Jaꞌ Jun Winaj Iꞌbꞌil Oc Jun Txꞌan Echbꞌal Txꞌotxꞌ Yu
2
Jix wilon pax oj, tol ey jun mac iꞌbꞌil oc jun txꞌan echbꞌal txꞌotxꞌ yu. 2 Jix jin kꞌanlen tet jaxca tiꞌ: ¿Bꞌeytuꞌ chach toocoj? jin chi. Jix yalon ey jin jaxca tiꞌ: Tol chin too weche conobꞌ Jerusalén, yet chi naꞌcha eloj, jantaj yeoc skꞌatil, cꞌal jantaj yeoc sat, ẍi ey jin.3 Yu jun tuꞌ xin, jix wilon stoo jun ángel jix kꞌanabꞌ wetoj tuꞌ; ey junxa ángel jix eltej jul chaꞌoni, jaꞌ jix alon tet: 4 Asiꞌ yin eymanil, al tet jun achꞌe tuꞌ tol iꞌbꞌil oc jun txꞌan echbꞌal txꞌotxꞌ tuꞌ yu, tol oj caey ebꞌ ánima bꞌey Jerusalén junelxa, catuꞌ yel xacꞌal oj a can sbꞌisil mac oj caey tituꞌ; yel xacꞌal oj a cꞌal pax can sbꞌisil sjobꞌbꞌeal noꞌ ebꞌ, tol manxa oj skeꞌ yoc smuroal sconobꞌ ebꞌ. 5 Jaꞌcaw Jehová chi aloni, tol jaꞌ oj oc joyan yinlaj conobꞌ Jerusalén, jaxca junoj kꞌakꞌ yu scoloni, jaxca junoj smuroal conobꞌ; jaꞌ bꞌey snan xol conobꞌ tuꞌ, jatuꞌ oj xꞌox yipalil, ja chi, ẍi jun ángel tuꞌ.
Jaꞌ Jehová Oj Scolel Sconobꞌ
6-7 Jaꞌ Jehová chi alon jaxca tiꞌ: Jain jix jex wakꞌ sajlemtoj bꞌey masanil yul yibꞌankꞌinal tiꞌ. Jaꞌ tinaniꞌ xin, chi wal ey jex jaxca tiꞌ: Jex a Sión, elanwej yin eymanil bꞌey yetcꞌulal norte, elanwej a bꞌey Babilonia, bꞌey ey jex ecꞌ yin jaxca presowomal, ẍi Jehová.
8-9 Jaꞌcaw Jehová, Naj caw ey yipalil, jaꞌ jix jin chejontej wal wan kꞌane tiꞌ tet wan nacionlaj jix jex uchon sajlemtoj jaex tiꞌ. Chi yalon Naj jaxca tiꞌ: Yal cꞌal mactxequel chi low skꞌabꞌ yin ebꞌ jin conobꞌ tiꞌ, jaxca wal tol jaꞌ yin sbꞌakꞌ jin sat chi low skꞌabꞌ. Yu jun tuꞌ, jain oj wakꞌ jowal yetoj wan nación tuꞌ, catuꞌ oj jin chejon oc ebꞌ eyoc yin yakꞌomaloj servil ebꞌ tuꞌ. Jaꞌ ebꞌ oj uchon lawoj ey ebꞌ, ẍi Jehová. Jaxca tuꞌ oj yun xꞌoxon el stzejejial Jehová, queytuꞌ oj yun snaꞌcha el je yu, tol jaꞌ Jehová jix jin chejontej.
10 Jaꞌcaw Jehová chi alon jaxca tiꞌ: Jex a Sión, bꞌitnanwej yin tzalacꞌulal, yutol oj jin jul caan je xol, ẍi Dios. 11 Jaꞌ yet oj yunen jun tiꞌ, ecꞌal nacionlaj oj jul sattaj Jehová, oj oc ebꞌ sconobꞌoj. Oj caey xacꞌal ecꞌ Naj je xol tuꞌ. Queytuꞌ oj yun snaꞌcha el je yu, tol jaꞌton Jehová, Naj ey Yipalil jix jin chejontej ey jex. 12 Jaꞌ bꞌey sat txꞌotxꞌ txꞌotxꞌ tol yet cꞌaltaꞌ Jehová yeocoj, jaꞌ tituꞌ oj sicꞌle ebꞌ yicꞌaal Judá yetoj cꞌal pax conobꞌ Jerusalén, yu yoc ebꞌ sconobꞌoj junelxa. 13 Tzꞌin ojabꞌ ẍi masanil ánima bꞌey yul yibꞌankꞌinal tiꞌ sattaj Jehová, yutol chi jul Naj, speto tacꞌal bꞌey scalubꞌal tol yet yeoc bꞌey satcan.