An Juun Chi Ecꞌ Jenenoj
5
Jix lawi tuꞌ xin, ey junxa tzet jix txꞌoxle wilaꞌ. Ey jun an juun tzꞌibꞌebꞌil, tol chi ecꞌ jenenoj jix wilaꞌ. 2 Jix skꞌanle jun ángel tuꞌ ey jin jaxca tiꞌ: ¿Tzetyetal jun cha wil tuꞌ? ẍi ey jin. Jix walon tet: Ey jun an juun tzꞌibꞌebꞌil chi wilaꞌ, tol chi ecꞌ jenenoj. Bꞌalonebꞌ metro yeoc skꞌatil, nan sjoꞌ metro yeoc sat, jin chi tet.3 Jix yalon ey jin jaxca tiꞌ: Jaꞌ tituꞌ tzꞌibꞌebꞌil ey jun syaꞌilal tol oj jul yibꞌan masanil ebꞌ penawom bꞌey jun conobꞌ tiꞌ. Jatacꞌalaꞌ tzet tzꞌibꞌebꞌil oc yin scaabꞌ paqꞌuil. Masanil ebꞌ elkꞌom, cꞌal masanil ebꞌ chi yakꞌ stiꞌ yin lekꞌtiꞌal, oj iꞌle el ebꞌ bꞌey sat txꞌotxꞌ txꞌotxꞌ tiꞌ. 4 Jaꞌcaw Jehová, Naj Miman Yeoc Yipalil chi alon jaxca tiꞌ: Jain oj watoj jun syaꞌilal tiꞌ, yet watxꞌ chi octoj an juun tiꞌ yul sna ebꞌ elkꞌom, cꞌal ebꞌ chi slocbꞌa jin bꞌi yin lekꞌtiꞌal, catuꞌ oj eecꞌ cꞌal ecꞌ jun syaꞌilal tuꞌ, masantaꞌcꞌal tol cꞌamxa junoj teꞌ patzabꞌ, tam wal junojxa chꞌen chꞌen oj cancanoj, ẍi Jehová, ẍi jun ángel tuꞌ.
Jun Ix Ix Eeytoj Yul Jun Echbꞌal
5 Jix eltej jun ángel jix kꞌanabꞌ wetoj tuꞌ, catuꞌ jix yalon ey jin jaxca tiꞌ: Chi cam ja wilon jun lalan xꞌoxon a sbꞌa tuꞌ, ẍi ey jin. 6 Jix jin kꞌanle tet jaxca tiꞌ: ¿Tzetyetal jun tuꞌ? jin chi tet. Jix yalon ey jin: Jaꞌ jun tuꞌ, echbꞌal. Jaꞌton chi txꞌoxontej spenail ebꞌ ánima caan bꞌey yul yibꞌankꞌinal tiꞌ, ẍi.
7 Jaꞌ jun echbꞌal tuꞌ, plomo chꞌen eyoc smajiloj. Jaꞌ yet jix iꞌle el smajil tuꞌ, ey jun ix chotan eytoj yul jun echbꞌal tuꞌ. 8 Jix yalon jun ángel tuꞌ ey jin jaxca tiꞌ: Jaꞌ jun ix jix ja wil tuꞌ, jaꞌ spenail chi xꞌoxtej, ẍi. Jix lawi tuꞌ, jix tenle can eytoj ix yul jun echbꞌal tuꞌ, catuꞌ jix smajchen can ey smajil tol plomo chꞌen tuꞌ.
9 Jix wilon pax junelxa, ey cawan ix chi tit jenenoj. Jaꞌ ebꞌ tuꞌ ey xicꞌ ebꞌ, jaxca yet noꞌ garza, jix yiꞌa jun echbꞌal ebꞌ tuꞌ, jix too pax jenenoj ebꞌ.
10 Jix jin kꞌanlen pax tet jun ángel chi kꞌanabꞌ wetoj tuꞌ jaxca tiꞌ: ¿Bꞌeytuꞌ chi yiꞌtoj jun echbꞌal ebꞌ tuꞌ? jin chi tet. 11 Jix yalon ey jin: Tol oj toj swaꞌne jun templo ebꞌ bꞌey yul yet Babilonia. Jaꞌ yet oj waꞌxoj jun templo tuꞌ, catuꞌ oj swaꞌnen octoj chotan jun echbꞌal tuꞌ ebꞌ yibꞌan sbꞌatxlubꞌal, ẍi.