Yet Chi Kijle Nocha Cu Bꞌa Yin Man Xolilaloj
7
Jaꞌ yet scan cꞌual yoc yet sbꞌalonebꞌ xꞌaaw, (jaꞌton jun xꞌaaw chi yij Quisleu,) yet scan abꞌil xa yoc naj Darío yin reyal, jaꞌ yet tuꞌ jix kꞌanabꞌ Jehová ey jin, jain Zacarías jin tiꞌ. 2 Jaꞌ yet tuꞌ, jaꞌ ebꞌ a Betel jix chejontej Sarézer, cꞌal Réguem-mélec, yetoj ebꞌ winaj jaꞌjun yetoj ebꞌ bꞌey stemplo Jehová, yet chi kꞌanle scolwal Naj Tol Miman Yeoc Yipalil, 3 cꞌal skꞌanlen tet ebꞌ ẍejabꞌ Naj, cꞌal tet ebꞌ yakꞌomal xaambꞌal jaxca tiꞌ: ¿Oj mi cu pich cꞌal cu bꞌa yetoj an pichile yet cuscꞌulal, cꞌal kijlen nocha cu bꞌa yet sjoꞌ xꞌaaw yet junjun abꞌil, yu jix uchcha ey templo, jaxca cꞌaltaꞌ chi kunne masantaꞌcꞌal tinaniꞌ? ẍi ebꞌ.4 Jix yalon Jehová ey jin jaxca tiꞌ: 5 Al tet masanil ebꞌ ánima bꞌey yul conobꞌ tiꞌ, cꞌal tet ebꞌ yakꞌomal xaambꞌal: Jaex tiꞌ, eyxa 70 abꞌil xacꞌal je bꞌeybꞌalneni tol che yaoc an eel pichile je yin, cꞌal je yijlen nocha je bꞌa yin yet sjoꞌ xꞌaaw cꞌal yet sjuj xꞌaaw. Man yu oj tol ey weloc apnoj yul je sat, yuxan che yun jun tuꞌ. 6 Jacꞌalaꞌ yet chex lowi, cꞌal yet che yuqꞌuen jaꞌ, asan yu je yakꞌon tzalabꞌoj je cꞌul yul je yet yuxan che yunne, ẍi Jehová, ja chi. 7 Jaꞌ tzet chi wal ey jex tinaniꞌ, jaꞌton chejbꞌanile jix wakꞌ yalel ebꞌ jin chejabꞌ yet peyxa, yet eyecꞌ Jerusalén yin tzalacꞌulal, caw miman ánima caan ecꞌ tituꞌ, caw miman cꞌal pax wan conobꞌlaj joyan oc yinlaj, cꞌal bꞌey yul yet txꞌotxꞌ Négueb, yetoj cꞌal bꞌey txꞌotxꞌ acꞌal-laj.
Yu Spital Snaꞌbꞌal Ebꞌ Israel Yuxan Jix Iꞌletoj Ebꞌ Yin Jaxca Presowomal
8 Jix kꞌanabꞌ Jehová ey jin, jix yalon jaxca tiꞌ: 9 Jaꞌton wan tiꞌ, walnaj yet peyxa tet ebꞌ jin conobꞌ: Watxꞌ ojabꞌ cꞌal chi yun je waꞌne yeoc junoj kꞌane xol ebꞌ je yet animail, watxꞌ che yute je naꞌbꞌal, cꞌal scus oc je cꞌul je yin junjun jex. 10 Cꞌam ojabꞌ che yetne ebꞌ ix ix camnajxa yichamil, tam wal ebꞌ unin cꞌamxa smam, cꞌal ebꞌ cꞌamxa xutx, tam wal ebꞌ txꞌoj conobꞌal, cꞌal ebꞌ mebꞌa, tam wal je naꞌon je yunen junoj spenail je yin junjun jex, jin chi, ẍi Dios. 11 Ma pax yal scꞌul ebꞌ conobꞌ jix sjije; txꞌoj cꞌal bꞌey tꞌanantoj masanil ebꞌ, caw chacan xacꞌal jix yute sbꞌa ebꞌ. 12 Jix yakꞌon cawbꞌoj el snaꞌbꞌal ebꞌ, jaxca chꞌen yaaxchꞌen, yet watxꞌ cꞌam chi ẍaꞌ yabꞌ cuybꞌanile ebꞌ, cꞌal chejbꞌanile jix yal Jehová, jaꞌton wan jix chejle yal ebꞌ ẍejabꞌ yu Yespíritu yet peyxa, jaꞌton wan chejbꞌanile cꞌal wan cuybꞌanile.
Yu jun tuꞌ, yuxan yel xacꞌal miman jix yun stit sjowal scꞌul Jehová. 13 Jix yalon jaxca tiꞌ: Jaxca jix yute sbꞌa ebꞌ tol ma yal scꞌul jix ẍaꞌ yabꞌ tzet chi walaꞌ, yet jix jin kꞌanabꞌ tet ebꞌ; jaxca cꞌal pax tuꞌ jain tiꞌ, tam wal jix jin takꞌwi tet ebꞌ jix yal sbꞌa ey jin. 14 Yu jun tuꞌ, yuxan jix wuch sajlemtoj ebꞌ, jaxca chi yun xuꞌletoj junoj tzetyetal yu cajxuchum kaꞌeꞌ. Jix toocan ebꞌ bꞌey wan nacionlaj tol man yotaj oj. Jal snación ebꞌ, cusiltaj txꞌotxꞌ xacꞌal jix yun cantoj yintaj ebꞌ. Cꞌamxa junojxa mac jix caey can ecꞌoj. Jaꞌ snación ebꞌ, caw watxꞌ yeocoj; jaꞌcaw ebꞌ jix utencantoj yin cusiltaj txꞌotxꞌ, ẍi Dios.