞌ Ascalón jun tuꞌ, oj xiwa ebꞌ yiloni. Yel xacꞌal miman oj yun yabꞌen cꞌal pax syaꞌil conobꞌ Gaza. Caw miman syaꞌilal oj yabꞌ cꞌal pax conobꞌ Ecrón, yutol jaꞌ tzet eyoc yipoj scꞌul, oj eyqꞌuey sat txꞌotxꞌ. Jaꞌ conobꞌ Gaza tuꞌ, oj cancan yin cꞌamxa sreyal; jal Ascalón, cꞌamxa junoj ánima oj caey can bꞌey. 6 Jaꞌ bꞌey Asdod, calan xacꞌal yeoc ebꞌ ánima oj caey ecꞌ tituꞌ. Chi yalon Jehová jaxca tiꞌ: Jaxca tuꞌ oj yun wiꞌon ey smeynebꞌail ebꞌ Filisteo. 7 Manxa oj wakꞌ noꞌ chiꞌbꞌe ẍiꞌ ebꞌ eyto cꞌal oc ẍiqꞌuil, tam wal oj to octoj wan loꞌbꞌe tol ey sowalil yul stiꞌ ebꞌ, jatacꞌalaꞌ yalon ley, jaꞌ xol wan ánima tuꞌ, eyto ebꞌ oj canoj, oj oc can ebꞌ wetoj. Laan xa oj yun can ebꞌ jaxca ebꞌ a Judá, jal ebꞌ a Ecrón tuꞌ, laan xa oj yun can ebꞌ jaxca ebꞌ Jebuseo. 8 Catuꞌ oj jin eecꞌ cꞌal ecꞌ yetoj jin conobꞌ, yu jin teynen ebꞌ cꞌal jin colon el ebꞌ yul skꞌabꞌ ebꞌ chi ochen chi akꞌon eyqꞌuey yaloni. Jaꞌ ebꞌ etnem ánima, cꞌamxa cꞌal bꞌey oj etnele jin conobꞌ yu ebꞌ, jain caw oj jin teyne jin conobꞌ tuꞌ, ẍi Dios.
Jun Sreyal Israel Oj Juloj
9 Jaꞌ Jehová chi alon jaxca tiꞌ: Tzalaanwej jex a conobꞌ Sión. Bꞌitnanwej yin tzalacꞌulal jex a Jerusalén. Ilaꞌ wal sjul je Reyal je xol yin yeynajilal, caw jichan pax snaꞌbꞌal Naj. Jaꞌ oj akꞌon colbꞌanile. Yeynajil oj yute sbꞌa, eyoc Naj yibꞌan jun noꞌ bꞌuru, yuneꞌ jun noꞌ xutx bꞌuru.
10 Oj wakꞌ lawoj el scarruaje yet jowal bꞌey Israel, cꞌal noꞌ ẍe ebꞌ bꞌey Jerusalén cꞌal sjulbꞌal yet jowal ebꞌ. Jaꞌ jun rey tuꞌ oj alon oj tol ey ojabꞌ watxꞌcꞌulal bꞌey masanil nacionlaj, catuꞌ oj yakꞌon yaawil bꞌey stiꞌ jaꞌ mar, masantaꞌcꞌal bꞌey junxa stiꞌ jaꞌ, chi too tacꞌal bꞌey jaꞌ Éufrates, masantaꞌcꞌal bꞌey slawubꞌal txꞌotxꞌ txꞌotxꞌ tiꞌ.
11 Jaex a Jerusalén jex tiꞌ, yu jin wa kꞌane jix wakꞌ je yetoj, tol waꞌnebꞌil yetoj ẍiqꞌuil noꞌ xaambꞌal, yuxan oj jex wiꞌatej bꞌey yul jun kꞌobꞌ naat yich bꞌey cꞌam jaꞌ, bꞌey preso je yeocoj.
12 Mac jex jaxca preso je yeocoj, tol ey jin oc yipoj je cꞌul, meltzaanwej bꞌey watxꞌ chex caeyi. Chi wal ey jex, tol jain oj wakꞌ syaaxilal je yibꞌan. Ecꞌbꞌan oj yun jin spajtzen ey jex, yintaj bꞌey jix je yabꞌ syaꞌil yet yalantoj.
13 Jaꞌ Judá, oj jin kꞌanbꞌalne jaxca junoj julbꞌal, jal Israel oj jin kꞌanbꞌalne yin sbꞌakꞌ jin julbꞌal. Jal ebꞌ a Jerusalén xin, oj jin kꞌanbꞌalne ebꞌ jaxca wespada, yin wakꞌon jowal yin ebꞌ a Grecia, ẍi Dios.
14 Jaꞌcaw Jehová oj xꞌox sbꞌa yibꞌan sconobꞌ. Jaxca raya oj yun sjulwai. Jaꞌ Jehová, Naj Yaaw, oj xuꞌ strompeta, catuꞌ oj ecꞌ lemna xol mimej kajxuchum kaꞌeꞌ bꞌey yetcꞌulal sur.
15 Jaꞌ Jehová, Naj ey Yipalil, jaꞌ oj colwa yin ebꞌ sconobꞌ tuꞌ. Oj tecꞌle ey ebꞌ chi julwa yin ebꞌ sconobꞌ, catuꞌ oj yakꞌon lawoj el ebꞌ scajat tuꞌ. Tuxa cꞌal oj el yaw ebꞌ sconobꞌ Naj xol jowal jaxca ebꞌ uqꞌuem an. Oj maltoj ẍiqꞌuil ebꞌ scajat tuꞌ yu, jaxca chi yun smaltoj ẍiqꞌuil noꞌ xaambꞌal eey yul secꞌ bꞌey yin xiquinlaj jun yet xaambꞌal.
16 Jaꞌ yet jun cꞌual tuꞌ, Jaꞌ Jehová oj colon el sconobꞌ jaxca chi yun scolon smeꞌ junoj ilom meꞌ. Tuxa cꞌal oj tzejeji yili ebꞌ yet Dios bꞌey yul sconobꞌal; jaxca xacꞌal yili chꞌen chꞌen txꞌojxa swatxꞌil yili eyoc yin junoj corona.
17 Manxa jantajoj swatxꞌil, yutol caw watxꞌ yili jun conobꞌ tuꞌ. Yutol caw oj yakꞌ ixim tiriw cꞌal vino, watxꞌ xacꞌal oj yun ẍꞌibꞌ ebꞌ achꞌe cꞌal ebꞌ ix kꞌopo.