Jix Txꞌoxle Jun Sbꞌatxlubꞌ Tzejtebꞌal Yil Naj Zacarías
4
Jix lawi tuꞌ xin, catuꞌ jix meltzotej naj ángel jix kꞌanabꞌ wetoj tuꞌ an, jix stenel jin weyan jaxca xacꞌal chi yun yel sweyan junoj tol caw chi weyi. Jix skꞌanlen ey jin jaxca tiꞌ: 2 ¿Tzetyetal cha wilaꞌ? ẍi ey jin. Jix walon tet: Ey jun sbꞌatxbꞌanil tzejtebꞌal tol oro cꞌal eloj, yetoj jun sneetal aceite eyatoj yibꞌan. Jaꞌ yin jun sbꞌatxlubꞌ tuꞌ eyoc jujebꞌ tzejtebꞌal. Junjun cꞌal tzejtebꞌal tuꞌ ey stuboal chi iꞌon bꞌey aceite. 3 Junne eey caabꞌ teꞌ olivo yetoj jun sbꞌatxlubꞌ tzejtebꞌal tuꞌ, jun eyoc bꞌey swatxꞌ, cꞌal junxa bꞌey sqꞌuexan, jin chi tet.4 Jix jin kꞌanlen cꞌal pax tet jaxca tiꞌ: Jaach Waawil, ¿tzet wal chi yal yeloc apnoj jun tiꞌ? jin chi tet. 5 Jix yalon Naj ey jin jaxca tiꞌ: ¿Tumi man ja wotaj oj tzet chi yal yeloc apnoj xin? ẍi ey jin. Jix waloni: Cꞌamaj, jin chi tet.a
6 Jix yalon cꞌal naj ángel jaxca tiꞌ ey jin: Jaꞌton jun kꞌane tiꞌ chi yal Jehová, Naj Miman yeoc Yipalil, jaꞌ chi alon tet Zorobabel. Manaj yu ebꞌ soldado, tam wal yu ja wipal yul ja wet, yutol asanne yu Wespíritu, yuxan oj skeꞌ ja wu. 7 Jaꞌ syaꞌtajilal swaꞌxi templo, caxcꞌal jaxca junoj miman wonan, jal pax yul ja sat jaach Zorobabel, man yaꞌtaj oj yun swaꞌxi. Jaach caw oj ja waoc chꞌen slawubꞌal chꞌen tol miman yeocoj, yajbꞌan chi el yaw masanil ebꞌ conobꞌ jaxca tiꞌ: ¡Txꞌojxa swatxꞌil yili! ¡Ey ojabꞌ swatxꞌcꞌulal Dios yibꞌan! ẍi xacꞌal ebꞌ, ẍi Jehová, ẍi jun ángel tuꞌ.
8 Jix lawi tuꞌ, jix yalon Jehová jun kꞌane jaxca tiꞌ: 9 Jaꞌ naj Zorobabel jix aon ey yich jun templo tiꞌ, jacꞌal pax naj oj laon cꞌal pax waꞌxoj. Queytuꞌ oj yun snaꞌcha el yu ebꞌ jin conobꞌ, tol jain Jehová jin tol Miman yeoc Wipalil, jain jix jaach jin chejtoj. 10 Jaꞌ wan ebꞌ tol cꞌam yeloc apnoj yul sat yet jix el yich tuꞌ, jaꞌ yet oj yilon oc ebꞌ tol lalan yaon oc Zorobabel chꞌen plomo yin chꞌen slawubꞌal chꞌen, oj tzala a ebꞌ, ẍi Dios.
Jix lawi wan tuꞌ, jix yalon tocꞌal naj ángel tuꞌ jaxca tiꞌ: Jaꞌ jujebꞌ tzejtebꞌal tiꞌ, jaꞌton chi txꞌoxontej sbꞌakꞌ sat Jehová, tol chi yil bꞌey masanil sat txꞌotxꞌ tiꞌ, ẍi.
11 Jix jin kꞌanle pax tet jaxca tiꞌ: ¿Tzet chi yal yeloc apnoj caabꞌ teꞌ olivo, tol junjun cꞌal bꞌey junjun spacꞌul jun sbꞌatxlubꞌ tzejtebꞌal tuꞌ? jin chi tet. 12 Jix jin kꞌanlen cꞌal pax oj: ¿Tzet chi yal yeloc apnoj caabꞌ skꞌabꞌ teꞌ olivo tol junne yeoc yetoj caabꞌ chꞌen tubo tol oro cꞌal eloj bꞌey chi eytoj yaceiteal? jin chi. 13 Jix takꞌwi naj ángel tuꞌ ey jin jaxca tiꞌ: ¿Tumi man ja wotaj oj tzet chi yal yeloc apnoj? ẍi ey jin. Jix walon tet: Jaach Waawil, man wotaj oj, jin chi tet.
14 Jix yalon ey jin: Jaꞌton caabꞌ tiꞌ chi txꞌoxontej ebꞌ cawan sicꞌbꞌil eloj, jaꞌton ebꞌ chi akꞌwi servil tet Jehová, Naj Tol Miman Yeoc Yipalil, bꞌey yibꞌan masanil txꞌotxꞌ txꞌotxꞌ tiꞌ, ẍi jun ángel tuꞌ.