Jix Qꞌuexle Spichil Naj Josué
3
Jix txꞌoxle wilaꞌ, tol jaꞌ naj Josué, jaꞌton naj sat yakꞌomal xaambꞌal, linan oc naj sattaj Naj yángel Jehová; jaꞌ bꞌey yetcꞌulal swatxꞌ skꞌabꞌ naj Josué tuꞌ, jaꞌ tituꞌ linan oc Satanás, yet chi al-le octoj spenail Josué tuꞌ yu. 2 Jix yalon Naj yángel Jehová tuꞌ tet Satanás jaxca tiꞌ: Jaꞌ Jehová, Naj jix sicꞌon el conobꞌ Jerusalén, jaꞌ oj jaach tzuonoj; yutol jaꞌ jun winaj tiꞌ, laan jaxca junoj cuux chi iꞌle eltej bꞌey xol kꞌakꞌ, ẍi. 3 Jal pax naj Josué tuꞌ xin, caw tzꞌiltaj yoc spichil naj eyocoj, linan cꞌal oc naj sattaj yángel Jehová. 4 Jix lawi tuꞌ, jix yalon jun ángel tuꞌ tet ebꞌ yakꞌomal servil linan oc sattaj tuꞌ, tol chi iꞌle el an stzꞌiltaj pichil naj Josué eyoc tuꞌ. Eyman jix yal tet Josué jaxca tiꞌ: Chi cam ja wiloni, jaꞌ chi yal yeloc apnoj jun tiꞌ, tol jain chi wiꞌ can el ja penail. Jaꞌ tinaniꞌ oj wakꞌ an pichile yet kꞌin ja waocoj, ẍi. 5 Jix lawi tuꞌ, jix walon tet jaxca tiꞌ: Toloj wal chi ale oc junoj skꞌoxil sjolom Josué tuꞌ caw saj yili, jin chi. Jix yaon a ebꞌ yin sjolom xin, jix ale oc an acꞌ pichile yet kꞌin tuꞌ yin. Yajbꞌan tuꞌ, linan cꞌal ecꞌ ebꞌ yángel Jehová tituꞌ.6 Jix lawi tuꞌ, jix yalon Naj yángel Jehová tet Josué jaxca tiꞌ: 7 Jaꞌton wan tiꞌ chi yal Jehová, Naj Miman yeoc yipalil: Bꞌeybꞌalne cꞌal jin bꞌeybꞌal, catuꞌ cha jijen cꞌal masanil tzet jix wakꞌ ja wunne. Ta tol oj ja wun masanil wan tuꞌ, oj jaach waoc yilomaloj jin templo, cꞌal ja teynen yetoj yamakꞌil. Jain oj waoc ja wopiso yin ja woc jin sattaj jaxca ebꞌ jin chejabꞌ linan ecꞌ jin sattaj tiꞌ. 8 Chi cam ja wabꞌen xin, Josué, jaach tiꞌ, tol sat yakꞌomal xaambꞌal ja weocoj. Catuꞌ chi cam ja wabꞌen yetoj ebꞌ eyoc yin yopiso ja wetoj, yutol jaex tiꞌ, txꞌoxbꞌanile je yeoc yu junoj tzet lalan sjuli. Oj wiꞌtej jun jin chejabꞌ, jaꞌton jun mac chi yij, Swol Teꞌ. 9 Jain chi waoc sattaj Josué jun chꞌen chꞌen tol ey jujebꞌ spacꞌul. Jain caw oj jin tzꞌibꞌe oc wan kꞌane yin. Jaxca tuꞌ xin, yin junne cꞌual oj yun wiꞌon el spenail ebꞌ ánima caan bꞌey jun nación tiꞌ. 10 Jaꞌ yet oj apnoj jun cꞌual tuꞌ, jaex tiꞌ, oj je yawtele je bꞌa. Yin xacꞌal tzalacꞌulal oj yun je xew yalan yenel xaj teꞌ je yuva, cꞌal teꞌ higo. Jain Jehová jin tol Miman yeoc Wipalil chi wal jun tiꞌ, ẍi Jehová, ẍi jun ángel tuꞌ.