Canebꞌ Carruaje Yet Jowal
6
Ey cꞌal pax junxa tzet jix txꞌoxle wilaꞌ, jaxca yin weyicheal. Jix wil yeltej canebꞌ carruaje yet jowal bꞌey snan xol caabꞌ tzalan, tol bronce chꞌen cꞌal eloj. 2 Jaꞌ jun bꞌabꞌel carruaje tuꞌ, tokꞌbꞌil oc yu jun noꞌ cajin che. Jal jun yet scaabꞌ, kꞌejin che noꞌ tokꞌnen ocoj. 3 Jal jun yet yox, sajin che noꞌ tokꞌnen ocoj. Jal jun yet scan, tzꞌibꞌin yili noꞌ che tokꞌnen ocoj.4 Jix jin kꞌanle tet jun ángel chi kꞌanabꞌ wetoj tuꞌ jaxca tiꞌ: Jaach Waawil, ¿tzet chi yal yeloc apnoj junxa tiꞌ? jin chi tet. 5 Jix yalon jun ángel tuꞌ ey jin jaxca tiꞌ: Jaꞌton wan tiꞌ chi too bꞌey scanebꞌal tujan bꞌey chi tit kaꞌeꞌ, bꞌey sattaj Naj Yaaw Yeoc yibꞌan masanil yul yibꞌankꞌinal tiꞌ. 6 Jaꞌ jun carruaje tokꞌbꞌil oc yu noꞌ kꞌejin che tuꞌ, chi too bꞌey jun conobꞌ bꞌey yetcꞌulal norte. Jal junxa carruaje tokꞌbꞌil oc yu noꞌ sajin che tuꞌ, chi too bꞌey jun conobꞌ yetcꞌulal bꞌey chi too cꞌu. Jal junxa carruaje tokꞌbꞌil oc yu noꞌ tzꞌibꞌin che tuꞌ, chi too can bꞌey yetcꞌulal sur, ẍi jun ángel tuꞌ.
7 Jaꞌ wan noꞌ che caw ey yip tuꞌ, chi yoche xacꞌal chi too yil bꞌey masanil yul yibꞌankꞌinal tiꞌ. Jix yalon jun ángel tuꞌ tet noꞌ jaxca tiꞌ: Asiꞌwej il bꞌey masanil yul yibꞌankꞌinal, ẍi. Catuꞌ jix too noꞌ che tuꞌ xin.
8 Jix lawi tuꞌ, jix awi jun ángel tuꞌ ey jin jaxca tiꞌ: Il ton abꞌi, jaꞌ yu jun carruaje jix too bꞌey jun conobꞌ ey bꞌey yetcꞌulal norte tuꞌ, jaꞌ yu, yuxan oj oc tucan sjowal scꞌul Jehová yibꞌan nación tuꞌ, ẍi.
Jix Oc Yopiso Naj Josué
9 Jaꞌ Jehová jix alon wan kꞌane tiꞌ ey jin jaxca tiꞌ: 10 Chi skeꞌ cha wiꞌa junoj saꞌbꞌeal xol ebꞌ meltzonajtej yin jaxca presowomal bꞌey Babilonia: Jaꞌton Heldai, Tobías, cꞌal Jedaías. Jacꞌalaꞌ yet jun cꞌu tuꞌ chach too bꞌey sna naj Josías, scꞌaal Sofonías. 11 Jaꞌ yetoj chꞌen tumin plata cꞌal chꞌen oro oj ja chaꞌ tuꞌ, cha waꞌne junoj corona, catuꞌ cha waon oc yin sjolom Josué, naj sat yakꞌomal xaambꞌal, jaꞌton scꞌaal Josadac. 12 Cha walon tet jaxca tiꞌ: Jaꞌ Jehová, Naj Miman Yeoc Yipalil chi aloni, tol jaꞌ jun mac chi yij, Swol Teꞌ, oj yiꞌ yip yopiso bꞌey eyecꞌ tuꞌ, catuꞌ oj scaꞌ waꞌnen a jin templo. 13 Jaꞌton jun tꞌinan cꞌaltaꞌ scaꞌ swaꞌnen a jin templo tuꞌ, catuꞌ oj ẍaꞌon smimanbꞌilal jaxca yet junoj rey; catuꞌ oj ey chotan yibꞌan ẍila bꞌey sdespacho yin yakꞌon yaawil. Jaꞌ bꞌey spacꞌul sdespacho tuꞌ oj ey chotan jun yakꞌomal xaambꞌal, junxane yakꞌon snaꞌbꞌal ebꞌ scawanil. 14 Jaꞌ jun corona oj ja waꞌne tuꞌ, chi cancan bꞌey yul jin templo yet chi naꞌletej naj Heldai, Tobías, Jedaías cꞌal Josías, scꞌaal Sofonías, ja chi tet, ẍi Jehová.
15 Oj tit ebꞌ ánima bꞌey naat yu scolwa je yetoj, yu scaꞌ waꞌnele a stemplo Jehová. Queytuꞌ oj yun snaꞌcha el je yu, tol jaꞌ Jehová, Naj Miman Yeoc Yipalil, jaꞌ jix jin chejontej yu jul walon ey jex. Jaꞌ jun tiꞌ oj yunne, ta tol jaex tiꞌ oj je chaꞌ je yabꞌe, cꞌal je jijen tzet chi yal Jehová cu Diosal.